1 Bun pa koe pingnya, chix priex nyiex ma tix mhawm mhawm. Bun pa caox pa ang koe pingnya chix yieh ti tik nyiex ma tix ka taix tix heue. 2 Pui pa hawt krax rahsee, chix lhat graung ka Siyiex.Pui pa hawt krax pa kawk vawk khankix, chix yuh pa ang cee ang cak heue. 3 Ka daux jheeh pui caox khankix, koe saux son pa ting rhawm kix heue. Ka daux jheeh pui pa koe pingnya, chix taoh ka pui heue. 4 Kawg mawie pa ang koe mawie mhaing, singax heue. Viang mawh nan, pui chix pon mau khri tom nie ka riang rao mawie heue. 5 Pui pa kham sakse pa kaux sijax, ang chix pie lhen, pui pa kham sakse pa ang kaux sijax, chix pie lhen heue. 6 Pui pa nieb yuh pa ang cee cag, sawg pingnya kawx ang yaox, pui pa koe pingnya krax tawng yung khankix, yie tix sawg heue. 7 Phan maix yaox pui caox, phan maix hoik tawng grawng mawh nawh pui ang koe pingnya, via hu khaing nawh heue. 8 Pingnya mai pui pa koe pingnya satix khankix, nawh tawng ka krax hu tix mai krax caox pui caox khankix, mawh pa pie lhen heue. 9 Pui caox khankix, chix yuh phimap pa ang cee cag mai pui rahsee khankix, chix yuh bwanson ka paox tix, tix kaux lai tix kaux heue. 10 Rhawm pui tang tawng krax kha rhawm tokaux tix, rhawm pui pa gaux rhawm ang chix dex dawd ka pui tang kaux. 11 Nyiex pui pa ang rahsee chix goh heue. Nyiex gox pui rahsee khankix chix pruh riang heue. 12 Krax keud kawn pui viang awm pa mawh meh kawx, dee sidah tawx krax yum heue.Ref 14:12 Kab 16:25. 13 Kawn pui, yam nyiah kawx, daux rhawm nawh chix khi heue. Krax nyiah, krax gaux rhawm, dee sidah chix lih mawh krax voi rhawm heue. 14 Pui pa koe rhawm pa tieh feen ang ah, pui pa mhawm ang ah, tak sak ka pa yuh tix heue. 15 Pui pa ang koe krax keud krax gau pa ang koe pingnya khankix, yie yum rhawm ka lox pa krai pui mai pui pa koe pingnya satix khankix, chix jhak ka krax pa hu tix mhawm mhawm heue. 16 Pui pa koe pingnya chix lhat chix graung mai via hu khaing phimap heue. Pui caox khankix, ting rhawm mai koe rhawm kwa heue. 17 Pui pa dawd rhawm khankix, chix yuh ceu pa kied caox, pui pa keud ceu pa ang mhawm khankix, tak yaox ti kham ka pa koeng pui heue. 18 Pui pa ang koe pingnya krax keud krax gau khankix, chix pon sin pa caox mai pui pa koe pingnya satix, tak yaox tix ceep mhok khri pingnya krax tawng yung heue. 19 Pui caox khankix, tak grux ngawng tix krub sivoe ngai pui pa mhawm khankix, pui pa ang rahsee khankix, tak grux ngawng tix krub ka diang siviex nyiex pui rahsee khankix heue. 20 Pui hot sibhawm khankix, tak yaox ti kham ka pa koeng paox plawg tix mai pui pa pon sawg mau khri tom nie khankix, haoh paox pie heue. 21 Pui pa nieb yuh pa ang cee cag ka paox plawg nawh, koe phimap mai pui pa caux rhawm ka pui hot sibhawm khankix, koe bwanson heue. 22 Pui pa keud ka ceu pa ang mhawm khankix, chix lud krax heue. Pui pa chix keud ti yuh bwanson ka pui, pon bwanson krax caux rhawm pa kaux sijax heue. 23 Pa coca ti yuh kaing kuceu koe bwanson mai ceu pa haoh lox sikah mawh pa hot sibhawm khaing heue. 24 Sinngao, kraung khrai, pui pa koe pingnya mawh mhok khri min plakngai, pa yuh pui caox khankix, mawh ngie ceu pa caox khaing. 25 Sakse pa mawh meh, mawh pa chix taoh ka ju pui, sak se pa ang mawh ang meh, mawh pa shiao ka lox pa pie lhen heue. 26 Krax pa lhat graung ka Siyiex, mawh riang rao dee deuh rhawm pa kaux, kawn simex nawh khankix, tak pon dee laux dee deuh rhawm heue. 27 Krax pa lhat ka Siyiex, mawh rawm keut pa im ju, pa luan khaing jhawk krax yum heue. 28 Simiang yaox ti giex kaing pui haktiex tom nie, koe min plakngai heue. Simiang pa yaox ti giex kaing pui haktiex pa tux pa iak, min plakngai kawx iak heue. 29 Pui pa lang rhawm rhi khankix, ting pingnya mai pui pa dawd rhawm khankix rhawm kix nie caox heue. 30 Rhawm pa nyawm ot, mawh pa kieh tokaux im ju mai pa bo rhawm mawh pa kieh si-ang rham heue. 31 Pui pa tuktiak ka pui hot sibhawm khankix, mawh pa salao ka Siyiex Cao pa phan pa deuh heue. Pui pa nab yam ka Siyiex khankix, chix caux rhawm ka pui hot sibhawm khankix heue. 32 Pui pa ang rahsee khankix, tak hoek krax laux leeing, kheu yuh kix pa ang rahsee, pui rahsee khankix tom yam yum kix kawx, kawn koe krax keud pot jun pot heue. 33 Pui pa koe pingnya krax tawng yung khankix, pingnya chix ot chix koe ka daux rhawm kix, ceu pa koe ka daux rhawm pui caox khankix, chix lih sidawng heue. 34 Ceu pa rahsee, mawh pa chix yaog pui haktiex ting lhaong, phimap mawh pa chix yeen pui haktiex hoek dee tiem heue. 35 Siliex pa koe pingnya, simiang chix yuh bwanson ka nawh heue. Siliex pa yuh krax kaig tua, yaox ti kham geu ka pa song rhawm heue.