8
Pai Pui Saux Sipawg Moi
(Mak 1:40-44; Luk 5:12-14)
1 Yam lih hoek Nawh Cao khaing piang gawng, cub pui hun hawt khaix Nawh heue.
2 Pui sipawg tix kaux hoek ti krub ka Nawh Cao ah nin, “Simiang eue, phan Maix koe rhawm ti cox, Maix chix kieh aux singax heue.”
3 Nawh Cao nyeu taix tix mai teeh ka kaw an ah nin, “Aux koe rhawm heue, kieh maix singax heue.” Dom mawx dom an pa sipawg nawh singax heue.
4 Yesux baox ah nin ka nawh, “Rien rhawm tix mai paw krai ka pui tix kaux kawx, hu mai jhi tokaux tix ka cao giex kaing li pa ting mai tawx pa tan awm pa nhie Mose, sonsang mawh mhai rug ka kix heue.”
Pai Kawncau Cao Kaing Moi
(Luk 7:1-10)
5 Yam hoik laig Nawh Cao ka daux veng Kapeniom, cao giex kaing naing tix kaux hoek ti khyox khaw ka Nawh,
6 Ah nin, “Simiang eue, siliex aux tix kaux koe jhawm saux yum taix caong mai it daux nyiex mai nawh tuat siviiet kied sigrien heue.”
7 Nawh Cao ah nin ka nawh, “Aux sang hoek mai cox nawh moi heue.”
8 Cao giex kaing naing an pawk lox ah nin, “Simiang eue, ang aux keung ti kieh Maix hoek kreed greem braux nyiex aux, viang mawh nan tawx ngie lox tix gum khaing mai siliex aux tak moi heue.
9 Aux mawh pui ot greem simiang, kheu nan aux koe pui naing khankix greem aux heue. Phan aux ah “Hu” ka tix kaux, nawh hu heue. Phan aux ah “Hoek” ka tang kaux, kaw an hoek heue. Phan aux ah, yuh in ka siliex aux, nawh yuh heue.”
10 Yam mhong Yesux ka lox an, Nawh daox deng kah mai ah nin ka pui pa hawt khaix Nawh khankix, “Aux krai lox tete ka pex, ang Aux sax yaox pui pa yum rhawm nie ding ka daux pui Isarelax.
11 Aux baox ah nin ka pex, pui tak hoek khaing plak lih singaix mai plak klip singaix tom nie mai tak ngawm tau mai Abraham mai Icak mai Yakop, ka daux meung raoma heue.
12 Viang mawh nan, kawn praix meung an tak taing lih plak praix daux pa faik, dee tak yiiem riag mai dee greeik rhang heue.”
13 Yesux baoh ah nin ka cao giex kaing naing an, “Maix hu heue, kieh mawh awm pa hoik yum rhawm maix heue.” Siliex nawh moi bawg yam nari an heue.
Pai Miex Moeng Petrux Moi
(Mak 1:29-31; Luk 4:38-39)
14 Yam hoek Yesux daux nyiex Petrux, Nawh yaox miex moeng Petrux saux mai it heue.
15 Nawh Cao teeh taix nawh mai jhawm saux nawh grai mai nawh kaoh mai khan kheu ka Nawh Cao heue.
Pai Pui Saux Moi Tom Nie
(Mak 1:32-34; Luk 4:40-41)
16 Yam hoek yam ponbo kix viex pui pa laig phicaox haoh hun ka Nawh Cao mai Nawh teei gumlox tix gum mai grheu phicaox khankix lih mai Nawh cox pui pa koe jhawm saux khawmuik moi heue.
17 Kheu sonsang naog lox pa krai cao jhai Isayax pa ah nin, “Tokaux Nawh teei pa iak riang rao ex mai kawg jhawm saux ex khankix heue.”
Pui Pa Khaw Ti Hawt Khaix Yesux
(Luk 9:57-62)
18 Yam yaox Yesux cub pui hun ot sivie Nawh tan, Nawh cao tawx lox kieh hu plak toi rawm heue.
19 Pui tiiem lai tix kaux hoek mai ah nin ka Nawh Cao. “Caogau eue, aux sang hawt dee sang hu Maix ku dah dee heue.”
20 Yesux ah nin ka nawh, “Sox praix khankix koe daux mai sim piang raoma khankix koe mheem, viang mawh nan Kawn kawn pui ang koe dee deuh kaing tix heue.”
21 Kawncau tang kaux tix kaux ah nin ka Nawh Cao, “Simiang eue, kieh aux hu sipaung keeing aux ka ha,”
22 Yesux ah nin ka nawh, “Hawt khaix Aux mai kieh pui yum sipaung ka pui yum cie kix heue.”
Kieh Bhaung Ting Yawg Yiien
(Mak 4:35-41; Luk 8:22-25)
23 Yam hoik laig Nawh Cao ka daux reu, kawncau Nawh khankix hawt khaix Nawh heue.
24 Jhak heue, bhaung ting hoek ti phlu ka daux rawm nhawng, tom pukpak rawm kheem reu an, yam an, Nawh Cao it heue.
25 Kix hoek ka Nawh Cao mai so Nawh siduad ah nin, “Simiang eue, taoh ex liak, ex dex sang laux heue.”
26 Nawh Cao ah nin ka kix, “Pex pa iak krax yum rhawm eue, pex lhat graung yuh ka mawx?” Yam an Nawh kaoh mai sidiex ka bhaung khankix mai rawm nhawng deeh yiien sigrien sigre heue.
27 Pui khankix daox deng mai tom ah nin, “Kaw in mawh Pui pa yuh ka mawx? Pie bhaung khankix mai rawm nhawng kawx, nghiet lox Nawh heue.”
Grheu Phicaox Lih
(Mak 5:1-20; Luk 8:26-39)
28 Yam hoek Nawh Cao plak toi rawm ka daux meung Kadarax, pui pa koe phicaox ra kaux lih khaing daux simeeig mai rieb Nawh heue. Kiex kied kwa tom ang pui tix kaux kawx pon hu krax an heue.
29 Jhak heue, kiex kok yo ah nin, “Kawn Siyiex eue, Maix koe pa yuh mai yiex ceu patix? Maix hoek ti tuktiak ka yiex ka sang hoek bawg yam lie?”
30 Ka dee singai khaing kix koe cub lig tix cub pa sawm tan heue.
31 Phicaox khankix khyox khaw ka Nawh Cao ah nin, “Phan Maix grheu yix lih, ploi yix laig ka daux cub lig an liak”
32 Nawh Cao ah nin ka kix, “Hu heue.” kix lih hu laig ka daux lig an khankix mai jhak heue, cub lig an khawmuik to lih ka dee nie rieh jung jee, laig ka daux rawm nhawng mai yum daux rawm heue.
33 Pui pa liang lig khankix to hu laig ka daux veng mai krai grawh grawng kuceu, pa hoik mawh ka kiex pa hoik laig phicaox heue.
34 Jhak heue, pui daux veng khawmuik hoek ti jhak yaox ka Yesux mai yam yaox kix Nawh Cao kix khyox khaw mai nhie Nawh lih hu khaing daux meung kix heue.