12
Arun Mai Meriam
1 Meriam mai Arun ne raw ka Mose, kheu jao teei nawh ti moeng bun Kushax,
2 kiex ah nin, “Mawh sikah Simiang Siyiex ka maix ngie lie? Mawh ang Nawh Cao sax sikah ka yix nang lie?” Simiang Siyiex mhong ka lox sikah kix.
3 Mose mawh pa kied koe rhawm awn rhawm tiem lheu khaing pa koe ka piang haktiex.
4 Simiang Siyiex ah nin ka Mose, khawm Arun mai Meriam dom mawx dom an, “Pex loe kaux, lih hoek ka nyiex gox bwan man bang kum.” Kix loe kaux lih hu hoek.
5 Simiang Siyiex lih hoek ka daux rong paiawm mai cung ka diang siviex nyiex gox bwan man, kok ka Arun mai Meriam, mai kiex khawm ra hoek sivoe.
6 Nawh Cao ah nin, “Nghiet ka lox Aux, phan cao jhai koe ka daux sinax pex, Aux Simiang Siyiex tak plak jhi tokaux tix ka nawh ka daux riang susai, Aux tak sikah mai nawh ka daux camaox.
7 Kawncau Aux Mose ang lai mawh nan, nawh mawh pa kaux sijax daux nyiex Aux khawmuik.Ref 12:7 He 3:2.
8 Aux sikah tau mai nawh pakngai taw pakngai, ka daux pa sidawng, ang lai mawh pa ang sidawng ka mai nawh yaox ka grang pakpeung Aux. Pax lai ang lhat graung ka neraw tix ka kawncau Aux Mose yuh ka mawx?”
9 Simiang Siyiex song rhawm ka kiex mai Nawh cao lih hu.
10 Yam gah paiawm tix khaing piang nyiex gox bwan man, Meriam lih koe saux sipawg, awm paing rawm rha, Arun veeh ti jhak ka Meriam mai yaox koe saux sipawg ka nawh.
11 Arun ah nin ka Mose, “Simiang aux eue, paw deuh phimap ka piang yiex, kheu pa daox pa aw yiex mai pa caox caig yuh yiex liak.
12 Paw kieh Meriam yum awm pa laux nex tix plak yam lih keh nawh khaing vaig miex tix.”
13 Mose riag yo ka Simiang Siyiex ah nin, “Siyiex eue, yuh bwanson pai nawh moi liak.”
14 Simiang Siyiex ah nin ka Mose, “Phan keeing Meriam baig ka ngai Meriam, nawh tak kaig aliah ngaix ang mawh lie? kieh nawh lih ot plak praix nyiex bangRef 12:14 Si 5:2-3. aliah ngaix, khaix an tak pon ti deeh viex nawh hoek.”
15 Meriam lih ot plak praix nyiex bang aliah ngaix, pui khankix ang pon hu krax tom hoek bawg yam deeh viex kix nawh laig ka daux nyiex bang.
16 Khaix an pui khankix deeh gah tix khaing Hazarot mai hu bang ka daux tiag Paran heue.