1 Lai pa tiiem aux, ah lox rhax ka paox plak sivoe ngai Simiang, rhawm rhi aux kied naog krax gaux rhawm heue. Dak aux kawx sidaing chix ah awm gawng nameug pui pa chix tiiem lai tix kaux heue. 2 Maix lheu mhawm khaing paox kawn pui heue, jheeh Maix hoik naog ka lox bwan son heue. Mawh kheu in Siyiex tom tawx bwanson ka maix jheung jheung heue. 3 Simiang pa ting sibrawm eue, teei vaid min plakngai Maix pa ting mai kawg heue. 4 Kieh sibrawm Maix pex hu mai brug hu ka lox pa mawh meh mai lox pa awn pa tiiem mai lox pa rahsee liak, taix khawn dawm Maix tak sang jhi ka ceu pa lhat graung heue. 5 Mawh kheu kied lawm te Maix mai laig ka daux rhawm rhi pui pa koeng ka Simiang khankix mai kix goh greem caong Maix heue. 6 Siyiex eue, dang ngeung Maix mawh dang ngeung pa kaux cong leeing ju heue. Meung Maix mawh pa rahsee heue. 7 Maix moh ka ceu pa rahsee mai koeng ka pa ang rahsee heue. Mawh kheu in, Siyiex eue, mai yaog maix nie lheu ting khaing paox grawm maix khankix mai hoik groi rawm bee pa gaux rhawm ka maix heue.Ref 45:6, 7 He 1:8, 9. 8 Muran, mai khaox caihung, pa sioe baux hoik bhawng ka kraung ceep mai lox tah ting rhax lai yaogyaw ka maix kieh maix gaux rhawm ka daux nyiex haw pa hoik yuh maix ka nga sang heue. 9 Kawn bun Simiang khankix ku dah, ot tau mai kawn bun Simiang mai plak taix khawn dawm maix, moeng maix laux simiang ceep kraung khri Awfirax mai cung tix heue. 10 Kawn bun eue, nghiet heue, veeh yhaok tix mai keud mhawm mhawm, pi awm ka ceu pui maix mai nyiex ma miex keeing maix awx. 11 Phan yuh nan, simiang tak moh ka maix, mawh kheu mhawm grang maix mai nawh hoik mawh Simiang maix mai krub ka Nawh heue. 12 Jah ka kawn bun Simiang veng Turux mai cub pui mag mi khankix, viex totaix mai hoek ti rieb ka maix heue. 13 Kawn bun simiang khankix koe min plakngai mai ceep kix kraung pa hoik yuh ka khri heue. 14 Khaix hoik ceep kix kraung pa mhawm grang ka nawh, hu tau mai paox bun krih nawh mai viex nawh hu ka simiang heue. 15 Kix viex ceu pa gaux rhawm mai laig ka daux nyiex haw simiang heue. 16 Son keeing khankix, Maix hoik ciak ti deuh ka kawn praix kix, sonsang mawh Simiang ka piang haktiex khawmuik heue. 17 Aux tak sang teei ceu kaux Maix tah hu ka kawn pui khankix mai ceu kawn pui ti ju hoik ti ju mai kawn pui khankix yaogyaw ka Maix ku ju leeing ju heue.