1 Aux tak sang ah lox rhax krax caux rhawm Siyiex jheung jheung mai jheeh aux tak sang krai grawng sijax mukheu Maix ka ceu pui jheung jheung leeing ju heue. 2 Aux tak sang krai koe krax caux rhawm Maix jheung jheung mai sijax mukheu Maix, kaux cong ka piang raoma heue. 3 Siyiex ah nin, Aux yuh sijax mukheu tau mai kaw pa hoik laug Aux ti teei ka lox tiex tu ka siliex Aux Davit ah nin, 4 Aux tak sang kieh ru maix kaux cong jheung jheung mai kieh dang ngeung maix tak kaux cong ka daux ceu pui leeing ju heue. 5 Siyiex eue, raoma tak yaogyaw ka kaing pa hoik yuh Maix, ceu pa daox am mai sijax mukheu Maix ka sinax cub pui pa singax singeh khankix heue.Ref 89:4 2Sa 7:12-16; 1Been 17:11-14; Yaog 132:11; Cau 2:30. 6 Grawh grawng nawh, ka daux raoma pui mawx tak sang pon ti lah cha ka Siyiex? Mai kawn praix Siyiex khankix mai pui mawx tak sang awm Siyiex? 7 Siyiex mawh pa lhat graung cub pui pa singax singeh khankix kah mai Nawh mawh pa nab yam nie lheu khaing pui pa ot rob vung viang Nawh khankix heue. 8 Siyiex Cao kru naing raoma eue, pui pa ting riang rao pa awm Maix ang koe, sijax mukheu Maix pa kaux cong kawx, rob vung viang Maix heue. 9 Maix mawh Cao pa giex kaing ka rawm sigrit sigra pa ting riang mai chix kieh yiien yawg ka haok huan pukpak rawm ting heue. 10 Maix hoik plaux ka riah ceu pui Rakhap yum mai teei plawng taix Maix pa ting riang ting rao mai kieh pui pa koeng khankix, prung prang hu kudah kudee heue. 11 Raoma mai haktiex mai kraung can ceu pa koe ka daux an khankix, mawh cie Maix mai mawh pa hoik phan hoik yuh Maix heue. 12 Caong ma seh mai caong ma laong kawx, mawh pa phan pa deuh Maix mai gawng Taborax mai gawng Heramon, deuh rhawm ka Maix mai rhax lai gaux rhawm gaux rhi heue. 13 Plawng taix Maix hoik grum naog ka sibrawm mai taix Maix mawh pa ting riang mai taix khawn dawm Maix mawh pa kied lhaong heue. 14 Krax pa rahsee mai krax prawng ca Maix, mawh jaong num dang ngeung Maix heue. Krax pa caux rhawm mai sijax mukheu hu sivoe ngai Maix heue. 15 Siyiex eue, ceu pui pa mhong pa tawng ka Maix mai pa gaux rhawm khankix, koe bwanson heue. Kix yaox ti lailing ka daux pa riang pakngai Maix heue. 16 Kix pon ti gaux rhawm ka daux ceu kaux Maix leeing lang singaix jheung jheung mai yaog kix ting, mawh kheu krax pa rahsee Maix heue. 17 Min plakngai Maix mawh riang rao kix, bwanson Maix kawx, hoik yaog ka rung choek ex heue. 18 Siyiex mawh Cao pa tiebtie ex, Siyiex pa singax singeh Isarelax mawh simiang ex heue.

19 Yam an tix bawg dix, Maix krai ka kix pui pa singax singeh khankix, ka daux riang susai ah nin, Aux hoik tawx pong krax pa teem ka pui pa ting riang rao, Aux hoik laug ti teei pui tix kaux ting, ka daux cub pui khankix heue. 20 Aux yaox siliex Aux DavitRef 89:20 1Sa 13:14; Cau 13:22. mai groi rawm bee pa singax singeh mai hoik laug ti deuh nawh heue.Ref 89:20 1Sa 16:12. 21 Taix Aux ot plak nawh mai plawng taix Aux kieh nawh kaux cong heue. 22 Pui pa koeng khankix, ang nieb pon tud rhim ti teei kraung khrai nawh mai pui pa ang rahsee khankix, ang lai pon ti tuktiak tukte ka nawh heue. 23 Aux tak sang pah pui pa koeng ka nawh khankix sivoe ngai nawh mai tawx krax pa kha rhawm ka pui pa koeng ka nawh khankix heue. 24 Sijax mukheu mai krax pa caux rhawm Aux tak ot tau mai nawh mai Aux yaog rung choek nawh ka daux ceu kaux Aux heue. 25 Aux tak sang teei taix nawh, deuh piang rawm sigrit sigra mai teei taix khawn dawm nawh, deuh ka piang rawm klawng khankix heue. 26 Nawh kok yo Aux ah nin, Maix mawh Siyiex aux, keeing aux mai mawh Rang Cao pa taoh aux heue. 27 Aux tak sang ciak ti deuh nawh mawh ara kawn Ai mai yaog nawh ting ka piang Simiang haktiex khawmuik heue.Ref 89:27 Jhi 1:5. 28 Krax pa caux rhawm Aux tak sang een ka son nawh jheung jheung mai sijax mukheu Aux, kaux cong ka piang nawh heue. 29 Aux tak sang kieh ru nawh kaux cong jheung jheung mai kieh dang ngeung nawh kaux cong leeing ju awm singaix meung raoma heue. 30 Phan kawn praix nawh, tik vud ka lox tawm beenli Aux mai ang hawt ka lox pa hoik deuh Aux. 31 Phan kix nieb yuh mai ang hawt ka lox tawm beenli Aux khankix, 32 Aux tak sang teei khaox saux sivied ti gau kix, ka phimap pa lud kix, kheu yuh kix phimap heue. 33 Viang mawh kawx nan, krax pa caux rhawm Aux, ang lai teei lih khaing nawh mai sijax mukheu Aux kawx, ang lai yuh laux heue. 34 Aux ang nieb yuh ka sijax mukheu Aux mai ang doh tieh loh ka lox pa hoik lih khaing jheeh Aux. 35 Aux hoik tiextu ka pa rahsee mai pa singax singeh ti ah nin, “Aux ang doh pie lhen ka Davit.” 36 Aux tak sang kieh ru nawh kaux cong jheung jheung mai dang ngeung nawh kawx, awm singaix ka plak sivoe ngai Aux heue. 37 Nawh Cao ah nin, “Aux tak sang kieh Maix kaux cong awm khix jheung jheung mai kieh awm sakse pa pau ka sijax mukheu ka piang raoma heue.”

38 Viang mawh nan, Maix song rhawm mai seeing brai mai hoik tik ka Simiang pa hoik laug Maix ti teei heue. 39 Maix hoik yuh laux ka sijax mukheu pa hoik yuh Maix tau mai siliex Maix mai hoik taing mhok khri nawh hoek tom siglaing tiex heue. 40 Maix hoik raig ti tik ka nghaong pa vie nawh mai hoik yieh ti tik ka nyiex tab nawh heue. 41 Can pui pa lawng krax khankix, tud rhim ti teei nawh mai paox plawg nawh khankix, ah lox pa salao ka nawh heue. 42 Yaog taix khawn dawm pui pa koeng ka nawh khankix mai kieh pui pa lah cha ka nawh khankix khawmuik gaux rhawm heue. 43 Maix kieh lawm vaid nawh vawk vak mai ang lai pon ti kieh nawh cung ka dee puing naing heue. 44 Maix kieh min plakngai nawh grai hu, Maix hoik taing dang ngeung nawh tom siglaing tiex heue. 45 Maix kieh ju pa awn nawh dawd hu mai kieh nawh kaig tua heue.

46 Siyiex eue, Maix glaik tix mox, bawg yam miex grheung? Krax pa song rhawm Maix hax awm ngu, bawg yam miex grheung? 47 Doh keud ka kawn pui pa hoik phan hoik deuh Maix, ka aux pa dawd ju, pa chix laux leeing, pa ang koe dee bleeh tidtix liak. 48 Pui pa im ju mai pa ang yaox krax yum mai pa chix taoh ka ju tix, khaing daux tawm taix sibrawm meung yum mawh pui mawx? 49 Siyiex eue, krax pa caux rhawm Maix mai sijax mukheu Maix, pa hoik tiextu Maix ka siliex Maix Davit dix, koe dee mawx? 50 Doh keud ka aux, pa yaox ti kham geu ka pa salao pui liak. See pui kuceu khawmuik, aux hoik viex ka piang naok tix heue. 51 Grawh grawng nawh, Siyiex eue, pui pa koeng ka Maix khankix, chix salao ka Maix heue. Kix salao ka khaix caong pui pa hoik groi Maix rawm bee kah heue. 52 Kieh Siyiex koe bwanson leeing ju liak. Amen! Amen!