1 Siyiex eue, ex yaogyaw ka Maix heue, kheu hoik dex ceu kaux Maix mai ex khawm sakse ceu pa daox am pa yuh Maix mai ex yaogyaw ka Maix heue. 2 Bawg yam pa bak aux ka kix, aux prawng ca ka kix rahsee heue. 3 Haktiex mai pui haktiex, viang yung yiang hu kawx, Aux kieh jaong num haktiex kaux cong heue. 4 Aux ah nin ka pui pa ting rhawm ting rhi khankix, pex paw lai ting rhawm ting rhi mai pui pa caox caig khankix, paw yuh rung tix choek, 5 paw yuh rung tix choek mai pui pa ang rah ang see khankix, paw yuh rung tix choek mai paw kieh ghok kiien lox sikah. 6 Grawh grang nawh, krax yaogyaw, ang mawh pa kaoh khaing plak lih singaix mai plak klip singaix mai ka daux tiagtu. 7 Cao pa prawng ca mawh Siyiex heue. Nawh yeen tix kaux tiem mai yaog tix kaux lhaong heue. 8 Ka daux tawm taix Siyiex, koe kawk pa hoik naog rawm plix siiet pa khiien heue. Nawh prauk rawm plix siiet pa hoik klao mai rawm sidah lih heue. Kawn pui piang haktiex pa ang rah ang see khankix khawmuik biiet tix nyaux ka glhaok an heue. 9 Phan mawh aux yaogyaw ka Siyiex ceu pui Yakop mai rhax lai yaogyaw ka jheung jheung heue. 10 Aux tak kid ti tik rung choek pui pa ang rah ang see khankix mai aux tak yaog rung choek pui pa rahsee khankix heue.