5
Krax Tan Son Krax Lud
1 “Phan pui tix kaux kaux mhong lox pa tiextu tix ceu mai nawh mawh mhai rug an mai phan nawh yaox ka an mai tawng ka grawng an, phan nawh ang krai, nawh tak yaox ti kham ka phimap.
2 Phan pui tix kaux loe ti teeh ka pa ang singax tix ceuceu, pa mawh to yum totiag pa ang singax ang ah, to yum tobrie pa ang singax khankix ang ah, to yum totiag can ceu pa im ju chix mu ang ah mai an khankix pa ang tien yaox, nawh lih ti mawh pa ang singax nawh tak lud.
3 Phan nawh loe ti teeh ka ceu pa ang singax, pa koe ka pui khankix mai an lih mawh pa seeing yuh nawh, khaix hoik tawng nawh ka an nawh tak lih mawh pa lud.
4 Phan pui tix kaux kaux tiextu mai ang koe krax keud, sonsang yuh ceu pa caox ang ah, ceu pa mhawm ang ah mai pa hoik tiextu pui tix kaux ka nawh, ka ceu pa ang nawh tien tawng ka sivoe nawh khankix, yam hoik deeh tawng nawh grawng an, nawh tak lih koe pa lud ka grawng an.
5 Yam hoik koe krax lud nawh ka grawng ceu an khankix, nawh tak yaox ti krai sidawng phimap tix mai khyox khaw,
6 mai nawh tak viex krax tan ka Siyiex son phimap pa hoik yuh ti ka kawn yung shiang tix mu, phan ang mawh nan, kawn pex shiang tix mu, son krax tan pa pluat ploi phimap tix, cao giex kaing li tak khyox khaw son phimap pa hoik yuh nawh.
7 Phan nawh ang pon tan kawn yung iak, nawh tak teei ti tan sikaux ra mu phan ang mawh nan, kawn keukie ra mu ka Simiang Siyiex, son krax lud pa hoik yuh ti, son krax tan pa pluat ploi phimap tix mu, mai son krax tan pa gleeing tix mu.
8 Nawh tak viex an hoek ka cao giex kaing li mai cao giex kaing li tak tan krax tan pa pluat ploi phimap phao ka mai siyiied kaing khaing ngawg an, viang mawh nan ang pon ti kieh dud,
9 nawh tak phruah nham krax tan pa pluat ploi phimap tiblah ka praok khu dee tan mai nham pa kawn deuk tak biiet ka caong khu dee tan, in mawh krax tan pa pluat ploi phimap.
10 Nawh deeh tan sim an ra mu tix mu, son krax tan pa gleeing awm pa hoik koe lox tawm pingnyap, mai cao giex kaing li tak yuh krax khyox khaw tang nawh mai son phimap pa hoik lud nawh mai nawh tak pon krax pluat ploi phimap.
11 Phan nawh ang pon viex sikaux ra mu, keukie ra mu ang ah, pui pa hoik lud an, tak viex phawng gaox nghox ca ceu pa mhawm kao son tix son, khaing tix Epha hoek son krax pluat ploi phimap, nawh tak ang pon ti sau bee mai lawpan piang, kheu mawh an krax tan pa pluat ploi phimap.
12 Nawh tak viex an hoek ka cao giex kaing li mai cao giex kaing li tak teei phawng nghox ca tix jhawp sonsang mawh pa doh keud mai gleeing an piang khu dee tan, awm krax tan pa gleeing ka ngu son Simiang Siyiex, in mawh krax tan pa pluat ploi phimap.
13 Cao giex kaing li tak yuh krax khyox khaw son phimap pa hoik lud nawh ka grawng tix ceuceu, nawh tak pon krax pa pluat ploi mai pa kawn deuk khankix tak mawh cie cao giex kaing li, awm krax tan phawng nghox ca im heue.”
Krax Tan Pa Pluat Ploi Krax Lud
14 Siyiex krai ah nin ka Mose,
15 “Phan pui tix kaux kaux lud ka ceu pa ang ti tien tawng ka ceu pa singax singeh Siyiex mai lih ti mawh phimap, nawh tak viex kawn yung mhaing phan ang mawh nan, kawn pex mhaing pa loig hoek ka Siyiex tix mu sonsang mawh krax tan pa pluat ploi krax lud maix tat jum tobrie an ka mau shekhe pa hoik ciang ti ka jiang dee pa singax singeh, in mawh krax tan pa pluat ploi pa lud.
16 Kieh nawh viied son pa lud loe nawh ka kraung pa dex mai dee pa singax singeh mai nawh tak dee baox thie piang an phwan son tix son mai ap ka cao giex kaing li, cao giex kaing li tak yuh pa khyox khaw son nawh, ka kawn yung son krax tan pa pluat ploi pa lud, nawh tak pon krax pluat ploi.
17 Phan pui tix kaux kaux lud loe, ka lox tawm Simiang Siyiex pa ang kieh nawh yuh, tix ceuceu viang nawh ang tawng pa yuh tix lud kawx, nawh hoik lud mai tak yaox ti kham geu son phimap an.
18 Nawh tak yaox ti viex kawn yung mhaing, phan ang mawh nan, kawn pex mhaing pa loig tix mu ka cao giex kaing li tau mai mau ngawh viied son krax tan pa lud tix mai son pa ang nawh koe krax tawng yung, ka daux pa hoik lud loe tix mai cao giex kaing li tak yuh pa khyox khaw ka son nawh, nawh tak pon pa pluat ploi.
19 An mawh krax tan pa pluat ploi krax lud, mawh kheu hoik lud nawh ka Simiang Siyiex heue.”