1  Nghiet ka lox Siyiex, yaog ti kaoh mai krai grawng see maix ka plak sivoe gawng khankix mai kieh ton khankix mhong ka lox maix heue. 2 Gawng khankix mai num riah haktiex khankix eue, nghiet ka lox grawng see prawng Siyiex heue. Grawh grawng nawh, Siyiex hoik koe grawng see pa sang yuh krax pa thung thiang ka ceu pui Isarelax heue. 3 Pui Aux khankix eue, mawh yuh aux ceu patix ka maix lie? Mawh hoik yuh Aux maix koe krax meet rhawm ka ceu patix lie? Tawx mhai ruk ka Aux heue. 4 Aux hoik viex maix lih hoek khaing meung Ejiptux mai hoik taoh maix khaing nyiex ma krax pa kham maix ti yuh siliex mai Aux hoik ploi Mose, Arun mai Meriam hu ka plak sivoe maix heue.Ref 6:4 Lih 4:10-16, 12:50-51, 15:20 5 Ceu pui Aux khankix eue, doh keud ka ceu pa hoik yuh Balak, pa mawh simiang haktiex Mawbax mai lox pa hoik deeh pawk Balam, pa mawh kawn simex Bawrax ka nawh, khawm ceu pa yaox pex jah ka veng Shittim tom hoek ka veng Gilagalax, sonsang kieh maix Ref 6:5 Si 22:2-24:25; Josh 3:1-4:19 tawng ka krax pa mawh meh Siyiex heue. 6 Aux tak hoek ka plak sivoe Siyiex mai grux ti krub ka plak sivoe Siyiex pa kied ting kied lhaong tau mai ceu patix nie? Mawh tak sang hoek aux ka Nawh Cao tau mai krax tan pa gleeing khankix mai khawm kawn mawie iak pa koe ju tix num lie? 7 Siyiex khex khaw rhawm ka yung mhaing khankix kaing rheng, phan ang mawh nan, klawng rawm bee kaing mheen lie? Aux khex sang tan kawn Ai tix son krax pa lud aux, kawn Ai num pa kaoh khaing tokaux aux son phimap khuan ju aux lie? 8 Kawn pui eue, Nawh Cao hoik jhi maix yaox ka ceu pa mhawm mai mhaing Siyiex ceu patix khaing maix lie? Mawh son pa yuh maix krax pa rahsee mai sonsang moh ka krax pa caux rhawm mai sonsang koe krax pa tiem rhawm mai hu tix tau mai Siyiex ang mawh lie?

9 Siyiex kok yo ka veng in, pui pa koe pingnya cuyi tak sang lhat graung ka ceu kaux Nawh Cao heue. Nghiet heue, mawh pui mawx pa hoik tat ti deuh khaox sivied lie? 10 Ka daux nyiex pui pa ang rahsee kawn koe kraung sinngao pa ang rahsee khankix mai kawk tong pa iak ceu pa seeing brai ang mawh lie? 11 Phan Aux shiao jiang pa ang rahsee mai khawm hau kla jiang pie lhen khankix, aux khex kawn sawn ti mawh pa singax lie? 12 Pui pa mag mi daux veng in mawh pa naog ka krax pa kin, pui pa ot ka daux veng an khankix hoik ah lox pie lhen mai dak daux jheeh kix mawh pa pie lhen heue. 13 “Mawh kheu nan, Aux sang tawx maix kham geu krax saux pa kied kin, ka krax pa sang yuh tix maix laux leeing kheu phimap maix khankix heue. 14 Maix tak ih mai ang sak, krax pa cai rhawm tak sang koe ka daux sigreung maix heue. Maix tak teei ti luan mai ang pon taoh tix mai pa deeh taoh tix khankix, Aux tak sang ap ti tawx ka vaig lawm heue. 15 Maix tak rhuat simie mai ang yaox ti vawg maix biiet plix khaox sanlun khankix mai ang yaox ti awt tokaux tix ka rawm bee mai biiet rawm plix siiet kawx ang yaox ti nyaux ka rawm plix siiet heue. 16 Grawh grawng nawh maix hoik hawt ti priex been deuh simiang Amorix khankix, hawt yuh kaing pa yuh nyiex ma simiang Ahap mai kawn hawt ti hu ka daux krax pa keud pa sawn kix mawh kheu nan, Aux tak sang kieh maix mawh dee pa yiien hu pui mai kieh can pui pa ot ka daux maix khankix mawh pa kham krax pa nyiah pui tix maix tak sang yaox ti kham geu krax pa kaik tua pui Aux khankix heue.Ref 6:16 1Sim 16:23-34, 21:25-26