1 Kawn bun cub lien khankix eue, yam in kraix khrawm paox pex hoek ka daux cub lien khankix heue. Pui koeng hoik lai lawm ka ex heue. Kix tak sang sivied sibax cao pa prawng ceu pui Isarelax ka gawng khaox heue.

2 Veng Bieliehiem, Epharat eue, viang maix mawh veng pa iak ka daux sinax veng meung Yudax khankix kawx, kheu cao giex kaing tak sang lih khaing maix tix kaux ka son Aux, pa sang mawh cao pa kwang ka daux ceu pui Isarelax, pa hoik dawg koe tom yam jah yam kaw dix heue.Ref 5:2 Mat 2:6; Yo 7:42 3 Mawh kheu nan, Nawh Cao tak sang ap ti tawx kix ka pui koeng tom sidah hoek bawg yam hoik keh bun an kawn tix ka daux krax pa saux heue. Yam an pui pa kawn deuk khaing daux puxaik nawh khankix tak sang deeh ing ka ceu pui Isarelax heue. 4 Nawh tak sang cung kaux cong mai liang ka cub phung yung nawh, ka daux riang rao Siyiex, ka daux min sibrawm kwang ceu kaux Siyiex, pa mawh Siyiex nawh mai kix tak sang ot kaux cong kah heue. Grawh grawng nawh, nawh tak sang mawh pa ting lhaong, tom hoek ka dee sidah sidu haktiex heue.

5 Simiang in tak sang mawh krax pa nhim, yam hoek ceu pui Asurix ka daux haktiex ex mai yam dig nawh ka daux nyiex haw ex, ex tak sang yaog ti deuh cao liang yung aliah kaux mai simiang khankix daix kaux, puing ka nawh heue. 6 Kix tak sang laux yuh haktiex Asurix ka vaig mai khawm ka daux diang laig ka haktiex Nimrot heue. Nawh tak sang deeh taoh ex khaing daux tawm taix pui Asurix yam hoek kix ka daux haktiex ex mai yam dig kix ka plak daux mee haktiex ex khankix heue.Ref 5:6 Jah 10:8-11 7 Ceu pui Yakop pa kawn deuk khankix, tak ot ka daux sinax pui khankix tom nie, awm rawm ciex pa lih hoek khaing Siyiex, awm rawm lhiex poe ka piang rib, pa ang lo ti pau riang rao pui mai pa ang lo ti krox jun krax teem kawn pui khankix heue. 8 Ceu pui Yakop pa kawn deuk khankix, tak ot ka dau sinax ceu pui tang ceu ka daux sinax pui khankix tom nie, awm sivai sangsi daux sinax totiag ka daux tiag daux nong, awm kawn sivai sangsi iak ka daux sinax cub phung yung khankix mai phan sivai sangsi an tiang ti hu, nawh tak dig mai puk paig ankix phawng mai pui tix kaux kawx ang lai pon ti taoh heue. 9 Taix maix tak sang mawh pa yaog ti lhaong ka piang pui koeng maix khankix mai pui koeng maix tak sang mawh pa tat ti tik heue. 10 Ka daux ngaix an, Siyiex ah nin, “Aux tak sang tat ti tik brung maix khankix khaing daux sinax maix mai yuh ling lawx maix khankix laux heue.” 11 “Aux tak sang tat ti tik veng maix khankix khaing daux haktiex maix mai yieh ti tik can dee kaux dee cong maix khankix khawmuik heue.” 12 Aux tak sang tat ti tik pui pa koe preu khaing daux taix maix mai maix tak ang lai koe cao pa sibawk khankix heue. 13 Aux tak sang baox tat ti tik riang grang pa hoik saik maix khankix mai khawm rong pa krub maix khankix khaing daux sigreung maix heue. Maix tak ang lai yaox ti krub ka kaing pa yuh maix ka taix tix khaix in tix bawg kawx heue. 14 Aux tak sang laoh ti tik khaox riang grang Asherax khaing daux sinax maix mai tak sang yuh veng maix khankix laux heue. 15 Aux tak sang ciyang ti pawk bix ka daux krax pa saux rhawm saux rhi mai ka daux krax pa song rhawm, ka piang ceu pui tang ceu, pa ang cu ti nghiet ka lox Aux heue.