1 Kawn praix Rubin mai kawn praix Gat khankix koe to brie tom haoh hun mai kix yaox haktiex Yaza mai haktiex Gilat, pa mawh dee mhawm rib riem son to brie tix, 2 tom hoek ah nin ka Mose mai cao giex kaing li Eliza mai ka cao kaing pui hun khankix ah nin, 3 “Atarok, Dibun, Yaza, Nimarax, Heshabon, Elale, Shebam, Nibo mai Beon, 4 can haktiex pa hoik pex Simiang Siyiex ka sivoe pui Isarelax khankix, mawh haktiex pa mhawm sonsang eei to brie mai siliex maix khankix hoik koe to brie tom nie.” 5 Kix ah nin, “Phan yix hoik mawh pa pon bwanson ka plak sivoe ngai maix, tawx haktiex in ka siliex maix khankix sonsang mawh sinngao cie yix mai paw viex yix luan ka plak toi rawm klawng Yawdan liak.” 6 Mose ah nin ka kawn praix Gat mai kawn praix Rubin khankix. “Glang hu puxaik pex khankix daux naing, mawh sang ngawm pex ti ot tin lie? 7 Pex lai sang kieh rhawm rhi pui Isarelax khankix ang koe rhawm kwa rhawm cong, sonsang tiang kix ti hu ka daux haktiex pa hoik tawx Simiang Siyiex ka kix yuh ka mawh? 8 Keeing pex khankix hoik yuh nawh awm in, yam ploi aux kix hu khaing Kadeshabanax, sonsang jhak tix ka haktiex an. 9 Yam hu kix ka daux ngawd Eshakawlax mai khaix hoik hu kix jhak ka haktiex an, kix kieh rhawm rhi pui Isarelax khankix, ang koe rhawm kwa rhawm cong, son ang kix laig ka daux haktiex pa hoik tawx Simiang Siyiex ka kix.Ref 32:8, 9 Si 13:17-33. 10 Yam an krax song rhawm Simiang Siyiex hoik lih mai Nawh Cao tiextu ah nin, 11 can pui pa kaoh khaing daux meung Ejiptux, pui pa hoik koe ju tixnga num haok ka piang, tak ang pon ti yaox ka haktiex pa hoik tiextu Aux ka Abraham, Icak mai Yakop tix kaux kawx, mawh kheu kix ang viex rhawm tix hawt khaix Aux, 12 mawh ngie Kaliep kawn simex Yephunie pa mawh ceu pui Keniet mai Yawsux kawn simex Nun khankiex pa pon ti yaox, mawh kheu kiex ra kaux hoik hawt khaix Aux khawm rhawm rhi tix. 13 Krax song rhawm Simiang Siyiex lih ka piang pui Isarelax khankix mai Nawh Cao kieh kix vung viang ka daux tiag tixpon num, tom sidah hoik laux leeing cub pui pa yuh pa caox caig khankix ka plak sivoe ngai Simiang Siyiex.Ref 32:10-13 Si 14:26-35. 14 Jhak heue, pex hoik kaoh tang keeing pex mai hoik baox pui pa koe phimap khankix, sonsang nie baox lih krax song rhawm Simiang Siyiex ka piang pui Isarelax khankix tom sigrien sigre. 15 Phan pex veeh ti hu khaing pa hawt grawng lawng khaix Nawh Cao, Nawh tak baox deeh prah pex ka daux tiag daux tu mai pex tak mawh pa yuh pui in khankix laux leeing.” 16 Kix hoek dex nawh ah nin, “Yix tak sang sum kawg son to brie tin mai yuh veng son kawn nyawm khankix, 17 mai tokaux yix tak sang giex kraung naing tix mai hu ka plak sivoe pui Isarelax khankix, tom hoik viex yix kix hoek ka dee ot kix, viang mawh nin kawn nyawm yix khankix tak ot ka daux veng pa kaux pa cong, kheu jao kawn koe pui pa ot baoh haktiex in. 18 Yix tak ang lai deeh ing ka nyiex ma tix, glang bawg yam ang kawn praix Isarelax ku kaux nyang bax pon ti rieb ka sinngao ti. 19 Yix tak ang teei ti cie sinngao pa koe toi rawm klawng Yawdan ka plak an tau mai kix, mawh kheu hoik caw sinngao cie yix ti koe ka plak lih singai rawm klawng Yawdan.” 20 Mose ah nin ka kix, “Phan pex yuh nin, khre rien kraung naing cao tix, ka plak sivoe Simiang Siyiex son naing, 21 kieh can kru naing pex khankix, tiang ka plak toi rawm klawng Yawdan, ka plak sivoe Simiang Siyiex glang ang Nawh Cao nyang grheu pui koeng Nawh Cao khankix khaing sivoe Nawh, 22 phan haktiex an mawh pa hoik pex tix ka plak sivoe Simiang Siyiex, khaix an pex tak pon ti deeh ing mai pex tak ang lai mawh pa koe krax deuh phimap ka plak sivoe Simiang Siyiex mai ka plak sivoe ceu pui Isarelax khankix, haktiex in tak mawh sinngao cie pex ka plak sivoe Simiang Siyiex. 23 Phan pex ang yuh nin, pex tak tawng ka hoik lud tix ka Simiang Siyiex mai phimap pex tak mawh pa hawt ka tokaux pex. 24 Sum veng khankix son kawn nyawm pex mai kawg yung son yung pex khankix mai yuh awm gumlox pa lih khaing daux jheeh pex.” 25 Kawn praix Gat, khawm kawn praix Rubin khankix ah nin ka Mose, “siliex maix tak yuh awm lox pa tawm maix cao simiang. 26 Kawn nyawm yix moeng yix khankix, cub yung yix mai to brie yix khankix khawmuik tak mawh pa ot ka daux veng haktiex Gilat tan. 27 Viang mawh nan siliex maix khankix, tak sang tiang toi plak an tau mai kraung naing ku kaux son naing ka plak sivoe Simiang Siyiex mai puing naing awm pa ah cao Simiang ex.” 28 Mawh kheu nan Mose kok cao giex kaing li Eliza mai Yawsux kawn simex Nun mai cao kaing doeh ru pui Isarelax khankix. 29 Mose ah nin ka kix, “Phan kawn praix Gat mai kawn praix Rubin khankix pa giex kraung naing ka plak toi rawm klawng Yawdan tau mai pex, sonsang puing naing ka plak sivoe Simiang Siyiex mai phan pex hoik pex ka haktiex an. Khaix an pex tak tawx haktiex Gilat mawh sinngao cie kix. 30 Viang mawh nan phan kix tiang toi plak an mai ang tix giex kraung naing tau mai pex, kix tak pon ti cie haktiex Khanan ka daux sinax pex.” 31 Kawn praix Gat mai kawn praix Rubin khankix deeh pawk lox ah nin, “Awm pa hoik ah Simiang Siyiex ka siliex maix khankix, mawh kheu nan yix tak yuh. 32 Yix tak tiang toi plak an mai giex tix kraung naing ka plak sivoe Simiang Siyiex, ka daux haktiex Khanan, viang mawh nan sinngao cie yix ka praok rawm klawng Yawdan plak in, tak mawh cie yix.Ref 32:28-32 Yaw 1:12-15. 33 Mose tawx meung Sihon cie simiang Amawrix mai meung Awgax cie simiang Bashan, khawm haktiex khawm veng khankix, pa hoik koe ka daux meung an khankix mai veng pa koe hawt vung viang mee haktiex an ka kawn praix Gat mai ka kawn praix Rubin khankix mai doeh ru Manashe kawn simex Yosiep tix plak. 34 Kawn praix Gat, sum veng Dibun, veng Atarok mai veng Araw, 35 veng Atarotsophan veng Yaza mai veng Yobehax, 36 veng Betnimara mai veng Betharan mawh veng pa kaux pa cong khawmuik mai kix sum kawg yung khankix. 37 Kawn praix Rubin sum veng Heshabon, veng Elale mai veng Kirayatin khankix, 38 veng Nebaw veng Balameon, ceu kaux veng in kiex hoik mawh pa deeh loh ti mawh pa khraox mai veng Shibamax khankix. 39 Ceu pui Makhirax kawn simex Manashe, hu ka veng Gilat mai rhim tix cie haktiex an mai grheu ceu pui Amawrix pa dawg ot daux haktiex an to. 40 Mose tawx veng Gilat ka ceu pui Makhirax kawn simex Manashe mai kix ot tan heue. 41 Ya-irax kawn praix Manashe hu rhim tix cie yaong Gilat khankix mai kok ceu kaux an kix mawh Havotya-irax. 42 Nawba hu rhim tix cie veng Kenat mai nyiex yaong khankix mai kok mawh Nawba hawt ceu kaux tix heue.