1 Yam mhong Sanbalat ka grawng hoit deeh cox sum ex guh veng, nawh kied meet rhawm mai kied song rhawm mai salao ka pui Yudax khankix heue. 2 Nawh krai lox plak sivoe puxaik tix mai cub kru naing Samarix khankix ah nin, “Pui Yudax pa awn riang inkix yuh patix lie? mawh sang kaux cong yuh kix ka tokaux cao tix lie? mawh sang tan kix patix lie? mawh sang hoik yuh kix ceu an tix ngaix ngie lie? mawh sang sum kix guh veng mai lon simaox pa vaoh kix khaing pum nyhee pa hoik gleeing khankix lie?” 3 Yam in Tobiyax ceu pui Amon pa ot mai praok nawh ah nin, “Guh veng pa sum kix, phan sox praix tix mu haok piang an, nawh tak max yuh ka lon simaox guh veng kix heue.” 4 Siyiex eue, nghiet liak, mawh kheu hoik kham geu pa salao pui, deeh kieh lox pa salao kix hoek piang kaing cao kix mai kieh kix kham pa tut rhim ka daux haktiex pa giex laung liak. 5 Paw doh kheem ka pa lud kix mai paw doh preet phimap kix grai khaing plak sivoe Maix Cao liak, mawh kheu kix so krax song rhawm Maix Cao ka plak sivoe pui sum guh veng khankix heue. 6 Mawh kheu nan yix hoik sum guh veng mai guh veng hoik sitoe tix tau, plak lhaong hoik koe tix plak heue. Mawh kheu pui hun khankix hoik koe rhawm ti yuh kaing heue. 7 Yam hoik mhong Sanbalat, Tobix pa mawh ceu pui Arap, ceu pui Amon mai ceu pui Ashadot khankix, ka hoik jhak kix tix cox sum guh veng Yerusaliem mai ka jhak kix tix deeh thox daux doh khankix, kix kied song rhawm ka heue. 8 Kix khawmuik kum paox tix sang yuh pa caox mai hoek puing ka veng Yerusaliem mai kieh pa sivix koe heue. 9 Viang mawh nan ex hoik rawg bwan ka Siyiex ex, kheu jao pui ankix, ex deuh cao pa pau ti jak koe ku singaix heue. 10 Khaix an pui Yudax khankix tiblah ah nin, “Can pui pa yuh kaing khankix kawx hoik dhah riang rao mai nyhee nyhawk khankix kawx hoik kied nie, mawh kheu nan, ex ang lai sum ka guh veng heue.” 11 Pui koeng ex khankix ah nin, “Yam ang kix tawng, ang kix yaox ex lih hoek ka sinax kix mai pah kix yum, kieh kaing yuh kix kaog heue. 12 Mawh kheu nan pui Yudax pa ot dex kix, hoek krai grawng an ka ex kao bawg, “Kix tak kaoh khaing dee ot tix kudah mai hoek puing ka ex heue.” 13 Mawh kheu nan, aux hoik deuh pui khankix ka plak khaix guh veng dee tiem ka dee nie sidawng ti yaox awm pa hoik koe doeh nyiex ma kix cub mawx cub an tau mai vaig, pliah mai ak kix heue. 14 Aux jhak ti yaox mai yaog ti kaoh krai ka cub simiang mai ka cub cao kaing mai cub pui pa kawn deuk khankix ah nin, “Paw lhat graung ka kix awx. Doh keud doh ka Siyiex, pa kied ting lhaong mai koe sibrawm pa kied lhat graung ka mai puing naing son puxaik pex, son kawn simex kawn bun pex mai son moeng pex mai son nyiex ma pex khankix heue.” 15 Yam mhong pui koeng ex khankix ka hoik tawng ex ka grawng in, Siyiex hoik yieh krax pa keud sawn kix laux leeing mai ex khawmuik deeh ing ka guh veng mai pui ku kaux tang deeh yuh kaing yuh cao tix heue. 16 Mawh kheu nan, jah ka daux bawg yam an, kawncau aux tix plak yuh kaing mai tix plak giex pliah, giex kraung plah tiebtie mai ak mai ceep ka kraung plah rhiem khankix mai cao kaing hoik ot ka plak khaix nyiex pui Yudax khawmuik heue. 17 Can pui khankix pa sum guh veng mai can pui pa klawm tiex pid khankix, tix khawn taix yuh kaing mai tix khawn taix giex ka kraung naing heue. 18 Pui pa cox sum khankix ku kaux, hoik tang giieb vaig ka nyoi tix, yam yuh nawh kaing mai pui phlu teettawng hoik cung hawt praok aux heue. 19 Khaix an aux ah nin ka cub simiang mai cao pa kwang mai can pui pa kawn deuk khankix, “Kaing in mawh pa kied ting mai pa kied vieh mai ex hoik kied singai ot khaing paox tix, tix kaux lai tix kaux piang guh veng heue.” 20 “Mawh kheu nan, yam mhong pex ka lox teettawng dee mawx ang ah, pex kraix khrawm paox tix hoek ka yix tan heue. Siyiex ex tak puing son ex heue.” 21 Mawh kheu nan, sau riang rao ex yuh kaing mai pui tix plak hoik giex ka pliah, jah ka mee riang praix tom hoek bawg yam hoik toh simuing khankix heue. 22 Ka daux baux yam an, aux baox ah nin ka pui khankix, “Kieh pui ku kaux mai kawncau nawh, ot daux veng Yerusaliem ponsawm, sonsang mawh kix cao pau ex daux ponsawm mai yam yuh kaing plak ponngaix heue.” 23 Mawh kheu nan, tokaux aux, puxaik aux, kawncau aux mai pui pau veng pa hawt hu khaix aux khankix, ang lai peeik kraung ceep tix, tix kaux kawx yam lih kin kix rawm kawx tang giex kraung naing tix heue.