7
Paw Prawng Ca
(Luk 6:37-38, 41-42)
1 “Paw prawng ca, yuh ka mawx son ang pex sang hoek krax prawng ca.
2 Pex prawng ca ka pui yuh ka mawx, tak sang prawng ca ka pex yuh nan heue. Awm diag tong pex ti tawx ka pui, pex tak deeh pon awm an heue.
3 Kheu maix jhak kuh ngai pa iak daux ngai puxaik maix mai ang keud grawh grawng nuk pa koe daux ngai tokaux tix lie?
4 Sang chix krai maix ka puxaik tix, kieh aux teei ti tik kuh ngai maix, yuh ka mawx yam kawn koe nuk ka daux ngai maix?
5 Pui pie lhen eue, teei ti tik nuk pa koe daux ngai maix ka ha mai maix tak sang yaox mhawm mhawm, sonsang teei kuh lih khaing ngai puxaik maix heue.
6 Paw tawx pa singax ka sox khankix; siang mhawm ceu pa koe daux jawx cie pex kawx, paw taing sivoe lig, phan ang mawh nan ha kix kawx dig greem caong tix mai deeh veeh ti kiied ka pex heue.”
Rawg, Sawg, Glheuh Siviex
(Luk 11:9-13)
7 “Rawg heue, mai tak sang tawx ka pex, sawg heue, mai pex tak sang yaox, gleuh sivieh heue, mai tak sang paoh son pex heue.
8 Grawh grawng nawh, pa rawg ku kaux tak pon mai kaw pa sawg tak yaox mai ka kaw pa gleuh siviex tak paoh son nawh heue.
9 Phan kawn pex rawg mhaing blah, pa teei simaox tawx ka nawh, koe ka daux pex tix kaux kaux lie?
10 Phan ang mawh nan, phan kawn pex rawg mhaing kax, sang tawx siuing lie?
11 Phan pex pa mawh pui caox, chix tawx totaix pa mhawm ka kawn praix tix, Keeing pex pa ot daux meung raoma tak nie lheu tawx ceu pa mhawm ka pui pa rawg ka Nawh miex ding?
12 Mawh kheu nan, can ceu pa simie pex pui yuh ka tix khawmuik, pex kawx, yuh nang nan ka kix heue. Kheu in mawh lox lai beenli mai lox cao jhai khankix heue.”
Siviex Pa Iak Pa Sikhawp
(Luk 13:24)
13 “Pex laig ka daux siviex pa iak pa sikhawp heue. Mawh kheu siviex mai krax pa hoek dee laux leeing mawh pa ting pa vieh mai pui pa laig tan kied nie heue.
14 Mawh kheu siviex mai krax pa hoek dee sang pon ju leeing ju mawh pa iak pa sikhawp, pui pa yaox kied tux heue.
Tawng Khaox Kheu Plix
(Luk 6:43-44)
15 “Rien rhawm tix ka cao jhai pa ang mawh meh khankix, pa ceep hak yung plak piang, viang mawh nan ka plak daux mawh soxla pa caox heue.
16 Pex tak tawng kix ka plix kix heue. Pui pieh plix siiet ka pang kat lie? mai pieh plix ruh ka pang kat heeik lie?
17 Khaox pa mhawm ku khaox plix ka plix pa mhawm, viang mawh nan khaox pa ang mhawm plix ka plix pa ang mhawm heue.
18 Khaox pa mhawm ang chix plix ka plix pa ang mhawm, khaox pa ang mhawm kawx, ang chix plix ka plix pa mhawm heue.
19 Khaox pa ang plix ka plix pa mhawm ku khaox, kid goh mai taing sau daux ngu heue.
20 Mawh kheu nan pex tak tawng kix ka plix kix heue.”
Aux Ang Sax Tawng Pex
(Luk 13:25-27)
21 “Pui pa kok ka Aux, Simiang eue, Simiang eue, pon ti laig ka daux meung raoma ku kaux ang mawh. Mawh kaw pa yuh hawt alo Keeing Aux pa ot ka daux meung raoma khaing pa pon ti laig heue.
22 Ka daux singaix an sax, pui hun tak sang ah nin ka Aux.Simiang eue, Simiang eue, ex hoik sidiex lox jhai ka daux ceu kaux Maix mai hoik grheu phicaox khankix lih ka daux ceu kaux Maix mai hoik yuh kaing pa ting sibrawm tom nie ka daux ceu kaux Maix ang mawh lie?
23 Aux tak krai ka kix sidawng, Aux ang sax tawng pex, pex pa yuh pa ang khaw caw khankix eue, lih hu khaing Aux.”
Pui Sum Nyiex Ra Kaux
(Luk 6:47-49)
24 “Pui pa mhong gumlox Aux in mai hawt ti yuh ku kaux daux pui, tak sang awm pui pa koe pingnya tix kaux, pa sum nyiex nawh piang simaox heue.
25 Lhiex lih, rawm haok huan, bhaung khankix phlu mai klah ka nyiex an, viang mawh nan nyiex an ang goh, kheu hoik sum piang simaox heue.
26 Pui pa mhong ka gumlox Aux in mai ang hawt ti yuh, tak sang awm pui daox tix kaux, pa sum nyiex nawh piang mhaik heue.
27 Lhiex lih, rawm haok huan, bhaung khankix phlu, klah ka nyiex an mai nyiex an goh heue. Pa goh an kied ting.”
28 Khaix hoik sidiex Yesux lox ceu in khankix, cub pui hun khankix daox deng ka lox sidiex gau Nawh Cao heue.
29 Mawh kheu Nawh sidiex gau ka kix awm pui pa koe sibrawm mai ang awm pui tiiem lai khankix heue.