1 Siyiex eue, awm koe rhawm Maix, yuh bwanson caux rhawm ka aux liak, awm koe krax pa caux rhawm Maix tom nie, preet ti tik phimap pa lud aux liak. 2 Sigrhah phimap aux tom bawh khawmuik mai kieh singax singeh liak. 3 Aux tawng aux yung pa lud tix mai doh keud ka phimap pa lud tix jheung jheung heue. 4 Aux hoik lud ka Maix mai aux hoik yuh pa ang rahsee sivoe ngai Maix, mawh kheu krax prawng ca Maix pa rahsee pluat ploi phimap aux heue.Ref 51:4 Ro 3:4. 5 Grawh grawng nawh, aux viex phimap, tom yam keh aux mai tom yam ot aux ka daux vaig miex tix heue. 6 Maix moh ka rhawm pa rahsee mai gau aux ka cuyi pingnya pa raux pa mox ka daux rhawm aux liak. 7 Sonsang singax singeh aux, teei lhax khaox haisop mai kieh aux singax singeh mai tawx bwanson ka aux liak. sigrhah aux paing awm rawm rha liak. 8 Sonsang nyawm rhawm gaux rhawm aux, kieh aux mhong lox Maix liak, phan yuh nan, si-ang pa hoik raig Maix tak sang gaux rhawm gaux rhi heue. 9 Veeh plakngai Maix khaing phimap pa hoik yuh aux mai preet ti tik ka phimap khawmuik liak. 10 Siyiex eue, kieh daux rhawm aux singax singeh liak. Cox rhawm rhi aux mawh pa khraox mai kieh kaux cong liak. 11 Paw lai grheu ti tik aux khaing Maix liak, paw lai teei khwan singax Maix khaing aux liak. 12 Caux rhawm deeh tawx akhwang krax gaux rhawm pa dex dawd mai krax taoh Maix ka aux liak, tawx krax gaux rhawm Maix mai teem ka aux liak. 13 Sonsang pon aux tix gau krax pa rahsee Maix ka kix pui pa ang rahsee mai sonsang deeh hoek pui pa koe phimap ka Maix heue. 14 Siyiex Cao pa taoh aux eue, kieh aux luan khaing phimap pa simie ti pah pui yum liak. dak aux ah lox rhax pa gaux rhawm grawng pa rahsee Maix heue. 15 Siyiex eue, paoh ka siyieb jheeh aux liak, jheeh aux tak sang yaogyaw bwanson Maix heue. 16 Maix ang moh ka ceu pa tan lu, phan ang mawh nan, aux tan ka Maix mai Maix ang khaw rhawm ka ceu pa gleeing tix tan heue. 17 Ceu pa tan lu pa khaw rhawm Siyiex mawh rhawm pa max, Siyiex eue, rhawm pa max Maix ang chix tik vud heue. 18 Kieh rhawm pa gaux rhawm Maix, yuh bwanson ka gawng Zion liak, deeh cox ka guh veng veng Yerusaliem liak. 19 Yam an krax lu krax tan, pa rahsee pa gleeing ti tan ang ah, pa gleeing ti tan khawm kaux ang ah, Maix gaux rhawm kah heue. Yam an, tak sang teei mawie mhaing mai tan ka piang khu dee tan Maix heue.