11
Grawng Pa Ngia Ngheeik Pui Khankix
1 Simiang Siyiex mhong ka lox pa ngia pa ngheeik ceu pui Isarelax ka grawng pa caox caig, mai krax pa song rhawm Nawh Cao lih mai ngu Simiang Siyiex gleeing ka daux sinax kix mai proe ka pui pa paung ka praok nyiex bang tiblah.
2 Pui khankix riag yo ka Mose mai Mose rawg bwan ka Simiang Siyiex ngu an kawx yeet.
3 Nawh kok ceu kaux dee an mawh Taberax kheu hoik gleeing ngu Simiang Siyiex ka daux sinax kix.
4 Pui pa hoik khon tix ka sinax pui hun, kied koe rhawm pa ghoing, ceu pui Isarelax baox yiiem ah nin, “Pui mawx sang tawx yix ih nex lie?”
5 “Ex doh keud ka nex kax pa yie ih ex, ka daux meung Ejiptux, khawm ke, ke khwang, tauxka, tauxmo mai tauxhaw khankix,
6 Yam in rhawm rhi yix hoik khrup, lheu khaing blah mannax in, sivoe ngai yix ang lai yaox koe tidtix.”
7 Mannax an hoik awm simie taux kila mai pakpeung awm mu ploi.
8 Pui khankix hu lailing ka plak praix mai khrawm mannax, krit ka mhaw mai tauh daux po, ngaik daux aw, yuh blah ka an, jhawm nyawm awm blah pa hoik diag tau mai bee.Ref 11:7-8 Lih 16:31.
9 Yam lih rawm ciex ka piang nyiex bang kix ponsawm, mannax lih tau mai an.Ref 11:9 Lih 16:13-15.
10 Mose mhong yien pui khaing diang siviex nyiex bang, ka nyiex ma pui mawx pui an mai pa song rhawm Simiang Siyiex baox nie kaoh ka mai Mose ang nyawm rhawm ka.
11 Mose ah nin ka Simiang Siyiex, “Maix Cao lai yuh krax kha rhawm ka kawncau tix yuh ka mawx? Mai aux lai mawh pa ang pon bwanson ka plak sivoe ngai Maix Cao mai deuh beeh glawm cien pui inkix khawmuik ka piang aux yuh ka mawx?”
12 Khex mawh aux pa nghe ka pui inkix lie? khex mawh aux pa keh kix sonsang ah Maix Cao ka aux yuh nin lie? Klien kix ka daux naok Maix awm pui kia ngien ka kawn nyawm pa kawn peuex teeh mai klien kix hu ka daux haktiex pa hoik tiextu Maix Cao ti tawx ka keeing kix
13 Aux sang pon teei nex sonsang tawx ka pui in khankix khaing dee mawx? Mawh kheu kix riag yiiem sivoe aux ah nin, tawx yix ih nex liak
14 Aux ang pon klawm beeh glawm pui inkix nong nong, kheu mawh in beeh glawm pa kied cien son aux.
15 Phan Maix Cao yuh awm ceu in ka aux, yuh bwanson pah ka aux yam in, phan aux mawh pa pon bwanson ka plak sivoe ngai Maix Cao, paw doh kieh aux yaox krax kha liak.”
Pui Riex Ju Atixgliah Kaux
16 Simiang Siyiex ah nin ka Mose, “Khrawm pui riex ju atixgliah kaux son Aux, khaing daux pui Isarelax pa tawng maix mawh pui riex ju mai pa mawh cao kaing ka piang kix, viex kix hoek ka nyiex gox bwan man bang kum cung tau mai maix tan.
17 Aux tak lih hoek sikah tau mai maix tan, Aux tak teei khwan pa koe ka piang maix tiblah mai deuh ka piang kix mai kix tak klawm beeh glawm tau mai maix son ang maix lai klawm beeh glawm an nong nong.
18 Ah nin ka pui khankix, kieh tokaux pex singax son pasax mai pex tak yaox ti ih nex, mawh kheu Simiang Siyiex hoik mhong lox riag yiiem pex ah nin, “Pui mawx sang tawx yix ih nex lie?” Mawh kheu yix hoik mhawm ka daux meung Ejiptux. Mawh kheu Simiang Siyiex tak tawx nex ka pex mai pex tak yaox ti ih.
19 Pex tak ang yaox ti ih ngie son tix ngaix, ra ngaix, phwan ngaix, kao ngaix mai tixnga ngaix,
20 pex tak yaox ti ih leeing khix tom hoik lih nex khaing daux meeh pex tom hoik seeing pex ka, kheu hoik thiang pex ti tik ka Simiang Siyiex pa ot ka daux sinax pex mai riag yiiem sivoe Nawh Cao ah nin, “Kheu yix lai lih khaing daux meung Ejiptux lie?”
21 Mose ah nin, “Can pui liah sien kaux pa ot tau mai Aux khankix, Maix Cao hoik ah nin, Aux tak sang tawx kix ih nex tom naog tix khix
22 mawh sang pah ka phung yung, mawie mai pex son kix, sonsang kub ih kix lie? Phan ang mawh nan mawh sang khrawm kax pa koe daux rawm sigrit sigra son kix sonsang kub ih kix lie?”
23 Simiang Siyiex ah nin ka Mose, “Mawh dawd plawng taix Simiang Siyiex lie? yam in maix tak yaox ka lox pa krai Aux ka maix mawh ang mawh.”
24 Mose lih hu mai krai lox Simiang Siyiex ka pui hun mai nawh khrawm simex pui riex ju atixgliah kaux khaing daux pui hun mai kieh kix cung vung viang nyiex gox bwan man.
25 Simiang Siyiex lih hoek khaing daux paiawm mai sikah ka Mose mai teei khwan pa koe ka piang nawh tiblah mai deuh ka piang pui riex ju atixgliah kaux, yam hoek khwan ka piang kix, kix sikah lox jhai mai kix ang lai baox krai khaix an.
26 Kawn koe pui ra kaux pa kut ti ot ka daux nyiex bang, tix kaux mawh Eladat mai an tix kaux mawh Medat mai khwan hoek ka piang kiex khawm ra kaux, kiex hoik mawh pa laig daux carang, viang kiex ang lih hu ka nyiex gox bwan man kawx, kiex sikah lox jhai ka nyiex bang.
27 Nyawm simex awn ju tix kaux to hoek krai ka Mose ah nin, “Eladat mai Medat, sikah lox jhai daux nyiex bang.”
28 Yawsux kawn simex Nun cao teem Mose, pui pa hoik laug nawh tix kaux ah nin, “Simiang aux Mose tiebtie ka kix liak.”
29 Mose ah nin ka nawh, khoi rhawm maix ka aux jao tix? Kieh pui Simiang Siyiex sikah lox jhai khawmuik mai kieh Simiang Siyiex tawx khwan hoek ka piang kix.”
30 Mose mai pui riex ju Isarelax khankix deeh ing ka nyiex bang heue.
Pa Tawx Simiang Siyiex Keed
31 Bhaung ting lih khaing Simiang Siyiex mai tah keed hoek khaing rawm sigrit sigra mai kieh keed prung prang rawb rim nyiex bang been tix ngaix krax, ka plak in mai been tix ngaix krax, ka plak an, hawt vung viang nyiex bang mai lhaong pu khaing tiex been ra sawk.
32 Pui khankix kaoh khrawm keed ku singaix mai ngaix khaix leeing ngaix, pui pa khrawm keed dee iak pon khrawm kao Awmie mai hok hawt vung viang nyiex bang ku sidah son tix.
33 Yam kawn koe nex keed ka sinax rhang kix mai ang nyang tien kraing krax song rhawm Simiang Siyiex lih ka pui khankix mai tawx preng pa kied ting ka pui khankix.
34 Nawh tom kok dee an mawh Kibarok-hatava, kheu sipaung kix pui pa koe rhawm ghoing ka dee an.
35 Pui khankix deeh gah tix khaing Kibarok-hatava mai hu bang ka Hazarot heue.