26
(Mak 14:1-2; Luk 22:1-2; Yo 11:45-53)
1 Khaix hoik krai Yesux grawh grawng lox ceu an khankix khawmuik, Nawh Cao ah nin ka kawncau Nawh khankix,
2 “Pex tawng, khaix in ra singaix tak hoek bawg yam pawie Pasakha mai tak sang tawx ka Kawn kawn pui, sonsang tawk Nawh piang khaox lhak heue.”
3 Yam an cao giex kaing li khankix mai kuad song pui khankix khrawm paox tix ka daux nyiex haw cao giex kaing li pa ting, pa kok mawh Kayaphax,
4 mai kum paox tix grawng kaing, sonsang pon lhen nyaw ti teei Nawh Cao yum heue.
5 Viang mawh nan kix ah nin “Ang mawh bawg yam yuh pawie, phan yuh nan, pa sung sang tak lih koe ka daux pui khankix heue.”
Marix Groi Sidah Bhawng
(Mak 14:3-9, Lukax 7:37-38; Yo 12:1-8)
6 Yam ot Yesux ka daux yaong Betanix, daux nyiex Simon pui sipawg,
7 bun tix kaux hoek ka Nawh Cao pa koe sidah bhawng pa kied ngawh, daux kawng simaox paing mai nawh groi sidah an piang kaing Nawh Cao yam ngawm Nawh mai sawm heue.
8 Yam yaox kawncau Nawh khankix, kix song rhawm ka ah nin, “Kieh nai giex going yuh nin yuh ka mawx?
9 Phan coh sidah bhawng in tak pon ngawh tom nie mai chix ti tawx ka pui hot pui sibhawm khankix heue.”
10 Viang mawh nan Yesux tawng grawng an mai ah nin ka kix, “Pex chuh ka bun in yuh ka mawx? Nawh hoik yuh kaing pa mhawm piang Aux heue.
11 Grawh grang nawh, pex ot tau mai pui hot pui sibhawm sijeung heue. Viang mawh nan Aux ang ot tau mai pex sijheung.
12 Ka daux pa groi nawh sidah bhawng piang tokaux Aux, nawh hoik cox khre son Aux, son pa sipaung ka Aux heue.
13 Aux krai lox tete ka pex, dee mawx ang ah, dee sidiex gau lox bwan gaux rhawm in piang haktiex khawmuik, krai grawh grawng ceu pa yuh bun in, sonsang doh keud ka nawh heue.”
Kham Ti Coh Yesux
(Mak 14:10-11; Luk 22:3-6)
14 Yam an, ka daux kawncau kao ra kaux, pa mawh tix kaux, Yudax Isakariut, hu ka cao giex kaing li pa ting khankix,
15 ah nin, “Phan aux tawx Nawh Cao ka pex, pex sang tawx pa tix ka aux?” kix tawx mau ka nawh tixngoe plah heue.
16 Jah ka yam an, nawh sawg bawg yam sang pon ti tawx Nawh Cao ka kix heue.
Ih Pawie Pasakha Mai Kawncau
(Mak 14:12-21; Luk 22:7-14, 21-23; Yo 13:21-30)
17 Ka daux singaix pa liang ih ka blah pa ang sau susaix, kawncau Nawh khankix hoek ka Yesux ah nin, “Maix mie ti kieh ex cox khre dee sang ih pawie Pasakha son Maix dee mawx?”
18 Nawh Cao ah nin, “Hu ka daux veng ka pui tix kaux mai ah nin ka nawh, Sara Cao gau ah nin, bawg yam Aux dex sang hoek, Aux sang ih pawie Pasakha tau mai kawncau Aux daux nyiex maix heue.”
19 Kawncau Nawh khankix yuh awm pa hoik nhie Yesux kix yuh mai kix cox khre pawie Pasakha heue.
20 Yam hoek ponbo, Nawh Cao ngawm ngeung mai sawm tau mai kawncau Nawh kao ra kaux,
21 mai yam sawm kix, Nawh Cao ah nin, “Aux krai lox tete ka pex, ka daux pex tix kaux tak sang tik sang tawx Aux heue.”
22 Kix kied khi rhawm kah mai kix tix kaux lai tix kaux, chawk ka Nawh Cao ah nin, “Simiang, mawh aux lie?”
23 Nawh Cao pawk lox ah nin, “Kaw pa hoik cawk taix nawh daux klong tau mai Aux, mawh pa sang tik sang tawx Aux heue.
24 Kawn kawn pui tak hu, awm hoik tiiem ti deuh grawng Nawh heue. Viang mawh nan, pui pa tik pa tawx ka Kawn kawn pui tak kha rhawm heue. Phan kaw an ang lih keh, nie lheu mhawm son nawh heue.”
25 Yudax, kaw pa tik pa tawx ka Nawh Cao pawk lox ah nin, “Rabi eue, mawh aux lie?” Nawh Cao ah nin ka nawh, “Mawh, awm pa hoik ah maix heue.”
Yesux Pang Pawie Cao
(Mak 14:22-26; Luk 22:14-20)
26 Yam sawm kix, Yesux teei blah mai nawb bwan mai sivit ti tawx ka kawncau Nawh khankix ah nin, “Teei, ih, in mawh tokaux Aux heue.”
27 Nawh Cao teei kawk mai yaogyaw bwanson mai tawx ka kix ah nin, “Pex khawmuik nyaux heue.
28 Kheu in mawh nham Aux pa dex dawd mai sijax mukheu pa khraox, pa lih son pui tom nie, sonsang ploi phimap khankix heue.
29 Aux krai ka pex, Aux tak ang lai nyaux rawm plix siiet in, tom hoek singaix nyaux Aux pa khraox tau mai pex, ka daux Meung Keeing Aux heue.”
30 Khaix hoik rhax kix lai rhax tix mu, kix lih hu ka gawng Sanlun heue.
31 Yam an Yesux ah nin ka kix, “Daux sawm in pex khawmuik tak prah ka Aux heue. Kheu hoik tiiem ah nin,
Aux tak pah cao liang yung,
mai cub yung an khankix,
tak prung prang heue.Ref 26:31 Zak 13:7; Yo 16:32
32 Viang mawh nan khaix hoik kaoh Aux, Aux tak sang hu sivoe pex ka daux meung Galilie heue.”
33 Petrux pawk lox mai ah nin ka Nawh Cao, “Phan khawmuik prah ka Maix kawx, aux tak ang prah tix bawg kawx heue.”
34 Yesux ah nin ka nawh, “Aux krai lox tete ka maix, daux sawm in ka ang ia nyang ux, maix tak sang thiang ti tik ti vud ka Aux loe bawg heue.”
35 Petrux baox ah nin ka Nawh Cao, “Phan aux yaox ti yum tau mai Maix kawx, ang aux doh thiang ti tik ka Maix heue.” Kawncau Nawh khawmuik kawx, ah nan heue.
Yesux Rawg Bwan
(Mak 14:32-42; Luk 22:39-46)
36 Khaix an Yesux hu tau mai kix tix dah ka dee kok mawh Kesasemanix mai ah nin ka kawncau Nawh khankix, “Pex ngawm tin yam Aux hu rawg bwan tan.”
37 Nawh Cao kok Petrux mai kawn Zebedie ra kaux hu tau mai Nawh mai Nawh khi rhawm mai sung sang rhawm heue.
38 Yam an Nawh Cao ah nin ka kix, “Aux kied khi rhawm tom dex sang yum, pex ot tin mai pau tau mai Aux heue.”
39 Nawh Cao hu sivoe ceeix mai grux gup mai rawg bwan, ah nin, “Keeing Aux eue, phan chix, kieh kawk in luan khaing Aux liak, viang mawh nan paw kieh mawh alo Aux, kieh mawh alo pa caw pa khaw rhawm Maix heue.”
40 Nawh Cao deeh hoek ka kawncau khankix mai yaox kix laig it mai ah nin ka Petrux, “Ang pex pon ti pau tau mai Aux tix nari khaing lie?
41 Pau mai rawg bwan heue, yuh ka mawx son ang pex sang laig ka daux pa nyaw glaw. Khuan koe rhawm tix sang yuh tete, viang mawh nan nex mawh pa iak riang iak rao heue.”
42 Nawh Cao baox deeh hu ra bawg tix bawg mai rawg bwan ah nin, “Keeing Aux eue, phan ang chix luan kheu aux ang nyaux ka kawk in, kieh mawh awm pa koe alo Maix heue.”
43 Nawh Cao baox deeh hoek mai yaox kix laig it, kheu cien ngai kix heue.
44 Mawh kheu nan, Nawh Cao baox prah kix tix bawg mai hu mai rawg bwan loe bawg tix bawg mai baox deeh rawg awm lox phao ka heue.
45 Yam an Nawh Cao baox hoek ka kawncau Nawh khankix mai ah nin ka kix, “Pex ca kawn it mai laux lee tix lie? Jhak heue, bawg yam nari dex sang hoek mai tak sang tik sang tawx ka Kawn kawn pui daux tawm taix pui phimap khankix heue.
46 Kaoh, ex hu heue, jhak heue, kaw pa sang tik sang tawx Aux dex hoek heue.”
Giex Ka Yesux
(Mak 14:43-50; Luk 22:47-53; Yo 18:3-12)
47 Yam kawn sikah Nawh Cao, Yudax pa mawh tix kaux ka daux kix kao ra kaux, hoek tau mai cub pui kied haoh hun pa viex vaid viex khaox mai lih hoek khaing cao giex kaing li pa ting mai kuad song pui khankix heue.
48 Yam an kaw pa tik pa tawx ka Nawh Cao hoik tawx mhai ka kix tix ceu pa ah nin, “Kaw pa ngheut aux, tak mawh kaw an, giex ka Nawh heue.”
49 Dom mawx dom an nawh hoek ka Yesux ah nin, “Rabi eue, kieh nyawm ot” mai ngheut ka Nawh Cao heue.
50 Yesux ah nin ka nawh, “Paox grawm eue, yuh awm pa sang yuh maix tin heue.” kix hoek mai taix kix tum piang Yesux mai giex ka Nawh heue.
51 Jhak heue, pui pa ot tau mai Yesux tix kaux, nyeu taix mai lawd vaid tix mai kid yhaok siliex cao giex kaing li pa ting piang khawmuik, dud heue.
52 Yam an Yesux ah nin ka nawh, “Deeh sau vaid maix daux phak tix. Grawh grawng nawh, pui pa giex vaid khawmuik, tak laux leeing ka vaid heue.
53 Maix lai ce Aux ang pon mhaing ka Keeing Aux, sonsang ploi Nawh kawncau Siyiex, pa nie lheu khaing kao ra lie cong hoek dom mawx dom an ka Aux yam in lie?
54 Phan mawh nan lox Phuk lai sigang khri, pa ah tak mawh nin, tak chix naog yuh ka mawx?”
55 Daux bawg yam nari an, Yesux ah nin ka cub pui hun khankix, “Pex viex vaid viex khaox hoek ti giex Aux awm giex ka pui tud rhim lie? Aux ngawm ti sidiex gau ka daux nyiex bwan ku singaix mai pex ang giex Aux.
56 Viang mawh nan, ceu in khawmuik hoik lih mawh, sonsang naog lox phuk lai sigang khri cao jhai khankix heue.” Yam an kawncau khankix khawmuik prah Nawh Cao mai to hu heue.
Ciied ka Yesux
(Mak 14:53-65; Luk 22:54-55, 63-71; Yo 18:13-14, 19-24)
57 Kix pa hoik teei Yesux khankix tuk Nawh hu ka Kayaphax, pa mawh cao giex kaing li pa ting piang khawmuik, dee pui tiiem lai mai kuad song khankix hoik khrawm paox tix heue.
58 Petrux hawt khaix Nawh Cao dee singai mai hoek ka brawk nyiex cao giex kaing li pa ting an mai laig ka daux mai ngawm tau mai pui pau yam khankix, sonsang yaox dee tom sidah heue.
59 Cao giex kaing li pa ting khankix mai cub bang kum sawg mhai rug pa ang mawh ang meh, grawh grawng Yesux, sonsang pon kix ti teei Nawh yum heue.
60 Viang mawh nan, kix ang yaox, viang mawh pui pa kham mhai rug pa ang mawh ang meh kawx hoek tom nie heue. Khaix an pui pa ghoik ra kaux hoek,
61 ah nin, “Pui in ah, Aux chix yieh nyiex bwan Siyiex laux mai chix deeh cox mhawm daux loe singaix heue.”Ref 26:61 Mat 24:2-27:40 Kawn 614; Yo 2:19
62 Cao giex kaing li pa ting piang khawmuik, kaoh cung mai ah nin ka Nawh Cao, “Maix ang koe lox pawk tidtix lie? Sakse pa kham pui inkix ka grawh grawng Maix mawh pa tix?”
63 Viang mawh nan, Yesux ang nye kah, cao giex kaing li pa ting an baox ah nin ka Nawh Cao, “Aux chawk ka Maix ka daux ceu kaux Siyiex pa im ju, krai yix mhong mawh Maix Khrit, Kawn Siyiex lie, ang mawh lie?”
64 Yesux ah nin ka nawh, “Mawh awm pa hoik ah maix, Aux krai ka maix, khaix in pex tak sang yaox Kawn kawn pui ngawm plak taix khawn dawm Sibrawm mai hoek piang paiawm raoma heue.”
65 Yam an cao giex kaing li pa ting an riah kraung ceep tix ah nin, “Kaw in hoik ah lox pa salao ka Siyiex, ex baox lo pui kham mhai rug yuh ka mawx? Jhak heue, pex hoik mhong lox pa salao ka Siyiex heue.
66 Pex ce yuh ka mawx?” Kix pawk lox ah nin, “Nawh keung ti yum heue.”
67 Yam an kix baig rawm mya ka pakngai Nawh Cao mai jhawp taix tix klah Nawh mai tix blah simang ka Nawh Cao,
68 ah nin, “Cao Khrit eue, krai lox jhai ka ex liak, mawh pui mawx pa tap toi ka Maix lie, krai lox jhai ka ex liak.”
Thiang Ti Tik Yesux
(Mak 14:66-72; Luk 22:56-62; Yo 18:15-18:25-27)
69 Yam an Petrux ngawm ka dee brawk nyiex mai bun tix kaux hoek ka nawh ah nin, “Maix kawx mawh pa ot tau mai Yesux pui meung Galilie heue.”
70 Viang mawh nan nawh thiang sivoe kix khawmuik ah nin, “Aux ang tawng ka grawng pa ah maix.”
71 Khaix hoik lih hu nawh ka grah nyiex, bun tang kaux yaox nawh mai ah nin ka kix pa ot tan, “Pui in kawx ot tau mai Yesux Pui veng Nazariet heue.”
72 Nawh baox deeh tiextu thiang ah nin, “Aux ang tawng ka Pui an.”
73 Khaix an tix vud kix pa cung dex tan ah nin ka Petrux, “Maix kawx mawh tix kaux daux kix tete, kheu lox sikah maix hoik jhi ka grawng maix heue.”
74 Yam an nawh jah ti jhax mai tiextu ah nin, “Aux ang tawng ka Pui an” dom mawx dom an ia ux heue.
75 Petrux doh keud ka lox pa hoik krai Yesux ah nin, “Ka ang ia nyang ux maix tak thiang ti tik ka Aux loe bawg heue.” Nawh lih hu mai nied ti yiiem heue.