1 Siyiex mawh pa riang aux mai Cao taoh aux, aux sang lhat ka pui mawx? Siyiex mawh riang rao son ju aux, aux sang lhat ka pui mawx? 2 Yam hoek pui pa caox caig mai pui pa koeng, pa deuh phimap ka aux khankix, kiied ti ih nex aux mai kix sideeing caong mai goh heue. 3 Viang pui naing khankix yuh tab kawx, aux ang lhat, viang kix viex kru naing mai hoek ti puing ka aux kawx, rhawm aux kaux cong kheu aux deuh rhawm ka Siyiex heue. 4 Aux rawg tix ceu ka Siyiex, yam kawn im ju aux, sonsang pon aux ti ot ka daux nyiex Siyiex mai sonsang yaox min plakngai pa mhawm grang Siyiex mai aux sawg sonsang yaox ti ot ka daux nyiex bwan Nawh heue. 5 Grawh grawng nawh, yam hoek krax khi rhawm, Maix tieb tie aux ka daux nyiex gox bwan mai Maix mox aux ka daux nyiex bwan Maix mai Nawh Cao deuh aux ka piang rang ting heue. 6 Yam in hoik yaog kaing aux ka piang pui pa koeng pa rob vung viang aux khankix, mawh kheu in, aux gaux rhawm gaux rhi mai tan ka daux nyiex bwan Maix, tak rhax lai mai ah lai rhax yaogyaw ka Siyiex heue. 7 Siyiex eue, nghiet ka lox pa kok yo aux liak, caux rhawm ka aux mai pawk lox aux liak. 8 Yam ah Maix nin ka aux, sawg pakngai Aux mai daux rhawm aux ah nin, Siyiex eue, aux sawg pakngai Maix heue. 9 Paw lai mox pakngai Maix khaing aux liak mai yam song rhawm song rhi Maix, paw lai tik aux liak, grawh grawng nawh, awm pa hoik sax teem Maix ka aux, paw lai tik vud ka aux mai teem aux liak. 10 Viang miex keeing aux prah ka aux kawx, Siyiex ang prah ka aux mai priex ka aux heue. 11 Siyiex eue, jhi daux krax Maix mai gau thong aux hu ka daux krax Maix pa rahsee, mawh kheu pui pa koeng ka aux heue. 12 Paw lai kieh aux hoek ka daux tawm taix pui pa koeng ka aux khankix, grawh grawng nawh, pui pa kham sakse pa ang mawh meh mai pui pa ting rhawm, pa tuktiak tukte ka aux khankix sang lah cha ka aux heue. 13 Phan aux ang koe krax yum rhawm ka bwanson Siyiex aux ang yaox ti ot dee ot kix pa im ju heue. 14 Keut pot jun pot ka Siyiex, teei riang rao mai viex rhawm kwa tix keut pot ka Siyiex heue.