14
Davit Ot Daux Veng Yerusaliem
(2Sam. 5:11-12)
1 Yam in Hiram simiang haktiex Turux ploi cao cau tix khankix hu ka Davit tau mai khaox Arit mai khawm cao pa chix yuh kaing sang tiex mai khawm cangmai khankix, sonsang sum tix tawx nyiex haw tix lhang ka nawh heue.
2 Davit tawng ka yaog Siyiex ti deuh nawh mawh simiang piang ceu pui Isarelax khankix, mawh meung haktiex nawh mawh pa kied yaog tix lhaong mai pui nawh pa mawh ceu pui Isarelax heue.
Keh Kawn Davit Daux Yerualiem
(2Sam. 5:13-16; 1Been 3:5-9)
3 Khaix an, Davit teei ti koe moeng tom nie ka daux veng Yerusaliem mai pon kawn simex kawn bun tix tom nie heue.
4 Inkix mawh ceu kaux kawn praix nawh khankix, pa koe ka daux veng Yerusaliem, pa kaux Shamua, Shawbat, Natan, Sawlamon,
5 Ibaha, Ilishua, Epeliet,
6 Noganie, Nephiet, Yaphia,
7 Ilishama, Biliadax mai Elipheliet khankix heue.
Grawng Som Nai Ceu Pui Philitix
(2Sam. 5:17-25)
8 Yam hoik mhong ceu pui Philitix khankix ka yaog Davit ti mawh simiang piang ceu pui Isarelax khawmuik, ceu pui Philitix lih hu sawg ka Davit mai Davit mhong grawng ceu ankix mai nawh hu puing ka kix heue.
9 Khaix an, ceu pui Philitix khankix hoek naog daux ngawd Rephen heue.
10 Davit chawk cheng ka Siyiex ah nin, “Mawh sang pon hu puing aux ka ceu pui Philitix, mawh sang ap Maix Cao kix ka daux tawm tai aux lie? “Siyiex ah nin ka nawh, “Hu heue, mawh kheu Aux tak sang ap ti tawx kix ka daux tawm taix maix heue.”
11 Mawh kheu nan, kix lih hu ka veng Balax, Perazin mai Davit pex kix tan heue. Khaix an, Davit ah nin, “Siyiex prung prangti tik pui koeng khankix ka taix aux, awm pa prung prang rawm khankix heue. “Mawh kheu nan, kix kok ceu kaux dee an mawh Balax Perazin ka heue.
12 Yam prah kix siyiex krub kix tan, Davit tawx lox ka kix mai nhie kix gleeing ti tik riang siyiex an ka ngu heue.
13 Ceu pui Philitix khankix baox deeh hoek naog ka daux ngawd an heue.
14 Mawh kheu nan, Davit deeh chawk cheng ka Siyiex mai Siyiex ah nin ka nawh, “Maix tak ang pon ti haok see see dee ot kix via ti, hu ka praok kix mai hoek tix kuan kix ka plak sivoe dee koe khaox liah khankix heue.
15 Ceu an tak lih ti koe yam mhong maix ka lox sinum hu pui piang rao khaox liah, khaix an maix tak lih hu ka daux biang naing heue. Siyiex hoik lih hu sivoe maix, sonsang pah ka cub tab ceu pui Philitix khankix heue.”
16 Davit yuh awm gumlox pa tawm Siyiex ka nawh mai kix hoik deeh pheet ka cub kru naing ceu pui Philitix khankix khaing veng Gibion, tom hoek ka veng Gezarax heue.
17 Khaix an, krax pa ao min Davit hoik tah hu ka daux haktiex an khankix khawmuik mai Siyiex hoik kieh pui khawmuik lhat graung ka nawh heue.