1 Siyiex eue, mawh kheu patix Maix lai tik vud aux jheung jheung, mawh kheu patix Maix lai song rhawm song rhi ka yung khankix, pasax sawm ka dee sawm tix? 2 Doh keud ka cub pui Maix khankix dix mai pui pa hoik laug Maix, sonsang mawh sin ang ah mai sonsang ot Maix ka gawng Zion ang ah heue. 3 Hoek tix jhak ka dee hoik yieh Maix ti tik ka pui pa koeng pa yuh pa ang rah ang see kuceu khawmuik, ka daux nyiex bwan Maix pa singax singeh liak. 4 Pui pa koeng ka Maix khankix, kok yo sinax pui Maix heue. Sakse Maix, kix yuh mawh sakse cie tix heue. 5 Kix yuh tix mawh awm pui pa viex moe mai hu kid khaox ka daux tiag. 6 Yam in kix tieh tix viex moe, daix mai yieh ti tik kraung nyiex bwan Maix heue. 7 Kix gleeing ti tik ka nyiex bwan Maix pa singax singeh, nyiex bwan dee ot ceu kaux Maix kawx, kix hoik yeen hoek tom siglaing tiex heue. 8 Kix ah nin ka daux rhawm tix, “Ex tak yieh ti tik ka ceu pui kix pak lawg, ” Mai gleeing ti tik ka nyiex bwan Siyiex, pa koe ka piang haktiex khawmuik heue. 9 Ang ex lai yaox sakse tokaux tix, tix ceu kawx, cao jhai ka ang koe, cao pa krai ex mhong grawng bawg yam ka ang koe mai kawn koe miex grheung ang tawng? 10 Siyiex eue, pui pa koeng ka ex, tak salao ka ex miex grheung? Pui pa koeng ka Maix yuh pa ang cee ang cak ka ceu kaux Maix jheung jheung lie? 11 Mawh kheu patix, Maix lai deeh yawn taix khawm dawm Maix khaing ex yuh ka mawx? Teei taix Maix lih khaing naok Maix mai yuh kix laux leeing heue. 12 Tom yam jah, Siyiex dawg mawh Simiang Cao pa taoh ka sinax haktiex tete heue. 13 Maix hoik kieh rawm sigrit sigra gwieh hu ka daux sibrawmRef 74:13 Lih 14:21. mai Maix hoik raig ti tik kaing siyawng pa ot ka daux rawm heue. 14 Maix hoik raig ti tik kaing kax ting LevitanRef 74:14 Job 41:1; Yaog 104:26; Isa 27:1. mai tawx ka can pa ot ka daux tiagtu sonsang ih kix heue. 15 Maix kieh daux rawm keut mai rawm rawng lih mai rawm klawng pa koe rawm jheung jheung kawx, Maix kieh kroh hu heue. 16 Ponngaix mai ponsawm kawx, mawh cie Maix mai Maix hoik yuh pa riang mai singaix heue. 17 Maix hoik deuh bawg yam rung bawg yam kwat mai mee haktiex in khawmuik heue. 18 Siyiex eue, viang pui pa koeng salao ka Maix mai pui pa caox caig yuh pa ang cee ang cak ka ceu kaux Maix kawx, doh keud ka kix liak. 19 Paw lai teei ju sikaux Maix tawx ka totiag khankix liak. Paw lai pi awm ka pui pa hot pa sibhawm jheung jheung liak. 20 Maix doh keud ka sijax mukheu Maix liak, grawh grawng nawh, ka daux pa vhaik ka piang haktiex in, hoik naog dee ot dee koe pui tud rhim mai pa tuktiaktukte khankix heue. 21 Paw kieh pui pa yaox ti kham geu ka krax pa tuktiaktukte hoek krax pa kaig pa tua mai krax pa laux rhawm lauxrhi liak. Kieh pui pa hot pa sibhawm khankix, yaogyaw ka ceu kaux Maix liak. 22 Siyiex eue, kaoh mai prawng ca ka see Maix liak, doh keud ka pui pa caox caig, pa sa lao ka Maix jheung jheung liak. 23 Paw lai pi awm ka lox pui pa koeng ka Maix, lox pa mawh pa lawh pui pa tieh feen ka Maix nie lheu haoh hun sinyek sinyek heue.