1 Davit sum nyiex haw khankix son tix ka daux veng Davit heue. Hoik khre ti deuh dah dee son teug bwan sijax mukheu Siyiex mai sum nyiex gox bwan man tix lhang son an heue. 2 Khaix an, Davit ah nin, “Pui tix kaux kawx tak ang pon ti klawm teug bwan sijax mukheu Siyiex lheu khaing cub ceu pui Lewix, mawh kheu Siyiex hoik laug ti deuh sonsang mawh kix cao pa klawm teug bwan sijax mukheu Siyiex mai yuh kaing jhaw ka plak sivoe Nawh Cao leeing ju heue.”Ref 15:2 Pi 10:8. 3 Davit kraix khrawm ceu pui Isarelax khankix tau ka daux veng Yerusaliem, sonsang viex teug bwan sijax mukheu Siyiex hoek ka dee pa ot tix, ka pa khre rien nawh ti deuh heue. 4 Khaix an, Davit khrawm ka kawn praix Arun mai ceu pui Lewix khankix hoek; 5 Khaing daux cub kawn simex Kawhat, Urelax pa mawh cao kaing ting kix mai puxaik nawh khankix hoik koe tixyieh tixnga kaux, 6 Khaing daux cub kawn simex Merarix, Asayax cao kaing ting kix mai puxaik nawh khankix hoik koe ra yieh tixnga kaux; 7 Khaing daux cub kawn simex Gerashon, Yawlax cao kaing ting kix mai puxaik nawh khankix koe tixyieh tixngoe kaux; 8 Khaing daux cub kawn simex Elizaphan, Shemayax cao kaing ting kix mai puxaik nawh khankix koe ra yieh kaux; 9 Khaing daux cub kawn simex Hebaron, Elialax cao kaing ting kix mai puxaik nawh khankix koe tidaix kaux, 10 Khaing daux cub kawn simex Awzalax, Aminadat cao kaing ting kix mai puxaik nawh khankix koe tixyieh kao ra kaux heue. 11 Davit kok ka cao giex kaing li Zadok mai Abita khawm ceu pui Lewix; mai khawm Awrelax, Asayax, Yawlax, Shemayax, Elialax mai Aminadat khankix hoek ka tix heue. 12 Khaix an, nawh hoik ah nin ka kix “Pex mawh cao kaing khaing daux doeh nyiex ma keeing pex khankix pa kaoh khaing ceu pui Lewix, kieh tokaux pex singax mai khawm puxaik pex khankix, pex tak pon viex teug bwan sijax mukheu Siyiex ceu pui Isarelax khankix hoek ka dee pa hoik khre rien aux ti deuh son nawh heue. 13 “Mawh kheu ang pex nyang yuh ceu in phao voe, Siyiex tom tawx krax kha rhawm piang ex, grawh grawng nawh, mawh kheu ang ex hawt yuh awm pa khaw mai been Nawh Cao heue.” 14 Mawh kheu nan, cao giex kaing li khankix mai ceu pui Lewix khankix hoik kieh tokaux tix singax sonsang viex ka teug bwan sijax mukheu Siyiex can pui Isarelax heue. 15 Ceu pui Lewix khankix klawm teug bwan sijax mukheu Siyiex piang klip tix ka khaox glawm nawh, pa tawm Mose ti deuh awm hoik koe gumlox Siyiex heue.Ref 15:15 Lih 25:14. 16 Khaix an, Davit hoik krai ka cao kaing ceu pui Lewix sonsang tawx beeh glawm ka puxaik tix khankix, mawh cao rhax lai mai pa tah ting khankix, pa mawh ting khaox feuk, ting pawd mai khawm chiang khankix, sonsang yaog kix lox rhax sinum ka daux pa gaux rhawm heue. 17 Mawh kheu nan, pui Lewix khankix hoik yaog ti tawx beeh glawm ka Heman, kawn simex Yawlax mai puxaik nawh khankix, ka Asapha kawn simex Berakhix; mai khawm puxaik kix cub kawn simex Merarix mai Eta kawn simex Kusha khankix, 18 daux puxaik kix pa yaog kix ara glawk ra mawh Zakharix, Benax, Yalelax, Shemiramot, Yehelax, Unix, Eliabax, Benayax, Maseyax, Matithix, Eliphelie, Mikneyax, Obetdedon mai Yelax pa mawh cao pau siviex khaing heue. 19 Cao rhax lai khankix mawh Heman, Asapha mai cub Ethan khankix mawh pa tah chiang tawng kieh lox sinum, 20 Zakharix, Azilax, Shemiramot, Yehalax, Unix, Eliabax, Maseyax mai Beneyax khankix mawh cub cao pa tah ting pawd Alamot, 21 Matithix, Eliphelie, Mikneyax, Obetdedon, Yelax, Azalix, khankix mawh cao pa tah ting feuk Sheminix, 22 Khenanix, pa mawh cao thong cao bung can pui Lewix khankix hoik mawh cao kaing pa gau kix ah lai rhax, mawh kheu hoik mawh nawh pui pa min ka lai rhax; 23 Berikhix mai Elakanax hoik mawh cao pa pau siviex son teug bwan sijax mukheu, 24 Shebanix, Yoshaphat, Netanelax, Amashie, Zakharix, Benayax mai Eliabax cub cao giex kaing li khankix mawh cao phlu teettawng ka plak sivoe teug bwan sijax mukheu Siyiex; Osetdedon, Awbedax, Edom mai Yehix, mawh cao pau siviex son teug bwan sijax mukheu heue. 25 Mawh kheu nan, Davit mai kwad riex ju ceu pui Isarelax khankix mai cao kaing naing khankix pa kwang piang lien tix kaing rheng, lih hu sonsang teei teug bwan sijax mukheu Siyiex khaing daux nyiex Obetdedon tau mai krax pa gaux rhawm tix heue. 26 Siyiex hoik teem ka pui Lewix khankix cao pa klawm teug bwan sijax mukheu Siyiex, kix hoik tan moi aliah mu mai kawn yung pex aliah mu heue. 27 Davit hoik ceep ka sibex man ceu pa mhawm mai pui Lewix khankix pa klawm ka teug bwan sijax mukheu mai cao pa rhax lai khawmuik Khenanix pa mawh cao kaing pa thong bung cao rhax lai khankix hoik ceep ka sibex man ceu pa mhawm awm nawh heue. Davit baox ceep sibex lang jung pa hoik yuh tix ka man ceu pa mhawm heue. 28 Mawh kheu nan, can pui Isarelax khankix hoik teei ti viex teug bwan sijax mukheu Siyiex hoek tau mai lox pa kok yo tix, khawm lox teet mai lox teettawng mai khawm lox chiang mai lox tah ting mai khawm lox ting feuk khaox khankix heue. 29 Yam hoik hoek teug bwan sijax mukheu Siyiex ka daux veng Davit, Mekhalax kawn bun Sawlux, si mi ti jhak kix khaing daux siviex iak mai yaox ka graoh simiang Davit mai tah ka ting mai nawh hoik sibriem nawh ka daux rhawm tix heue.