1 Pui hoik kham ka lox sidiex gau lawlawx kawx mai kieh ngawg tix kiien, ang koe dee deuh rhawm mai tak laux leeing dom mawx dom an heue. 2 Yam giex pui rahsee kaing, pui haktiex chix gaux rhawm heue. Yam giex pui ang rahsee kaing, pui haktiex khi rhawm heue. 3 Pui pa moh ka been pingnya, chix kieh keeing tix gaux rhawm mai pui pa yuh paox pie mai bun coh kaux, chix kieh kraung khrai som nai heue. 4 Simiang pa chix prawng see hawt been, chix kieh haktiex kaux cong heue. Simiang pa ih mau chun praok chix kieh haktiex glup laux heue. 5 Pui pa chix nyaw glaw ka paox plawg, awm nah ti deuh rub son caong tix heue. 6 Daux krax pa hu pui caox pa lud, hoik taong ti deuh jhawk, phan mawh pui rahsee, chix ah lox rhax gaux heue. 7 Pui rahsee, chix keud son pui hot sibhawm, phan mawh pui pa ang rahsee, ang lai yuh tix tawng ka grawng ceu an heue. 8 Pui pa yuh pa ang cee ang cag khankix, chix gleeing ti tik ka veng heue. Phan mawh pui pa koe pingnya, chix via hu khaing krax pa song rhawm. 9 Phan pui pa koe pingnya, yuh see ka pui caox, nawh song rhawm ang ah, nawh nyia ang ah, ang chix kieh khaw paox tix. 10 Pui pa chix plaux ju pui yum khankix, koeng ka pui grum mhawm, phan mawh pui rahsee, chix priex ka ju pui tang kaux heue. 11 Pui caox chix jhi ka ceu pa keud nawh khawmuik, phan mawh pui pa koe pingnya, chix mox yiien tom hoek singaix krai heue. 12 Phan simiang nghiet ka lox pa pie lhen, siliex pa yuh kaing greem tak sang lih mawh pui caox khawmuik heue. 13 Pui hot sibhawm mai pui kham pa tuktiak sipub paox tix, Siyiex caux rhawm mai tawx pa riang ka ngai kiex heue. 14 Simiang, pa prawng see rahsee, ka pui hot sibhawm, dang ngeung nawh kaux cong jheung jheung heue. 15 Pui pa yaox tix sivied ka khaox saux mai yaox ti kham ka lox pa sidiex gau, chix ting lhaong pingnya heue. kawn nyawm pa tang yuh alo tix, mawh pa chix kieh miex tix kaig tua heue. 16 Yam haoh pui pa ang rahsee, phimap pa cha nie luan yuh kawx haoh heue. Viang mawh nan, pui rahsee khankix, yaox ka pa laux leeing kix heue. 17 Sidiex gau ka kawn simex maix awx. Phan yuh nan, nawh tak kieh maix nyawm rhawm, lheu khaing in, nawh tak kieh rhawm maix gaux rhawm heue. 18 Phan ang koe lox plak jhi kawn pui hoek krax laux leeing heue. Pui pa priex tix hawt lox tawm beenli Siyiex, koe bwanson heue. 19 Sidiex gau lox giex, ka siliex ang pex ang pon, viang nawh hoik tawng kawx, ang nghiet mai ot giex heue. 20 Phan koe pui pa ang koe satix mai haoh lox sikah, pa krox jun pui caox nie lheu mhawm khaing pa krox jun nawh heue. 21 Siliex pa teei pui tix eei, tom yam iak nawh mhawm mhawm, sidah khaix pon tix mawh awm kawn lih tix heue. 22 Pui pa yie song rhawm, chix cheeik kieh pui simah heue. Pui pa dawd rhawm khankix kawx, lih mawh pa cha nie luan yuh heue. 23 Krax pa ting rhawm maix, tak yeen tokaux maix hoek dee tiem, phan mawh pui pa tiem rhawm tiem rhi, tak pon min plakngai heue. 24 Pui pa yuh paox mai pui briex, mawh pui pa koeng ka ju tix heue. Viang nawh mhong lox pa jhax lawg miex ding kawx, ang koe ceu pa jhi tix ceu kawx. 25 Ceu pa lhat ka kawn pui, chix taong jhawk, phan mawh pui pa deuh rhawm ka Siyiex, tak luan khaing krax khi rhawm heue. 26 Kawn pui khankix, chix sawg ti yuh pa khaw rhawm simiang, viang mawh nan, Siyiex chix mawh cao prawng ca see kawn pui heue. 27 Pui rahsee, seeing ka pa ang rahsee mai pui pa ang rahsee, seeing brai ka pui pa priex tix hawt beenli pa rahsee heue.