1 Ex ah lox rhax pa gaux rhawm gaux rhi gauxrhi, yaogyaw ka Siyiex Cao pa tawx riang tawx rao ka ex heue. Kok yo lox sinum ka Siyiex Yakop heue. 2 Ah lox rhax mai tah kraung, tah ting susi, pa nyawm tix nghiet heue. 3 Phlu teettawng ka singaix khix khraox mai singaix pang khix mai singaix yuh pawie ting heue.Ref 81:3 Si 10:10. 4 Ceu in mawh beenli pa deuh Siyiex Yakop ka son pui Isarelax heue. 5 Nawh Cao prawng ca ti deuh ka geh nyiex Yosiep tix kham sakse yam lih hu nawh ka daux meung Ejiptux, dee ang aux tawng lox tawng pui ka heue. 6 Aux kieh kraung pa cien luan khaing piang klip nawh mai taix nawh kawx, kieh luan khaing beeh klawm pa cien heue. 7 Yam yaox maix krax pa kha rhawm maix kok yo Aux, Aux taoh ti teei ka maix heue. Aux deeh pawk lox Maix, dee tuh sah dee glip mai cheuk cheu tix yaox maix ka praok rawm klawng MeribaxRef 81:7 Lih 17:7; Si 20:13. heue. 8 Pui aux khankix eue, nghiet heue, Aux tawm ti deuh lox ka maix, geh nyiex Isarelax eue maix nghiet ka lox Aux liak. 9 Siyiex pui tang ceu ang pon tix koe mai maix mai maix ang pon tix krub ka siyiex tang praix klawng.Ref 81:9 Lih 20:2-3; Pi 5:6, 7. 10 Aux mawh Siyiex maix Cao pa taoh maix lih khaing daux meung Ejiptux heue, ang jheeh maix tom vieh tom va, Aux tak tawx maix ih tom sak tix heue. 11 Pui Aux khankix, ang nghiet ka lox Aux, ceu pui Isarelax tee ang moh ka Aux nieh. 12 Mawh kheu in, Aux tom kieh rhawm kix kiien mai kieh kix hu, awm pa sikix tix hawt yuh. 13 Pui Aux khankix, nghiet ka lox Aux, kieh ceu pui Isarelax hawt daux krax Aux liak. 14 Phan hawt pui pa koeng khankix, Aux nied tix yeen kix tiem mai taix Aux tiebtie, yuh laux ka kix pui pa lah cha ka kix heue. 15 Pui pa koeng ka Siyiex khankix, khyox khaw ka Nawh Cao mai pui aux khankix kawx, koe akhwang kaux cong jheung jheung heue. 16 Nawh Cao tak sang tawx kix ih ka gaox ka nghox tom sak, pa kied mhawm mai rawm hia pa lih khaing daux rang heue.