1 Siyiex eue, aux yaogyaw ka Maix, mawh kheu taoh Maix aux mai Maix ang kieh pui pa koeng khankix, gaux rhawm gaux rhi ka piang aux. 2 Siyiex aux eue, aux kok yo ka Maix mai Maix kieh aux nyawm rhawm heue. 3 Siyiex eue, Maix hoik taoh aux lih khaing daux meung yum mai ang kieh aux hoek ka daux simeeig mai hoik kieh ju aux nyawm rhawm heue. 4 Pui pa singax singeh Siyiex khankix eue, rhax lai yaogyaw ka Nawh mai yaogyaw ka ceu kaux Nawh Cao pa singax singeh heue. 5 Krax pa song rhawm Nawh, mawh tivud khaing mai bwanson pa mhawm Nawh koe leeing ju mai pa yiiem pa grai mawh tix sawm khaing mai krax gaux rhawm gaux rhi tak hoek plak ponngawb heue. 6 Yam mhawm ot mhawm koe aux, aux ah nin, “Aux ang doh khi rhawm. 7 Siyiex eue, gawng dee ot aux kaux cong mawh kheu bwanson Maix, phan Maix veeh pakngai tix khaing aux, aux hoek krax kha rhawm heue. 8 Siyiex eue, nghiet ka lox pa rawg mhaing aux ka Maix liak. 9 Phan aux laig ka daux simeeig koe bwanson yuh ka mawx? Phawng tiex tak yaogyaw ka Maix lie? Nawh tak plak jhi sijax mukheu Maix lie? 10 Siyiex eue, nghiet ka lox aux mai caux rhawm teem aux liak, Siyiex eue, aux kok yo ka Maix teem ka aux liak. 11 Yam an krax khi rhawm aux, Maix kieh mawh krax graoh thiao mai Maix peeik ti tik kraung ceep pa khi rhawm aux mai deeh tawx kraung ceep pa gaux rhawm gaux rhi heue. 12 Mawh kheu in, phan aux ang yaogyaw ka Maix, aux ang doh pon ot, Siyiex aux eue, aux rhax lai yaogyaw bwanson Maix jheung jheung leeing ju heue.”