1 Pui khankix mai moeng kix kied riag yo mai pa deuh phimap ka puxaik kix pui Yudax heue. 2 Mawh kheu can pui ankix ah nin, “Ex mai khawm kawn simex kawn bun ex khankix mawh pa kied nie, ex teei nghox khankix sonsang pon ex tix ih mai im ju ka heue.” 3 Pui tiblah ah nin, “Yix hoik tang ka haktiex mai gwang sipeem plix siiet mai khawm nyiex tix khankix, sonsang pon yix teei ti tawx nghox khankix, kheu hoik sibhawm praix heue.” 4 Pui tiblah baox ah nin, “Yix hoik yaog mau, sonsang tawx tix keen cie simiang ka son haktiex yix mai si peem plix siiet yix khankix heue. 5 Mawh kheu nan nex nham yix awm nex nham puxaik yix khankix mai kawn praix yix khankix awm kawn praix kix mai yaox tix khin kawn simex kawn bun tix khankix yuh siliex, kawn bun yix khankix pa hoik yuh siliex kawx yix ang lai pon taoh kix lih heue. Mawh kheu hoik laig haktiex mai sipeem plix siiet yix khankix ka daux tawm taix pui tang kaux heue.” 6 Aux hoik kied song rhawm, yam mhong tix ka lox riag yo kix mai lox krai kix heue. 7 Khaix hoik bre aux tix keud, aux hoik ne hoik raw cub simiang mai pa kwang khankix mai ah nin ka kix, “Pex ku kaux lai teei rao mau khaing puxaik tix, ”Ref 5:7 Lih 22:25; Krub 25:35-37; Pi 23:19-20. “Mawh kheu nan aux kraix khrawm pui khankix hoek tix klah lox ka kix daux bang kum heue. 8 Mai aux ah nin ka kix, “Awm pa hoik deeh pon taoh ex ka puxaik tix pui Yudax khankix, pa hoik coh tix ka pui tang ceu khankix. Yam in khex sang deeh coh pex puxaik tix khankix lie? Phan ang mawh nan mawh tak sang deeh mawh kix pa coh tix ka ex lie?” Khaix an kix yiien yawg mai ang lai tawng pa ah tix heue. 9 Aux ah nin, “Ceu pa yuh pex khankix ang lai mawh pa mhawm, mawh ang pex khaw tix hu ka daux pa lhat graung tix ka Siyiex ex, sonsang tiebtie lox salao pui tang ceu, pa mawh pui koeng ex khankix lie?” 10 “Aux mai puxaik aux, khawm puxaik aux khankix, kawn tawx kix ceuk mau mai nghox khankix, yuh bwanson kieh ex naox, krax pa teei tix rao mau in liak.” 11 “Ka daux in ngaix deeh tawx can pa mawh haktiex sipeem plix siiet mai nyiex mai mau pa teei pex rao khaing kix, tix yieh son tix son mai nghox an khankix, khawm rawm plix siiet pa khraox mai khawm rawm bee, pa hoik tat pex ti teei ka kix heue.” 12 Kix ah nin, “Yix sang deeh tawx ankix mai yix ang lai deeh mhaing tix ceu kawx khaing kix, yix tak sang yuh awm lox pa krai maix heue.” Khaix an aux kok cao giex kaing khankix mai kieh kix yuh krax tiextu tix, sonsang hawt yuh kix awm gumlox sijax mukheu in heue. 13 Khaix an aux kah tix khruah ka man kraung ceep pa rawd ka nyoi tix ah nin, “Ceu pui pa ang hoek ti yuh awm sijax mukheu in, kieh Siyiex khruah nawh singai khaing nyiex cao nawh mai khaing sinngao nawh mai khruah nawh tom hoik yi heue.” Cub pui hun khankix hoik ah “Amen” mai yaogyaw ka bwanson Siyiex khawmuik heue. Khaix an pui hun khankix yuh nawh awm pa koe gumlox sijax mukheu in heue.

14 Jah bawg yam yaog aux tix mawh cao pa kwang ka daux meung Yudax, jah ka num kwang simiang Atazerit ka haktiex tixnga num, tom hoek tixngoe ra num tix num, glang daux kao ra num, aux mai puxaik aux khankix ang nyang sax ih priex son nyum cao pa kwang khankix tibawg kawx heue. 15 Viang mawh nan cao pa kwang veng sivoe aux khankix, hoik deuh beeh pa cien piang pui khankix mai teei ti ih blah mai rawm plix siiet mai mau tix ngaix tixpon shekhe khaing kix, pie kawncau kix kawx, hoik yuh krax kwang pa lang teung piang pui khankix, viang mawh nan, aux ang lai yuh awm an kheu lhat graung tix ka Siyiex heue. 16 Aux ca baox toe ti yuh guh veng ang jud mai ex ang liag haktiex, kawncau aux khawmuik hoik kraix khawm paox tix yuh kaing tau heue. 17 Lheu khaing ankix pa hoek ka ex, khaing ceu pui tang ceu khankix pa ot hawt vung viang ex, koe pui Yudax mai cao pa kwang khankix tix yieh tixphwan kaux, pa sawm tau mai pheen aux jheung jheung heue. 18 Can ceu pa hoik khre rien ti ka son aux ku ngaix, mawh mawie tix mu, mai yung pa hoik laug ti liah mu mai ia sim khankix kawx hoik khre rien ti ka son aux kao ngaix tix bawg, rawm plix siiet kuceu hoik khre rien ti tom nie, viang mawh nan aux ang lai mhaing priex nyum ka son cao pa kwang veng, kheu jao kied cien kaing jhaw piang pui khankix heue. 19 Siyiex eue, doh keud ka ceu pa mhawm awm pa hoik yuh aux khawmuik ka son pui khankix mai nawb bwan ka aux liak.