1 Simiang Siyiex ah nin ka Mose, 2 “Viex Arun mai kawn simex nawh khankix tau mai kraung ceep mai bee pa sang groi mai mawie mhaing son krax tan pa pluat ploi mai kawn yung mhaing ra mu mai blah pa ang sau susaix tix khrawng, 3 mai krawk khrawm cub pui hun ka diang siviex nyiex gox bwan man bang kum.” 4 Mose yuh awm lox pa tawm Simiang Siyiex ka nawh mai cub pui hun khankix khrawm paox tix ka diang siviex nyiex gox bwan man bang kum. 5 Mose ah nin ka cub pui hun, “In mawh lox pa hoik tawm Simiang Siyiex sonsang hawt yuh.” 6 Mose viex Arun mai kawn simex nawh khankix mai heem kix ka rawm. 7 Nawh ceep sibex dhah plak daux ka Arun mai rhawt maox rawd nyoi mai ceep sibex dhah plak piang mai deeh ceep sibex dhah dawd taix piang nawh mai rhawt ka man pa taing ka keei kuceu, pa koe piang sibex dhah dawd taix mai rhawt piang an. 8 Sau man tie naok piang naok nawh mai deeh sau Urim mai Tumim ka daux man tie naok an. 9 Ceep lawk kaing ka kaing Arun mai kawb khlawp khri ka sivoe ngai man lawk kaing pa mawh mok khri awm pa hoik tawm Simiang Siyiex ka Mose. 10 Mose teei bee groi mai groi ka nyiex gox bwan man mai can pa koe daux nyiex mai yuh an khankix singax singeh, 11 Nawh phruah bee piang khu dee tan aliah bawg mai groi ka khu dee tan mai can kraung pa shiao, ka pan khoek mai khawm ka caong nawh sonsang mawh pa singax singeh. 12 Nawh groi bee groi piang kaing Arun mai groi nawh ka bee sonsang singax singeh. 13 Mose deeh kok ka kawn simex Arun khankix mai ceep sibex dhah plak daux piang kix mai rhawt maox rawd nyoi ka kix mai baox dee ceep mhok piang kix awm gumlox pa hoik tawm Simiang Siyiex ka Mose. 14 Nawh tuk mawie mhaing, son krax tan pa pluat ploi phimap, Arun mai kawn simex nawh khankix, deuh taix tix piang kaing mawie mhaing an, son krax tan pa pluat ploi phimap. 15 Mose pah ka mawie an mai teei nham ka giien taix tix mai sau piang rung khu dee tan hawt vung viang khawmuik mai kieh khu dee tan singax ka, nham pa kawn deuk nawh hieh ka caong khu dee tan kieh mawh pa singax singeh sonsang yuh krax pa pluat ploi. 16 Nawh teei khlawp bee pa koe piang kraung vaig mai bee pa kawb tawm mai pa kawb soklax ra mu mai Mose gleeing an khankix piang khu dee tan. 17 Nawh tak gleeing mawie an khawm hak, nex mai roeng ka ngu ka plak praix nyiex bang awm gumlox pa hoik tawm Simiang Siyiex ka Mose. 18 Nawh deeh viex kawn yung mhaing son krax tan pa gleeing, Arun mai kawn simex nawh khankix deuh taix tix piang kaing kawn yung an. 19 Mose pah to tan an mai phruah nham piang khu hawt vung viang khu dee tan, 20 Nawh tat nex kawn yung khik mawx khik an mai Mose gleeing kaing mai khik nex mai khlawp bee khankix, 21 sigrhah kraung vaig mai caong ka rawm, Mose gleeing kawn yung khawm mu piang khu dee tan, mawh krax tan pa gleeing pa sioe bhawng mai krax tan pa gleeing ka ngu son Siyiex awm gumlox pa hoik tawm Simiang Siyiex ka Mose. 22 Nawh deeh viex kawn yung mhaing baox tix mu pa hoik laug sonsang tawx ara ka Arun mai kawn simex nawh khankix deuh taix tix piang kaing kawn yung an. 23 Mose pah to tan an mai teei nham tiblah sau ka dawng yhaok plak dawm Arun mai piang giien ting taix khawn dawm mai piang giien ting caong khawn dawm. 24 Khaix an nawh kok kawn simex Arun khankix, Mose sau nham tiblah piang giien ting taix khawn dawm kix mai piang dawng yhaok khawn dawm kix mai piang giien ting caong khawn dawm mai Mose phruah nham hawt vung viang piang khu dee tan. 25 Nawh teei khlawp bee mai sidax, khlawp bee pa koe piang kraung vaig khawmuik mai khlawp bee pa kawb tawm mai bee pa kawb soklax ra mu mai bee khankix mai, ba khawn dawm, 26 Nawh teei blah tix lon pa ang sau susaix khaing kraung pa deuk sivoe Simiang Siyiex, nawh teei blah pa ang sau susaix pa mawh blah pa hoik yuh ka bee mai blah rhi khlawp tix khlawp, nawh deuh piang khlawp bee mai piang ba khawn dawm, 27 Nawh sau an khankix ka daux tawm taix Arun mai kawn simex nawh khankix, yang yeuh an khankix ka plak sivoe Simiang Siyiex mai yuh krax tan pa yang yeuh. 28 Mose teei an khaing daux tawm taix kix mai gleeing piang khu dee tan krax tan pa gleeing, an mawh krax tan pa sioe bhawng pa tawx ara, mawh krax tan pa gleeing ka ngu son Siyiex. 29 Mose teei nex euk mai yang yeuh sivoe Simiang Siyiex, mai yuh krax tan pa yang yeuh, nex euk kawn yung pa tawx ara an mawh nyum cie Mose, awm gumlox pa hoik tawm Simiang Siyiex ka Mose. 30 Mose teei bee groi tiblah mai nham tiblah, pa koe piang khu dee tan mai, phruah piang Arun mai kraung ceep nawh mai piang kawn simex mai kraung ceep kix, nawh kieh Arun mai kraung ceep nawh mai kawn simex nawh khankix, singax singeh tau mai nawh. 31 Mose ah nin ka Arun mai kawn simex nawh khankix, “Ngaik nex hawt diang siviex nyiex gox bwan man bang kum, ih tan tau mai blah pa koe daux khrawng pa tan son pa tawx ara, awm gumlox pa hoik tawm Aux ah nin, Arun mai kawn simex nawh khankix tak ih an, 32 Maix tak gleeing can nex pa kawn deuk mai blah ka ngu. 33 Maix tak ang pon ti lih ka praix diang siviex nyiex gox bwan man bang kum been aliah ngaix, tom ang singaix bawg yam tawx ara ka maix nyang sidah, mawh kheu bawg yam tawx ara ka maix rheeng aliah singaix. 34 Awm pa hoik yuh ka daux in singaix, Siyiex hoik tawm lox, sonsang yuh krax pa pluat ploi son pex. 35 Maix tak ot ka diang siviex nyiex gox bwan man bang kum aliah singaix ku singaix mai yuh kaing jhaw pa tawx Siyiex, son ang maix sang yum awm gumlox pa hoik tawm ka aux yuh nin.” 36 Mawh kheu nan, Arun mai kawn simex nawh khankix, yuh ceu an awm gumlox pa hoik tawm Simiang Siyiex ka Mose heue.