1 Siyiex eue, aux deuh rhawm ka Maix heue, kieh aux luan khaing krax pa kaig pa tua jheung jheung liak. 2 Awm pa koe pa rahsee Maix kieh aux luan liak, veeh yhaok Maix plak aux mai taoh aux liak. 3 Kieh Maix mawh rang ting dee ot aux mai dee hoek aux jheung jheung liak. Maix koe sibrawm tix taoh aux, grawh grawng nawh, Maix mawh rang ting aux mai tab dee deuh aux rhawm heue. 4 Siyiex aux eue, taoh aux khaing daux tawm taix pui pa caox caig mai pa ang rah ang see liak. 5 Siyiex eue, Maix mawh pa krox jun pot aux mai Maix mawh dee deuh aux rhawm tom yam mawh aux kawn nyawm heue. 6 Aux deuh rhawm ka Maix tom yam keh aux mai aux hoik pon bwanson Maix tom yam kawn ot aux daux vaig miex tix, mawh kheu nan, aux tak yaogyaw ka Maix jheung jheung heue. 7 Viang aux awm ceu pa daox am sivoe ngai pui hun khankix kawx, Maix mawh dee deuh aux rhawm pa kaux cong heue. 8 Jheeh aux naog ka pa yaogyaw ka min plakngai Maix ku singaix heue. 9 Paw lai tik ka aux, yam hoik kuad aux liak. Paw lai tik vud aux, yam hoik iak riang rao aux liak. 10 Pui pa koeng ka aux, pa ot tang plak khankix, salao ka aux heue. Kix jawm ti teei ju aux. 11 Siyiex hoik tik nawh, ex hawt pheet ti giex nawh, pui pa taoh nawh ang koe tix kaux kawx, kix ah nan heue. 12 Siyiex eue, paw lai ot singai khaing aux liak. Siyiex eue, nied tix teem aux laung laung liak. 13 Kieh pui pa lud ka ju aux khankix hoek krax pa kaig pa tua mai hoek krax pa laux pa som heue. Kieh pui pa sawg ti deuh phimap ka aux khankix, hoek ka daux pa salao mai hoek krax pa som nai liak. 14 Phan mawh aux, krox jun pot ka Maix jheung jheung mai tak sang nie lheu yaogyaw piang yaogyaw ka Maix heue. 15 Jheeh aux tak sang krai pa rahsee Maix mai grawng krax taoh Maix ku singaix heue. Ang dak uik simin bwanson Maix Cao heue. 16 Ka daux sibrawm Siyiex aux tak sang krai grawng krax pa rahsee Maix khaing heue. 17 Siyiex eue, Maix hoik gau aux tom yam mawh aux kawn nyawm heue. Maix hoik jhi ceu pa daox am Maix tom singaix yam in heue. 18 Siyiex eue, viang aux hoik riex ju mai hoik paing hauk kaing kawx, paw awt nyang tik vud aux ha, mawh kheu aux, ang nyang yaox tix jhi sibrawm Maix ka pui inkix mai pui tak sang koe khaix khankix heue. 19 Siyiex eue, krax pa rahsee Maix mawh pa kied ting kied lhaong heue. Siyiex eue, pui mawx tak awm Maix? 20 Maix hoik jhi aux yaox krax pa khi rhawm mai ceu pa nu pa khawm tom nie mai deeh kieh aux nyawm rhawm mai kieh aux deeh kaoh khaing haktiex pa raux heue. 21 Maix hoik kieh aux magmi mai nyawm rhawm, ka daux singaix pa hoik luan heue. 22 Siyiex eue, aux tah ting mai yaogyaw ka sijax mukheu Maix, Siyiex Cao pa singax singeh ceu pui Isarelax eue, aux tah ting mai rhax lai yaogyaw ka Maix heue. 23 Yam rhax aux lai ka Maix, jheeh aux kawx tak gaux rhawm gaux rhi mai ju aux pa hoik taoh Maix kawx, gaux rhawm gaux rhi heue. 24 Dak aux kawx, tak sang krai grawng pa rahsee Maix, ku singaix jheung jheung heue, grawh grawng nawh, pui pa sawg phimap pa lud aux, hoik hoek krax pa kaig pa tua mai laux pakngai heue.