1 Ka grawng pa plak jhi son veng NineveRef 1:13-19 Isa 10:5-34; 14:24-27; Ze 2:13-15. pa mawh lai riang susai pa yaox Nahum pa mawh pui yaong Elakawsha.

2 Siyiex mawh pa ci krax pa caox mai Simiang Siyiex yuh krax pa pawk bix heue. Siyiex yuh krax pa pawk bix mai koe krax pa kied ting song rhawm songrhi heue. Siyiex tak sang pawk bix ka pui koeng Nawh khankix mai Nawh deuh krax pa song rhawm songrhi ka son pui koeng Nawh khankix heue. 3 Siyiex mawh pa ang yie song rhawm mai mawh pa kied ting sibrawm mai tak ang pluat phimap pui pa caox caig khawmuik heue. Siyiex hoik hu daux krax Cao Nawh, ka daux bhaung kang lux mai ka daux lhiex ting mai paiawm khankix mawh pa awm phawng tiex ka greem caong Nawh Cao heue. 4 Nawh Cao ah ka rawm sigrit sigra mai kieh kroh mai kieh rawm klawng khankix hit khawmuik heue. Gawng Bashan mai gawng Kharamelax khankix kroh ti hu mai pruh tai gawng Lebanon fit hu heue. 5 Gawng khankix yung yiang kheu Nawh Cao, ton khankix hoik rawm mai tiex gah hu ka plak sivoe ngai Nawh Cao, khawm haktiex mai can pui pa ot ka daux nawh khawmuik heue. 6 Pui mawx pa pon cung ka plak sivoe krax pa saux rhawm saux rhi Nawh Cao lie? Pui mawx pa pon thang krax pa kied kin pa song rhawm Nawh Cao lie? Krax pa saux rhawm Nawh hoik klup ti lih awm ngu mai rang khankix hoik phawng hoik nyau kheu Nawh Cao heue. 7 Siyiex pon mawh pa mhawm, dee pa kaux cong ka daux singaix pa kha rhawm mai Nawh Cao tawng ka pui an kix ka pui pa een rhawm tix ka Nawh Cao heue. 8 Viang mawh nan, Nawh Cao tak kieh rawm hwan kheem ka pui pa sang yaog ti tieh feen khankix pak lawg, mai leue pui koeng Nawh Cao khankix laig ka daux pa faik heue. 9 Mawh keud maix ti sang yuh ceu pa caox patix ka Siyiex lie? Nawh Cao tak sang kieh pex laux lak pak leeing heue. Krax kha rhawm tak ang lai pon yaog ti koe ra bawg heue. 10 Kix klung klien ti tau awm pang kat mai awm pa nyaux ti yoek ka rawm plix siiet, kix tak sang mawh pa proe ti laux awm nyhee pa hoik kroh kroing heue. 11 Khaing maix tak sang lih hoek pui tix kaux, pa keud ti sang yuh pa caox ka Siyiex, pa keud sawn krax pa caox caig heue. 12 Siyiex ah nin! Viang kix mawh pa hoik grum naog mai pa hoik pre koe pui tom nie kawx, viang yuh nan, kix tak sang mawh pa tat ti lih mai hoek krax grai grhup heue. Yudax eue, viang Aux hoik yuh krax kha rhawm ka maix kawx, Aux tak ang lai baox yuh krax kha rhawm ka maix khaix in tix bawg kawx heue. 13 Yam in Aux tak sang raig ti tik khaox glawm nawh khaing maix mai rud ti tik maox nawh khankix dud hu heue. 14 Siyiex tawx gumlox tix hoek ka veng Nineve ah nin, doeh maix tak sang dut heue. Khaing daux nyiex siyiex maix khankix, Aux tak sang tat ti tik riang grang pa hoik saik tix mai khawm riang grang pa hoik raug tix khankix heue. Aux tak sang kieh maix laig ka daux simeeig, kheu mawh maix pa pheem pa deux heue. 15 Jhak ti yaox ka caong pa krai lox bwan gaux rhawm mai pa pao ti krai grawng krax pa nhim ka piang gawng lua khankix heue. Ref 1:15 Isa 52:7.Ceu pui Yudax khankix eue, priex ti yuh pawie pa hoik tat maix ti deuh heue. Grawh grawng nawh, pui pa ang rahsee an tak ang lai pon tiang ti hu ka daux pex khaix in tix bawg kawx, nawh mawh pa hoik tat tix khawmuik heue.