31
Pa Pawk Bix Ka Ceu Pui Midian
1 Simiang Siyiex ah nin ka Mose,
2 “Maix tak pawk bix ka ceu pui Midian tang pui Isarelax, maix tak khrawm tix tau mai cub pui maix.”
3 Mose ah nin ka pui khankix, “Khrawm pui naing ka daux pex tiblah sonsang yuh naing mai hu puing ka pui Midian khankix, sonsang pawk pex bix tix son Simiang Siyiex ka ceu pui Midian.”
4 Laug pui khaing daux doeh ru tix ceu tix rheng kaux, sonsang hu puing ka naing.
5 Kix khrawm pui naing khaing daux pui Isarelax pa koe kaing rheng kaing mheen mai khrawm pui khaing doeh ru kix ku cub, tix cub tix rheng khawmuik koe tix mheen ra rheng kaux sonsang puing naing.
6 Mose ploi kix hu daux naing tix ceu pui, tix rheng hu tau mai Phenahat kawn simex Eliza cao giex kaing li tau mai kraung naing pa singax mai teettawng pa sang phlu ka daux tawm taix nawh.
7 Kix puing pui Midian, awm pa hoik tawm Simiang Siyiex ka Mose mai pah simex ku kaux.
8 Kix pah simiang pui Midian phwan kaux, pa mawh Ewix, Rekin, Zurax, Hurax, Rebax, mai kix baox pah Balam kawn simex Bawrax ka vaig.
9 Pui Isarelax khankix viex bun Midian mai kawn nyawm khankix mawh pa giex laung tau mai to brie kix, mawie, pex, yung mai kraung khrai khawmuik.
10 Kix gleeing veng kix mai dah dee ot kix mai tab kix khawmuik ka ngu.
11 Kix khrawm kraung pa pon rhim tix khawm pui mai to brie khankix heue.
Pa Deeh Hoek Khaing Naing
12 Kix viex pui pa giex laung mai kraung pa pon mai pa rhim kix hoek ka Mose mai Eliza cao giex kaing li mai pui hun Isarelax khankix ka daux tab lung Mawbax hawt rawm klawng Yawdan ka toi veng Yerikho.
13 Mose mai Eliza cao giex kaing li khawm cao kaing cao kap pui hun khankix, lih hu sonsang rieb kix plak praix nyiex bang.
14 Mose song rhawm ka cao kaing naing mai cao kaing pa kwang pui kaing rheng khankix mai pa kwang ka piang pui kaing yieh, pa kaoh khaing daux naing.
15 Mose ah nin ka kix, “Mawh kawn kieh pex bun khankix im ju lie?”
16 Jhak heue, bun khankix hoik kieh pui Isarelax lud ka daux pa hawt krax keud krax sawn pa kaoh khaing Balam mai tieh feen lud kix ka Simiang Siyiex ka kaing jhaw siyiex PeguraxRef 31:16 Si 25:1-9. mai jhawm saux preng hoik hoek ka piang pui hun cie Simiang Siyiex,
17 mawh kheu nan pah simex ku kaux daux sinax kawn nyawm khankix mai pah bun ku kaux pa hoik it tau mai simex,
18 viang mawh nan deuh kawn nyawm bun awn ju khankix, pa ang nyang sax it mai simex im ju.
19 Pex tak yaox ti ot ka praix nyiex bang aliah singaix, kaw pa hoik pah pui tix kaux kaux mai kaw pa hoik hu teeh ka pui yum mai pui pa giex laung tak kieh tokaux tix singax ka daux singaix loe mai singaix aliah.
20 Kieh kraung ceep pex singax pa mawh pa yuh ka hak ku plah mai can pa taing ka hauk pex khankix mai kraung shiao can pa yuh ka khaox khankix.”
21 Eliza cao giex kaing li ah nin ka pui naing pa hoik hu daux naing khankix “In mawh lox lai beenli, lox tat jhawm prawng pa hoik tawm Simiang Siyiex ka Mose,
22 mawh ngie khri, mau, tawng lheung, rhiem, tawng paing mai sivun khankix,
23 can ceu pa pon kham ka ngu khankix, pex tak thi ka daux ngu mai ankix tak mawh pa singax, yuh ka mawx kawx caw tix sigrhah pa seeing singax ka rawm mai pa ang pon kham daux ngu khankix, pex tak cub ka daux rawm.
24 Pex tak sidaux kraung tix ka daux singaix liah mai pex tak mawh pa singax, khaix hoik an khankix, pex tak pon ti laig ka daux nyiex bang heue.”
Gwieh Ka Kraung Pa Rhim Ti Viex
25 Simiang Siyiex krai ka Mose ah nin,
26 “Maix mai cao giex kaing li Eliza, khawm cao kaing pui hun cub mawx cub an, deeh simin khraung pa pon rhim hoek, khawm pui mai to brie khankix.
27 Gwieh kraung pa pon rhim hoek khankix lih ra son, tix son tawx ka pui pa hu daux naing mai tix son tawx ka pui hun.
28 Gwieh ti tawx gha can pa pon khaing daux naing ka Siyiex, pa mawh pui, mawie, la mai yung khankix phwan yieh mu tix mu.
29 Mai deeh teei an khankix tix plak khaing cie kix, tawx ka cao giex kaing li Eliza, son krax tan pa yaog sivoe Simiang Siyiex.
30 Khaing daux cie pui Isarelax khankix tix plak maix tak teei khaing daux tix phwan mu tix mu son kuceu, khaing pa mawh pui, mawie, la mai yung khankix mai tawx ka ceu pui Lewix, pa priex ka nyiex gox bwan man Simiang Siyiex.”
31 Mawh kheu nan Mose mai cao giex kaing li Eliza yuh awm lox tawm Simiang Siyiex ka Mose.
32 Kraungkhrai pa kawn deuk khaing pa pon rhim pui naing ti viex hoek khankix, mawh yung liah sien aliah mheen phwan rheng mu,
33 mawie aliah mheen ra rheng mu,
34 la liah mheen tix rheng mu,
35 mai bun pa ang nyang sax dex dawd mai simex, khawmuik koe loe mheen ra rheng kaux.
36 An tix plak pa mawh son pui pa lih hu ka daux naing khankix, mawh yung loe sien loe mheen aliah rheng phwan yieh mu,
37 gha pa tawx ka Simiang Siyiex, mawh yung liah yieh atixgliah phwan mu,
38 ka daux mawie koe loe mheen liah rheng mu, tawx gha son cie Simiang Siyiex atixgliah ra mu,
39 ka daux la khankix koe loe mheen mai phwan yieh mu, tawx gha son cie Simiang Siyiex tixgliah tix mu,
40 ka daux pui khankix tix mheen liah rheng kaux, tawx gha son cie Simiang Siyiex tixngoe ra kaux.
41 Mose tawx gha khankix ka Eliza cao giex kaing li son krax tan pa yaog sivoe Simiang Siyiex, awm lox pa hoik tawm Simiang Siyiex ka nawh.
42 Cie pui Isarelax khankix tix plak, pa hoik gwieh Mose ti tawx ka kix khaing pui pa hu puing naing,
43 pa mawh cie pui hun khankix tix plak an, mawh yung loe sien loe mheen aliah rheng phwan yieh mu,
44 mawie loe mheen liah rheng mu,
45 la loe mheen mai phwan yieh mu,
46 pui tix mheen liah rheng kaux,
47 khaing daux cie pui Isarelax khankix tix plak, Mose deeh teei khaing daux tixphwan mu tix mu son kuceu khaing pui, khaing to brie mai ka ceu pui Lewix khankix, pa priex ka nyiex gox bwan man Simiang Siyiex, awm lox pa hoik tawm Simiang Siyiex ka Mose.
48 Khaix an cao kaing naing pa kwang ka piang kru naing, cao kaing naing pa kwang pui kaing rheng mai cao kaing naing pa kwang pui kaing yieh khankix hoek dex Mose,
49 mai kix ah nin ka Mose, “Siliex maix cao khankix, hoik teei carang pui naing pa ot greem pa kwang yix mai pui yix tix kaux kawx ang grai.
50 Yam in yix hoik viex krax tan hoek ka Simiang Siyiex, ka pa hoik pon pui ku kaux, pa mawh kraung khri, ble, kong, jheep giien, beu yhaok mai maox soi khankix, sonsang taoh ju yix khaing phimap ka plak sivoe Simiang Siyiex.”
51 Mawh kheu nan Mose mai cao giex kaing li Eliza rieb ti teei kraung khri khaing kix, pa hoik mawh kraung pa shiao khawmuik.
52 Khri pa tan kix ka Simiang Siyiex, khaing cao kaing naing pa kwang pui kaing rheng mai cao kaing naing pa kwang pui kaing yieh khawmuik koe tix mheen liah rheng aliah yieh tixphwan shekhe.
53 Pui naing khankix hoik teei ti viex kraung khrai ka daux naing, son tokaux cao tix ku kaux.
54 Mose mai cao giex kaing li Eliza rieb ti teei kraung khri khaing cao kaing naing pui kaing rheng mai cao kaing naing pui kaing yieh khankix mai viex laig ka daux nyiex gox bwan man bang kum son krax pa doh keud son pui Isarelax khankix ka plak sivoe Simiang Siyiex heue.