1 Lox pa awn pa tiem kieh rhawm pui deeh nyawm rhawm, lox sikah pa riex mawh pa chix kieh pui song rhawm heue. 2 Dak pa koe pingnya, chix kieh pui tawng pingnya, jheeh pui caox khankix, chix hieh pa caox lih heue. 3 Ngai Siyiex koe kudah dee mai jhak ka pa mhawm mai pa ang mhawm heue. 4 Dak pa awn mawh khaox pa im ju mai dak pa riex mawh pa chix kieh rhawm pui saux heue. 5 Pui caox khankix, deuh lox sidiex gau keeing ang koe cee cag mai pui pa nghiet ka lox sidiex gau khankix, mawh pui pa chix priex rhawm satix heue. 6 Ka daux nyiex pui rahsee khankix, sinngao koe tom nie heue. Gha pon pui pa ang rahsee khankix, hoik nie mai krax pa sung sang rhawm nawh heue. 7 Siyieb jheeh pui pa koe pingnya, chix gwieh tix tawx pingnya krax tawng yung ka pui heue. Viang mawh nan, pingnya ang koe ka daux rhawm pui caox. 8 Siyiex seeing ka krax tan pui pa ang rahsee khankix. Siyiex khaw rhawm ka lox rawg bwan pui rahsee khankix heue. 9 Siyiex seeing ka krax pa hu pui ang rahsee khankix mai Nawh moh ka pui pa hawt daux krax pa rahsee khankix heue. 10 Pui pa lud krax hu khankix, ang rhawm nghiet ka lox sidiex gau, pui pa koeng ka lox pa deuh phimap khankix tak yum tete heue. 11 Meung yum mai meung laux leeing kawx, hoik sidawng sivoe ngai Siyiex, lheu khaing in, nie lheu sidawng ka daux rhawm kawn pui miex ding? 12 Pui pa yuh pa ang cee cag khankix, ang lai moh ka lox pa sidiex gau, ang pon ot dex pui pa koe pingnya heue. 13 Rhawm pa chix gaux rhawm, chix tawx pakngai heue. Rhawm pa khi rhawm chix kieh pui laux rhawm heue. 14 Rhawm pui pa mhawm pingnya krax tawng yung, chix sawg ka pingnya heue. Jheeh pui caox khankix, moh ka pa caox heue. 15 Singaix cie pui hot sibhawm khankix, mawh pa caox ku singaix mai rhawm pui pa gaux rhawm khankix, mawh pawie gaux rhawm jheung jheung heue. 16 Pui pa lhat graung ka Siyiex, viang koe sinngao, mau khri ceeix khaing kawx, nie lheu mhawm khaing pui pa mi koe khawm ot tix mai sivix rhawm tix heue. 17 Phan ih taux klai giex tix brie ka daux krax moh, nie lheu mhawm khaing ih nex mawie tang pa kluing pa bee khawm mu, ka daux pa ang koe krax moh heue. 18 Pui pa ting rhawm khankix, chix kieh krax simah lih heue. Pui pa chix gun yeung khankix, chix kieh krax simah yiien heue. 19 Daux krax hu pui pa nieh khankix, awm vie pang kat pa tie krax, viang mawh nan, khaix hu pui rahsee khankix, awm krax ting heue. 20 Kawn simex pa koe pingnya, mawh pa gaux rhawm son keeing heue. Phan mawh kawn simex pa caox, ang kieh miex tix koe cee koe cag heue. 21 Pui pa ang koe pingnya krax tawng yung, chix gaux rhawm ka daux kaing pa caox heue. Pui pa koe pingnya krax tawng yung, chix gaux rhawm ka daux kaing pa rahsee heue. 22 Kaing ceu pa ang rom ti kum tau, chix laux heue. Kaing pa rom ti kum yuh tau chix kaux cong heue. 23 Pui pa koe krax gaux rhawm, ka lox pa deeh ah nawh, lox pa krai pa khaw mai bawg yam, nyawm tix nghiet miex ding? 24 Krax im ju pa hawt pui pa koe pingnya, chix via khaing meung yum plak greem mai chix thong haok plak piang dee lhaong heue. 25 Siyiex, tak yieh laux nyiex pui pa ting rhawm, phan mawh gwang dee ot miexmai tak kieh kaux cong heue. 26 Siyiex seeing ka krax pa keud pui pa ang rahsee khankix mai Nawh Cao khaw rhawm ka lox pui pa singax singeh khankix heue. 27 Pui pa sawg sinngao, mau khri ka daux pa ang rahsee khankix, chix kieh kawn nyiex ma tix khi rhawm heue. Pui pa koeng ka totaix pa ang rahsee khankix, tak pon ju pa nyawm rhawm heue. 28 Pui rahsee khankix, chix keud gau ka lox pa sang deeh pawk ka pui heue. Jheeh pui caox khankix, chix krai lox pa caox heue. 29 Siyiex singai khaing pui pa ang rahsee khankix mai Nawh nghiet ka lox rawg bwan pui rahsee khankix heue. 30 Pa riang ngai ex, chix kieh rhawm ex gaux rhawm heue. Lox pa gaux rhawm kawx, chix kieh gua si-ang naog heue. 31 Pui pa nghiet ka lox pa sidiex gau pa dex mai ju, tak pon tix ot tau mai pui pa koe pingnya heue. 32 Pui pa thiang ti tik ka lox sidiex gau khankix, yuh pa ang cee ca? ka ju khwan tix heue. Viang mawh nan, pui pa chix nghiet ka lox pa sidiex gau khankix, chix pon pingnya krax tawng yung heue. 33 Rhawm pa lhat graung ka Siyiex mawh krax pa gau pingnya heue. Krax pa awn rhawm awn rhi koe sivoe ngai min plakngai heue.