1 Siyiex Cao pa taoh aux eue, aux kok yo sivoe ngai Maix ku singaix ku sawm heue. 2 Ceu pa rawg aux bwan, kieh hoek plak sivoe ngai Maix liak. Nghiet ka lox pa kok yo aux liak. 3 Khwan ju aux hoik naog krax pa kha rhawm mai ju aux kawx, dex hoek ka meung yum heue. 4 Kix hoik simin aux tau mai kix pa hoik lih hu ka daux simeeig awm pui pa hoik uik riang heue. 5 Tik aux awm pui pa hoik yum khankix mai awm pui pa hoik laig it ka daux simeeig pa ang Maix lai doh keud, pa hoik singai khaing tawm taix Maix heue. 6 Maix hoik taing ti sau aux ka daux pa kied raux, pa hoik kheem pa faik ka daux pa kied sidaing raux heue. 7 Krax pa song rhawm song rhi Maix hoik gut ka piang aux, Maix kieh pukpak rawm khankix, tuktiak tukte ka aux heue. 8 Maix hoik gah paox pa tawng pa yung aux, singai khaing aux, Maix hoik kieh kix seeing brai ka aux mai Maix hoik gang aux, ang pon ti lih plak praix heue. 9 Ngai aux laux kheu yaox aux ti kham geu krax pa kha rhawm, Siyiex eue, aux yaog taix tix kok yo ka Maix jheung jheung heue. 10 Maix tak sang jhi mhai ceu pa daox am ka pui pa hoik yum khankix lie? Pui pa hoik yum khankix, tak deeh kaoh ti yaogyaw ka Maix lie? 11 Kix simawd krax pa caux rhawm Maix ka daux simeeig lie? Kix krai sijax mukheu Maix ka dee laux dee leeing lie? 12 Kix chix tawng ceu pa daox am Maix ka daux pa faik lie? Kix chix tawng gumlox pa rahsee Maix ka daux meung yum lie? 13 Siyiex eue, aux kok yo ka Maix heue. Lox pa rawg aux bwan ponngawb hoek sivoe ngai Maix heue. 14 Siyiex eue, mawh kheu patix, Maix tik ju aux? Mawh kheu patix Maix veeh pakngai tix khaing aux? 15 Aux yaox ti kham geu krax pa kha rhawm mai dex sang yum tom yam iak ju aux heue. Aux yaox ti kham geu krax pa prawng ca Maix mai krax pa taug mao heue. 16 Krax pa song rhawm Maix hoik kheem veei ka aux, krax pa lhat pa prawng ca Maix hoik yuh aux laux heue. 17 Kix khrawm paox tix mai rob ka aux leeing lang singaix, awm hoik rob rawm vung viang aux heue. 18 Maix hoik gah paox grawm pa moh aux mai paox grawm aux, hu dee singai khaing aux mai pui paox meed tawng aux khankix kawx, mawh ngie pui pa ot ka daux pa faik heue.