YAOGYAW 28
1 Siyiex mawh rang ting aux, aux kok yo ka Maix, paw lai yuh ti ang pawk lox aux liak, phan Maix ang pawk ka lox aux, aux awm kix pui pa lih hu ka daux simeeig heue.
2 Nghiet ka lox aux, yam kok yo aux ka Maix mai yam yaog aux taix tix daux lawg dee kied singax singeh heue.
3 Paw kieh aux hu tau mai pui pa caox caig khankix mai pui pa yuh pa ang rahsee khankix mai pui pa ah lox bied ka paox plawg mai pa keud ceu pa ang mhawm ka daux rhawm khankix heue.
4 Deeh tawx ka kix, awm pa hoik yuh kix, Ref 28:4 Jhi 22:12. deeh tawx pa caox ka kix, awm pa hoik yuh kix pa caox mai tawx ka kix, awm pa hoik yuh kix ka taix tix, prawng ca ka kix awm phimap pa yuh kix heue.
5 Grawh grawng nawh, mawh kheu kix map ka pa hoik yuh Siyiex mai khaix taix pa hoik yuh Siyiex khankix, Nawh Cao ang kieh kix kaux cong mai yieh kix laux leeing heue.
6 Kieh Siyiex koe bwanson liak, mawh kheu hoik nghiet Nawh lox pa rawg mhaing aux heue.
7 Siyiex mawh riang rao aux mai pa tiebtie aux, aux deuh rhawm ka Nawh mai Nawh teem ka aux, mawh kheu in, aux tom gaux rhawm gaux rhi mai rhax lai yaogyaw min plakngai Nawh Cao heue.
8 Siyiex mawh riang rao pui Nawh mai Cao pa taoh, kieh kaux cong ka kaw pa hoik groi Nawh rawm bee heue.
9 Taoh ka pui Maix khankix mai tawx sinngao son Maix ka kix liak, kia ngien ka kix mai yaog kix ting lhaong jheung jheung leeing ju liak.