25
Lox Tiag Bunkrih Kao Kaux
1 “Yam an meung raoma tak sang awm bunkrih kao kaux, pa teei kawk ngu kix mai hu rieb kaw pa yuh ka paox heue.
2 Ka daux kix, phwan kaux mawh bun deux mai phwan kaux mawh bun lhak pa koe pingnya heue.
3 Yam teei bun deux khankix ka kawk ngu, kix ang teei ti viex rawm bee hu mai tix.
4 Viang mawh nan, bun lhak pa koe pingnya khankix, teei ti viex rawm bee daux lawk mai kawk ngu kix heue.
5 Kheu kaw pa yuh ka paox ang nyang khran hoek, kix khawmuik gaing mai laig it heue.
6 Yam hoek bawg yam greung sawm, koe lox pa yo ah nin, jhak heue, kaw pa yuh ka paox hoik hoek, pex hu rieb ka nawh heue.
7 Yam an bunkrih an khawmuik kaoh mai cox kawk ngu kix heue.
8 Pa deux khankix ah nin ka pa lhak pa koe pingnya khankix, tawx rawm bee pex ka yix ceeix liak, kheu kawk ngu cie yix dex sang yeet heue.
9 Viang mawh nan pa lhak pa koe pingnya khankix pawk lox ah nin, ha rawm bee ang kub son yix mai son pex, pex hu liag ka pui pa coh rawm bee son tokaux pex heue.
10 Yam hu liag kix rawm bee, kaw pa yuh ka paox hoek mai kix pa hoik rien tix mhawm mhawm, laig tau mai nawh dee sang yuh pawie ka paox heue. Mai siviex hoik nyeep tix.
11 Khaix an bunkrih tang kaux phwan kaux an kawx hoek ah nin, Simiang eue, simiang eue, paoh siviex son yix liak.
12 Viang mawh nan nawh pawk lox ah nin, Aux krai lox tete ka pex, Aux ang tawng ka pex.
13 Mawh kheu nan pau ti jhak, kheu ang pex tawng singaix mai bawg yam nari an heue.”
Siliex Pa Kaux Sijax
(Luk 19:11-27)
14 “Grawh grawng nawh tak awm pui tix kaux pa sang hu ka tang praix klawng, pa kok siliex nawh khankix mai tawx kraung cie nawh ka kix heue.
15 Nawh tawx ka tix kaux phwan talantan mai baox tawx ka tix kaux ra talantan mai baox tawx ka tang kaux tix talantan, nawh tawx ka ku kaux awm pa chix kaux pui mawx kaux pui an mai lih hu heue.
16 Dom mawx dom an kaw pa hoik pon phwan talantan an hu yuh lai geu mai baox pon rao phwan talantan heue.
17 Awm an, kaw pa hoik pon ra talantan kawx, hu mai baox pon rao ra talantan heue.
18 Viang mawh nan kaw pa pon tix talantan, hu mai kaong daux tiex mai mox mau cie simiang nawh heue.
19 Yam hoik rheung, simiang siliex an khankix deeh hoek mai sawn carang mau mai kix heue.
20 Kaw pa hoik pon phwan talantan an hoek mai viex pa khraox phwan talantan ah nin, Simiang eue maix tawx ka aux phwan talantan, aux hoik baox pon rao phwan talantan heue.
21 Simiang nawh ah nin ka nawh, Mhawm heue, siliex pa mhawm mai pa kaux sijax eue, maix hoik kaux sijax piang pa iak pa tux, aux tak kieh maix ting piang ceu pa nie heue. Laig ka daux pa gaux rhawm simiang maix heue.
22 Kaw pa hoik pon ra talantan kawx hoek ah nin, Simiang eue, maix tawx ka aux ra talantan, aux hoik baox pon rao ra talantan heue.
23 Simiang nawh ah nin ka nawh, Mhawm heue, siliex pa mhawm mai pa kaux sijax eue, maix hoik kaux sijax piang pa iak pa tux, aux tak kieh maix ting piang ceu pa nie heue. Laig ka daux pa gaux rhawm simiang maix heue.
24 Kaw pa hoik pon tix talantan kawx hoek ah nin, Simiang eue, aux tawng maix mawh pui nu tix ah, pa vawg dee ang maix rhuat mai pa khrawm dee ang maix van heue.
25 Aux tom lhat mai aux hu mox talantan maix ka daux tiex, jhak heue, pa mawh cie maix kawn koe heue.
26 Simiang nawh pawk lox mai ah nin ka nawh, Siliex pa caox mai pa nieh eue, maix tawng grawh grawng aux vawg dee ang aux rhuat mai khrawm dee ang aux van.
27 Mawh kheu nan maix khaw ti sau mau aux daux nyiex mau mai yam deeh hoek aux, aux tak deeh pon num mai rao mau cie aux heue.
28 Mawh kheu nan pex teei talantan an khaing nawh mai tawx ka kaw pa koe kao talantan an heue.
29 Grawh grawng nawh, pa koe ku kaux daux pui tak sang baox tawx ka nawh mai nawh tak sang nie grum koe heue. Viang mawh nan, kaw pa ang koe, viang pa hoik koe nawh kawx tak sang teei khaing nawh heue.
30 Grheu siliex pa ang koe bwanson an lih plak praix daux pa faik, dee tak yiiem riag mai dee greeik rhang heue.”
Grawng Pa Prawng Ca
31 “Yam tak sang hoek Kawn kawn pui ka daux min pakngai Nawh, tau mai kawncau Siyiex khawmuik, yam an Nawh tak sang ngawm piang dang ngeung min pakngai Nawh.
32 Ceu pui khawmuik tak sang krawk khrawm paox tix sivoe Nawh mai Nawh tak sang gwieh kix tix kaux khaing tix kaux, awm pui liang yung gwieh yung khaing pex khankix heue.
33 Nawh tak sang deuh yung khankix plak taix khawn dawm Nawh, viang mawh nan pex khankix tak sang deuh plak khawn gwiex heue.
34 Yam an Simiang tak sang ah ka kix pa ot plak taix khawn dawm Nawh, Hoek heue, pex pa hoik pon bwanson khaing Keeing aux, teei sin Meung pa hoik cox son pex, tom yam jah ti kaw haktiex heue.
35 Yam cai rhawm Aux pex tawx Aux sawm, yam sang nyaux nie Aux rawm mai pex tawx Aux nyaux mai yam mawh Aux nyo pex rieb ti teei Aux.
36 Yam ot Aux kakaong, pex tawx Aux ceep kraung. Yam saux Aux pex hoek ti priex pau Aux mai yam ot Aux ka daux thawng pex hoek ka Aux heue.
37 Yam an pui rahsee khankix tak sang pawk lox ah nin ka Nawh, Simiang eue, ex yaox yam cai rhawm Maix mai tawx Maix sawm lai mawx? Ex yaox yam sang nyaux nie Maix rawm mai tawx Maix nyaux lai mawx?
38 Ex yaox yam mawh Maix nyo mai rieb ti teei Maix lai mawx? Ex yaox ot Maix kakaong mai tawx Maix ceep kraung lai mawx?
39 Ex yaox yam saux Maix phan ang mawh nan yam ot Maix daux thawng mai hoek ka Maix lai mawx?
40 Simiang tak sang pawk lox ah nin ka kix, Aux krai lox tete ka pex, pa yuh pex ka pui pa iak ka daux puxaik Aux khankix tix kaux, pex hoik yuh ka Aux heue.
41 Yam an, ka kix pa ot plak taix khawn gwiex Nawh kawx, Nawh tak sang ah nin, pex pa mawh pa hoik jhax lawg eue, lih khaing Aux mai laig ka daux ngu leeing ju, pa hoik cox son phicaox mai kawncau nawh khankix heue.
42 Kheu pex ang tawx aux ih ceu pa ih tid tix yam cai rhawm Aux. Yam sang nyaux nie Aux ka rawm, pex ang tawx Aux nyaux.
43 Yam mawh Aux nyo sinie mai pex ang rieb ti teei Aux. Yam ot Aux mai kakaong, pex ang tawx Aux ceep kraung. Yam saux mai ot daux thawng pex ang hoek ka Aux.
44 Yam an kix kawx tak sang pawk lox ah nin, Simiang eue, ex yaox Maix cai rhawm lai mawx, yam sang nyaux nie Maix rawm, yam mawh nyo, yam ot kakaong, yam saux, yam ot daux thawng mai ang kia ngien Maix lai mawx?
45 Yam an Nawh tak sang pawk lox ah nin ka kix, Aux krai lox tete ka pex, pa ang pex yuh ka kaw pa iak khaing paox tix khankix in tix kaux, pex ang yuh ka Aux heue.
46 Kix tak sang hu laig ka daux pa ciyang leeing ju heue. Viang mawh nan pa rahsee khankix tak sang laig ka ju leeing ju heue.”