YAOGYAW 52
1 Pui pa ting riang eue, mawh kheu patix maix yaw tix, sonsang yuh laux ka bwanson pa yuh pui yuh ka mawx? Krax moh krax rhawm Siyiex kaux cong jheung jheung heue.
2 Dak maix lawm awm gawn mai pie lhen mai yuh pui laux leeing heue.
3 Maix nie lheu moh pa caox khaing pa mhawm mai nie lheu moh lox pie lhen khaing lox pa rahsee heue.
4 Dak pa chix pie lhen eue, maix khaw rhawm ka lox pa sang yuh pui laux heue.
5 Siyiex tak raig ti tik maix jheung jheung heue. Nawh Cao teei ti tik maix khaing nyiex gox maix mai bluh ti tik maix khaing dee ot pui pa im ju heue.
6 Pui pa rahsee khankix, yaox mai lhat graung heue. Kix nyiah ka nawh ah nin,
7 “Jhak heue, pui pa ang deuh rhawm ka Siyiex mai nawh deuh rhawm ka kraung khrai tix mai nawh kaux cong ka phimap pa caox heue.”
8 Phan mawh aux, awm khaox sanlun pa mhawm klai pa koe ka daux nyiex Siyiex mai aux deuh rhawm ka krax moh krax rhawm Siyiex leeing ju heue.
9 Aux tak sang yaogyaw Maix ka kaing pa hoik yuh Maix jheung jheung leeing ju heue. Aux tak krox jun ceu kaux Maix sivoe ngai pui pa moh ka Maix, mawh kheu Maix mawh pa jiet mhawm heue.