1 Kawn simex aux eue, veeh yhaok maix nghiet ka lox tawm pingnya aux mai priex ti hawt ka lox satix pa tawx aux awx. 2 Siyieb jheeh maix gau ka pingnya krax tawng yung mai kieh mawh pui pa chix priex rhawm rhi tix. 3 Grawh grawng nawh, siyieb jheeh bun coh kaux, lheu tie khaing rawm kaing hia mai lox nawh nyu khaing rawm bee heue. 4 Viang mawh nan, dee sidah nawh song khaing lhax ghin mai lawm khaing vaig lawm khawm ra plak heue. 5 Caong nawh lih hu ka daux krax dee yum mai can krax hu nawh chix hoek ka daux meung yum heue. 6 Son ang maix lai keud krax pa im ju, nawh tieh loh ka been tix sipie tom ang maix lai tawng tidtix heue. 7 Mawh kheu in, kawn simex aux khankix eue, nghiet ka lox aux awx. Paw tik ka lox pa lih khaing jheeh aux khankix heue. 8 Via maix hu khaing bun pa yuh nan tom singai, paw lai dex ka siviex nyiex ot nawh. 9 Phan ang mawh nan, min plakngai maix mai ju maix tak sang tawx ka kix pui pa caox khankix heue. 10 Pui tang ceu khankix, tak sang grum pon kraung khrai maix mai kraung khrai pa yuh pa pon maix khankix, tak hoek ka daux nyiex pui tang ceu khankix heue. 11 Dee sidah nawh deeh klih rhawm ka yam yaox nawh laux rham tokaux nex nham tix, kheu ang nawh nghiet ka lox sidiex gau. 12 Aux hoik koeng ka ceu pa sidiex gau pui ka aux, daux rhawm aux hoik yuh pa ang cee ang cag ka lox sidiex pui lie? 13 Lox sara khankix kawx, aux ang nghiet mai aux ang nghiet ka lox pa sidiex pui khankix ka aux yuh nin lie? 14 Aux hoik luan yuh pa caox ka sinax pui hun khawmuik mai tak ah lox ngia tix heue. 15 Shiao ka aw rawm maix mai nyaux ka rawm pa lih khaing rawm daux maix awx. 16 Rawm keut cie maix kieh lih tom nie mai bla awm lih rawm klawng hawt krax. 17 Paw kieh mawh khawm cie pui tang ceu, kieh mawh son maix nong. 18 Rawm keut cie maix kieh mawh rawm pa koe bwanson son maix, gaux rhawm gaux rhi mai moeng pa hoik teei maix yam kawn awn ju maix khaing awx. 19 Kieh mhawm grang, awm cak miex mai poh miex pa khaw ti moh mai teeh nawh tawx pa lo maix grum naog jheung jheung heue. Moh ka kiex mai fah rhawm heue. 20 Kawn simex aux eue, mawh kheu patix maix lai yoek tau mai bun pa ang mhawm been yuh ka mawx? Maix hu kawm naok bun coh kaux yuh ka mawx? 21 Krax hu kawn pui khawmuik hoik sidawng sivoe ngai Siyiex mai Nawh Cao jhak ka krax hu kix khawmuik heue. 22 Pui caox pa nieb yuh khankix, phimap pa caox pa yuh kix deeh giex ka kix mai tak sang kham geu ka pa phyawk maox phimap ka tix heue. 23 Mawh kheu nawh kied kwa mai lud lawlawx, ang pon lox sidiex gau mai tak yaox ti yum heue.