7
Been Krax Tan Pa Pluat Pa Lud
1 Grawng been son krax tan pa pluat ploi pa lud mawh pa kied singax singeh,
2 Ka dee pah kix to tan pa gleeing kix tak pah krax tan pa pluat ploi krax lud, tak phruah nham hawt vung viang piang khu dee tan khawmuik.
3 Nawh tak tan khlawp bee nawh khawmuik tau mai bee pa koe plak sidax mai bee pa kheem piang kraung vaig,
4 mai soklax ra mu mai bee pa koe ka plak daux nyoi mai khlawp bee pa kawb tawm, piang soklax khankix nawh tak teei lih,
5 mai cao giex kaing li tak gleeing an piang khu dee tan awm krax tan pa gleeing ka ngu ka Siyiex, an mawh krax tan pa pluat ploi krax lud.
6 Can simex daux cao giex kaing li khankix, tak yaox ti ih an, mai caw ti ih dee pa singax singeh, an mawh pa kied singax singeh.
7 Krax tan son pa pluat ploi krax lud mawh pa awm krax tan pa pluat ploi phimap, been an mawh ngie tix mu khaing, cao giex kaing li pa yuh ti tawx krax khyox khaw ka son an khankix tak pon ti cie an.
8 Cao giex kaing li pa yuh krax tan pa gleeing son pui tix kaux kaux mai cao giex kaing li an tak yaox ti cie hak krax tan pa gleeing pa hoik tan nawh.
9 Krax tan phawng nghox ca im kuceu pa hoik ping sin ka daux glah ngu mai can pa hoik khre rien nawh ka daux aw khang phan ang mawh nan ka daux diang rhiem tak mawh cie cao giex kaing li pa yuh krax tan ka son an.
10 Can krax tan phawng nghox ca im, pa hoik klu klao tix ka bee ang ah, pa kroh ang ah tak mawh cie kawn simex Arun khankix, kieh kix gwieh sidu awm paox tix heue.
Grawng Been Krax Tan Pa Nhim
11 “In mawh grawng been son krax tan pa appong krax tan pa nhim pa tak sang tan ti ka Simiang Siyiex.
12 Phan nawh yuh krax tan son pa yaogyaw, khaix an nawh tak yuh krax tan an tau mai krax tan pa yaogyaw ka blah rhi khlawp pa klu klao ka bee pa ang sau susaix, blah rhi khlawp pa yuh ka phawng nghox ca im, pa hoik klu klao ti mai bee pa hoik diag sin.
13 Lheu khaing blah rhi khlawp an nawh tak yuh blah pa sau susaix tau mai son krax tan pa yaogyaw ka krax tan pa nhim.
14 Khaing ka daux krax tan blah rhi khlawp kuceu, nawh tak teei tix ceu tix khlawp pa yaog ka Siyiex, an tak mawh cie cao giex kaing li pa phruah nham krax tan pa nhim.
15 Nex pa yuh nawh krax tan pa yaogyaw son krax pa nhim tak ih nex an ka daux singaix pa yuh nawh krax tan, nawh tak ang pon ti deuh an tom hoek plak ponngawb.
16 Viang mawh nan, phan mawh krax tan pa hoik yuh nawh sijax ang ah mai krax tan pa kaoh khaing rhawm nawh ang ah, tak yaox ti ih ka daux singaix pa yuh ti krax tan mai pa kawn deuk tak pon ti ih tom hoek singaix khaix,
17 nex pa kawn deuk khaing krax tan khankix yam hoek loe ngaix tix ngaix, tak caw ti gleeing ka ngu,
18 Yam hoek loe ngaix tix ngaix phan ih ka nex krax tan pa nhim an ceeix ngie khaing, Siyiex ang khaw rhawm ka cao pa tan an, tak mawh pa seeing brai mai pui pa ih ka an khankix tak yaox ti kham phimap.
19 Nex pa hoik teeh ka ceu pa seeing brai tix ceuceu tak ang pon ti ih, an tak caw ti gleeing ka ngu. Can pui pa singax ku kaux tak pon ti ih ka nex pa singax an.
20 Phan pui tix kaux kaux ih ka nex krax tan pa nhim pa appong ka Simiang Siyiex, yam ang tokaux tix singax tak teei ti tik pui an khaing ceu pui nawh.
21 Phan pui tix kaux kaux hu teeh ka pa seeing brai, pa seeing khaing kawn pui ang ah khaing tobrie ang ah, can viag pa seeing pa ang singax tix ceuceu mai ih ka nex krax tan pa nhim pa appong ka Siyiex, tak teei ti tik pui an khaing ceu pui nawh heue.”
Ang Pon tix Ih Ka Bee Nham
22 Khaix an Simiang Siyiex krai ah nin ka Mose,
23 “Krai ka pui Isarelax khankix, pex tak ang pon ti ih khlawp bee mawie, yung mai khlawp bee pex,
24 khlawp bee totiag pa tang yum mai bee tobrie pa hoik kiied totiag khankix, tak shiao son tang ceu mai pex ang pon ti ih ka.
25 Pui pa ih ka khlawp bee tobrie pa hoik gleeing ka ngu, Siyiex tak teei ti tik pui an khaing ceu pui nawh.
26 Lheu khaing an, pex tak ang pon ti ih nham tix ceu kawx, ka can dee ot tix, pa mawh nham ang ah mai nham totiag ang ah,
27 can pui pa ih nham tix ceuceu tak teei ti tik pui an khaing ceu pui nawh.Ref 7:26-27 Jah 9:4; Krub 17:10-14; 19:26; Pi 12:16, 23; 15:23.
Yung Cie Arun Kawn Simex Nawh
28 Khaix an, Simiang Siyiex ah nin ka Mose,
29 “Krai ka pui Isarelax khankix pui pa yuh krax tan pa nhim pa appong ka Siyiex, nawh tak viex krax tan ti hoek ka Siyiex khaing krax tan pa nhim,
30 tokaux nawh tak yaox ti viex krax tan pa gleeing ka ngu son Siyiex, nawh tak viex khlawp bee tau mai nex euk, son nex euk pa mawh krax tan yang yeuh mai yang yeuh sivoe Simiang Siyiex.
31 Cao giex kaing li tak gleeing khlawp bee piang khu dee tan mai nex euk an tak mawh cie Arun mai kawn simex nawh khankix.
32 Maix tak tawx ba khawn dawm ka cao giex kaing li, son krax tan pa yaog khaing krax tan pa nhim pa appong tix.
33 Ka daux kawn simex Arun khankix, pa tan nham mai khlawp bee son krax tan pa nhim, ba taix khawn dawm tak mawh nyum cie nawh.
34 Mawh kheu nex euk krax tan pa yang yeuh an mai ba krax tan pa yaog Aux hoik teei khaing pui Isarelax khankix mai khaing pa appong kix krax tan pa nhim, Aux hoik tawx ka cao giex kaing li Arun mai kawn simex nawh khankix, Aux hoik deuh mawh pingnyap leeing ju ka daux ceu pui Isarelax.
35 In mawh yung pa pon Arun mai kawn simex nawh khankix khaing krax tan pa gleeing ka ngu ka Siyiex, ka daux singaix pa hoik ap kix yuh kaing jhaw cao giex kaing li cie Siyiex.
36 Siyiex hoik tawx lox ka pui Isarelax khankix mai ap ceu in ka kix, jah ka singaix pa hoik kham kix ti rieb pa groi rawm bee, an hoik mawh pingnyap leeing ju ka daux doeh ru kix tix ju hoik tix ju.”
37 In mawh grawng been krax tan pa gleeing, krax tan phawng nghox ca im, krax tan pa pluat ploi phimap, krax tan pa pluat ploi krax lud, krax tan pa nhim in mawh grawng krax pa appong ti yam yuh kaing jhaw pa singax singeh.
38 Pa hoik tawm Simiang Siyiex ka Mose piang gawng Sina daux singaix tawm Nawh Cao pui Isarelax khankix sonsang viex krax tan ka Siyiex ka daux tiag Sina heue.