1 Veng Nineve eue, pa sang yuh krax laux leeing hoik hoek ka plak sivoe ngai maix, yuh satix maix ka daux nyiex tab lhaong, pau ti jhak daux krax, kieh nyoi maix cong, yuh riang grang pa kied ting kied lhaong maix kaux cong heue. 2 Grawh grawng nawh, Siyiex tak sang deeh yaog min krax pa kied mhawm Yakop, awm min krax pa kied mhawm ceu pui Isarelax khankix, mawh kheu cao pa yuh krax yi, hoik kieh Yakop mai ceu pui Isarelax khankix yi mai hoik kieh krax nhu plix siiet kix laux heue. 3 Plah rhiem tiebtie naing pui pa ting riang rao nawh khankix mawh pa raoh, pui pa vao pa kwa khankix mawh pa ceep kraung pa raoh rawt heue. Ling lawx naing khankix hoik toh luk lak awm ngu ka daux ngaix pa khre pa rien nawh, ti puing naing mai krong pliah khankix hoik vuh vied tix heue. 4 Ling lawx naing khankix yaog ti to luah sinum ka daux piang krax khankix, kix to jee to blaung ka dah dee kied vieh khankix, grang kix awm riang ngu proh kix phai to awm puk plak braix heue. 5 Nawh krawk khrawm ka simiang cao kaing khankix mai kix sideeing ti goh yam hu lailing kix, kix nied ti haok ka guh veng khankix mai khre dee pa tiebtie heue. 6 Phai rawm klawng khankix hoik bang mai nyiex haw hoik grai grhup heue. 7 Laux simiang veng Nineve tak sang mawh pa peeik kraung ceep tix mai giex ti hu heue, bun kawncau nawh khankix tak sang tub naok tix mai yiiem awm lox sikaux, ka grawng ceu pa hoik tat ti deuh heue. 8 Viang veng Nineve pa dawg koe an, hoik awm rawm dung pa naog kawx yam in kix to ti lih heue. Viang koe pui pa kok yo lox tix ah, kaoh ha! kaoh ha! Mai pui tix kaux kawx ang lai deeh veeh tix ing heue. 9 Pex tud rhim ti teei mau khri mawh kheu kraung khrai ang lai chix uik mai kraung pa mhawm pa khaw rhawm pui kuceu kawx ang lai dak uik simin heue. 10 Veng Nineve hoik mawh pa yi, pa yiien grai hu pui mai mawh pa laux leeing heue. Rhawm pui veng koe krax laux rhawm mai ngawng hoik siyaung khawm ra khawn, nyoi ka hoik kied saux kraing saux ki mai pakngai kix hoik tieh loh tix heue. 11 Dee ot dee koe sivai sangsi mai dee eei kawn sivai sangsi awn ju an khankix, dee hoik lailing sivai sangsi mhaing mai sivai sangsi miex mai kawn sivai sangsi khankix, dee pa ang pui koe krax lhat graung koe dee mawx lie? 12 Sivai sangsi mhaing hoik puk paig ti kiied pa ih tom kub son kawn sivai sangsi iak khankix mai hoik ciiet ghok to pa im son miex sivai sangsi khankix mai hoik naog yuh daux rang ot nawh khankix ka to tiag heue. 13 Siyiex Cao kru naing raoma ah nin “Jhak heue, Aux mawh pui koeng ka maix heue. Aux tak sang gleeing ling lawx naing maix khankix mawh taox ngu mai vaid tak sang yuh sivai sangsi awn ju maix khankix laux leeing heue. Aux tak sang tat ti tik kraung khrai sinngao pa hoik tud rhim maix khankix khaing piang haktiex mai lox cao cau maix khankix tak ang lai mhong khaix in heue.”