1 Kawn simex aux khankix eue, sonsang tawng pex ka krax cuyi pingnya nghiet ka lox tawm pa sidiex gau keeing mhawm mhawm awx. 2 Aux hoik tawx lox sidiex pa mhawm ka maix, paw lai tik ka lox tawm beenli aux khankix. 3 Phan mawh aux, mawh sok rhawm keeing, pa awn pa tiiem sivoe ngai pa kied moh miex tix kaux heue. 4 Keeing aux sidiex gau mai ah nin ka aux, “Sau ti priex lox aux ka daux rhawm maix mai priex ti hawt gumlox tawm beenli aux mai im ju awx.” 5 Sawg pingnya awx, sawg pingnya pa tawng pa yung awx. Paw piawm yuh satix, paw lai via hu khaing lox pa lih khaing daux jheeh aux. 6 Paw tik ka cuyi pingnya, nawh tak priex maix heue. Moh ka nawh awx, nawh tak teem ka maix heue. 7 Pingnya mawh ceu pa ting lhaongheue. Sawg pingnya awx, sawg pingnya khaing sawg kraung khrai awx. 8 Deuh nawh mawh pa ting lhaong, nawh tak yaog maix ting lhaong heue. Phan maix kawm nawh, nawh tak tawx min plakngai ka maix heue. 9 Nawh tak fua lawk kaing pa mhawm grang ka kaing maix mai tak tawx mhok khri min plakngai ka maix heue. 10 Kawn simex aux eue, priex mai nghiet ka lox aux awx, phan yuh nan maix tak nie lang ju heue. 11 Aux tak jhi pingnya ka maix mai aux thong maix hu ka daux krax pa mawh meh heue. 12 Phan maix hawt hu, ang lai hoek krax pa sikhawp, yam to maix, caong maix ang lai sideeing, ang lai goh. 13 Jhawp kaux ka lox tawm pa sidiex aux, paw ploi, paw man, priex mhawm mhawm, grawh grawng nawh, mawh krax pa im ju son maix heue. 14 Paw laig ka daux krax pui pa ting rhawm ca nyhau khankix mai paw hu tau mai pui pa caox khankix heue. 15 Via hu khaing krax pa hu kix, paw lai hawt khaix kix, via hu khaing kix awx. 16 Phan kix ang yaox ti yuh phimap ka pui, kix ang nyawm it, phan kix ang pon ti yuh pui tix kaux kaux goh, kix ang chix laig it heue. 17 Kix ih blah pa dex dawd mai ceu pa caox mai nyaux rawm plix siiet pa dex dawd mai pa tuktiak heue. 18 Krax pui rahsee khankix, awm bah riang praix, tom lih singaix mai lih jhan pa riang sipie heue. 19 Krax pui pa ang rahsee khankix, awm pa faik mai yam goh kix, ang tawng ka ceu pa sideeing caong kix heue. 20 Kawn simex aux eue, nghiet lox aux mai sau can lox pa sidiex aux ka daux yhaok maix awx. 21 Paw kieh gwieh hu khaing sivoe ngai maix, priex ti deuh ka daux rhawm rhi maix awx. 22 Grawh grawng nawh, pui pa yaox ka beenli ceu an khankix, mawh pa im ju mai krax nyawm ot ka son tokaux kix heue. 23 Mawh kheu sok rhawm maix, mawh jaong num riah pa im ju, priex sok rhawm maix khaing kuceu khawmuik heue. 24 Via hu singai khaing pa ang rahsee mai siyieb jheeh pa chix thong thiang khankix heue. 25 Kieh ngai maix jhak sivoe rahsee mai siyieb ngai maix kawx kieh jhak sivoe rahsee heue. 26 Keud krax pa hu caong maixRef 4:26 He 12:13. mhawm mhawm mai kieh can dee hu maix kieh koe pa nhim heue. 27 Paw lai gaing hu plak gwiex plak dawm mai via hu khaing krax pa caox caig heue.