1 Pui pa ang rahsee, viang ang pui pheet kawx, nawh yuh lung to heue. Phan mawh pui rahsee, kwa awm sivai sangsi heue. 2 Simiang lih haoh, kheu phimap pui haktiex, haktiex chix kaux cong, kheu pui pa grum mai: pingnya krax tawng yung heue. 3 Pui hot deeh tuktiak ka paox pui hot, ang lai kieh deuk ceeix kawx, awm pa si kheet rawm raoh lhiex heue. 4 Pui pa preet ka been pa rahsee, nawh chix yaogyaw ka pui pa ang rahsee mai pui pa hawt ka been pa rahsee khankix, tak gwieh tix tang plak khaing kix heue. 5 Pui pa ang rahsee khankix, ang tawng been krax prawng ca, phan mawh pui pa sawg ka Siyiex, chix tawng ka been krax prawng ca khawmuik. 6 Pui hot sibhawm, pa hawt ka been pa rahsee, nie lheu mhawm khaing pui pa pon mau mai yuh tix pa ang khaw caw heue. 7 Pui pa chix priex tix hawt ka lox tawm beenli, mawh kawn pa koe pingnya heue. Pui pa yuh paox pie ka pui pa cha nie luan ih, chix kieh keeing tix kaig tua heue. 8 Pui pa ang rahsee, pa teei ti ih rao mau ka daux pa ang rahsee mai pa mi pa koe, mawh pui pa priex mau son pui caux rhawm ka pui hot sibhawm heue. 9 Pui pa ang nghiet mai veeh hu khaing pa sidiex lox tawm beenli, viang nawh rawg bwan kawx, mawh pa seeing heue. 10 Pui pa nyaw pa glaw ka pui rahsee, kieh lud krax hu pa ang mhawm, nawh tak rau ka daux tiex pa kaong tix heue. Pui pa rauh daux rhawm, tak pon sin pa mhawm heue. 11 Pui pa mi koe, chix keud tix mawh pa koe pingnya, phan mawh pui hot pui sibhawm pa koe cuyi pingnya, chawk cheng tix yaox ka nawh heue. 12 Yam gaux rhawm pui rahsee, pon min plakngai pa kied ting heue. Yam yaog pui ang rahsee ting, pui khankix glaik mox tix heue. 13 Pui pa kheem ka phimap tix, ang lai pon pa mhawm, pui pa doh keud ti tik ka phimap tix nawh tak pon krax caux rhawm Nawh Cao heue. 14 Pui pa lhat graung jheung jheung koe bwanson heue. Phan mawh pui pa kiien rhawm, tak yaox ceu pa lhat pa khi rhawm heue. 15 Simiang pa caox pa ang mhawm, pa giex piang pui hot sibhawm khankix, awm graox sivai sangsi mai krih pa lailing heue. 16 Simiang pa ang koe pingnya, chix tuktiak ka pui mai simiang pa koeng ka pa ang rahsee, nawh tak lang ju heue. 17 Pui pa plaux ju pui yum, kieh to hu ka daux simeeig, paw kieh pui mawx tiebtie tix kaux kawx. 18 Pui pa hu ka daux krax pa rahsee, tak luan khaing krax khi rhawm mai pui pa hu ka daux krax pa kawk vawk, tak goh dom mawx dom an heue. 19 Pui pa yuh ma kaung tak yaox tix sawm sak mai pui pa ot giex, tak hot piang hot heue. 20 Pui pa kaux sijax khankix, tak pon bwanson pa grum naog heue. Viang mawh nan, pui pa coca ka sonsang pon mau, ang pon luan khaing krax pa ciyang heue. 21 Ang khaw tix kham ka plakngai pui, grawh grawng nawh, kawn pui yuh phimap jao sang pon blah tix pliah heue. 22 Pui pa coca tix sawg ka mau khri, chix boh rhawm pa caox mai ang tawng ceu pa sang hoek krax pa hot sibhawm khaix. 23 Pui pa ah, pa sidiex ka pui phimap, sidah khaix sax, nawh nie lheu ting bwanson khaing pui pa chix ah lox nyaw glaw ka pui heue. 24 Pui pa tud rhim ti teei kraung khrai miex keeing tix mai ah ang koe phimap, mawh pui pa yuh paox pie ka pui pa chix yuh laux heue. 25 Pui pa ting rhawm, chix thong krax pa simah, phan mawh pui pa deuh rhawm ka Siyiex, chix grum naog kuceu heue. 26 Pui pa deuh rhawm ka rhawm tokaux tix, mawh pui caox heue. Pui pa priex tix hawt ka pingnya satix, luan khaing krax khi rhawm heue. 27 Pui pa chix gwieh tix tawx ka pui hot sibhawm, tokaux nawh ang lai hot sibhawm mai pui pa via hu khaing pui hot sibhawm khankix, tak yaox ti kham geu pa jhax lawg heue. 28 Yam yaog pui ang rahsee ting, pui khankix glaik mox tix heue. Yam hoek kix krax laux leeing, pui rahsee khankix, pre haoh hun heue.