1 Siyiex eue, aux deuh rhawm ka Maix heue, Maix kieh aux luan khaing krax pa kaig tua jheung jheung liak mai taoh ka aux awm pa rahsee Maix liak. 2 Veeh yhaok Maix plak aux mai nied ti taoh aux laung laung liak, Maix mawh rang ting pa kaux son aux mai mawh tab dee deuh aux rhawm tix heue. 3 Maix mawh rang ting son aux mai mawh tab dee deuh aux rhawm tete heue mai thong gau aux hu ka daux ceu kaux Maix liak. 4 Mawh kheu Maix mawh dee deuh aux rhawm, taoh aux lih khaing daux kie pa taong kix ka aux liak. 5 Siyiex pa kaux sijax eue, aux tawx ju tix ka MaixRef 31:5 Luk 23:46. mai taoh aux liak. 6 Aux koeng ka pui pa krub ka pa giex going, phan mawh aux, deuh rhawm ka Siyiex heue. 7 Aux tak koe krax gaux rhawm gaux rhi, ka krax caux rhawm Maix mai Maix jhak ka pa hot sibhawm aux mai Maix hoik yaox ka ju aux pa kha rhawm heue. 8 Maix ang tawx aux ka tawm taix pui pa koeng ka aux khankix mai Maix kieh caong aux cung ka dee vieh va heue. 9 Siyiex eue, caux rhawm ka aux, mawh kheu hoik hoek krax pa khi rhawm mai ngai aux rhawm aux mai vaig aux kied tug kheu pa khi rhawm aux heue. 10 Aux hoik dawd ju, mawh kheu khi rhawm aux, aux ngia ku num mai riang rao aux rau hu mai si-ang aux graig hu kheu phimap heue. 11 Mawh kheu pui pa koeng ka aux khankix, salao ka aux mai paox plawg aux mai paox meed aux khankix kawx, seeing brai ka aux heue. Pui pa yaox ka aux hawt krax kawx lhat mai to heue. 12 Kix hoik pi awm aux mai ang lai doh keud ka aux, awm pui pa hoik yum tix kaux mai kix deuh aux awm diang aw caox heue. 13 Aux mhong lox pa salao pui grawng aux mai ceu pa lhat graung koe ku plak, kix khrawm ti yuh cub caw mai kum paox tix, keud ti sang teei ju aux yum heue. 14 Viang mawh kawx nan, Siyiex eue, aux deuh rhawm ka Maix heue. Aux krai yuh nin, Maix mawh Siyiex aux heue. 15 Bawg yam aux koe daux tawm taix Maix mai taoh aux luan khaing ka daux tawm taix pui pa koeng ka aux mai pui pa tuktiaktukte ka aux khankix liak. 16 Kieh pakngai Maix jhan riang ka piang aux liak, kieh bwanson krax pa caux rhawm Maix taoh aux liak. 17 Siyiex eue, aux rawg bwan ka Maix, paw lai kieh aux koe krax pa kaig tua liak, kieh pui pa caox caig khankix, hoek krax pa kaig tua mai kieh glaik tix daux meung yum liak. 18 Pui pa ting rhawm lhaong ngai, pui pa yuh pa ang cee ang cag, ang nab ang yam, pui pa ah lox map lox tiex ka pui pa rahsee khankix mai pui pa koe siyieb jheeh pa chix ling tix ah lox bied khankix, kieh yiien yawg liak. 19 Bwanson pa hoik priex Maix son pui pa lhat graung ka Maix, pa hoik cox Maix son pui pa deuh rhawm ka Maix, sivoe ngai kawn pui mhawm miex ding? 20 Maix hoik teei tix mox kix daux tawm taix tix mai kieh kix luan khaing pa nieb yuh pui pa koeng khankix, Maix priex kix daux nyiex bwan Maix mai kieh kix luan khaing jheeh pa simah simiang heue. 21 Kieh Siyiex koe bwanson liak, grawh grawng nawh, Maix hoik jhi krax moh krax rhawm pa daox am ka aux, ka daux veng Maix pa kaux cong heue. 22 Aux lhat graung sivoe ngai Maix, mawh kheu ce aux Maix hoik tik ka tix, viang mawh nan, yam kok yo aux ka Maix mai yam rawg aux bwan, Maix nghiet ka lox aux heue. 23 Pui pa singax singeh khankix eue, moh ka Siyiex heue. Siyiex kia ngien ka pui pa kaux sijax khankix mai deeh tawx phimap tom nie ka pui pa ting rhawm khankix heue. 24 Pui pa deuh rhawm ka Siyiex khankix eue, teei riang rao mai kieh koe rhawm kwa rhawm vao heue.