1 Simiang Siyiex ah nin ka Mose, 2 “Krai ah nin ka pui Isarelax khankix, phan pui tix kaux kaux lud ka gumlox pingnyap Siyiex ka daux pa ang nawh khaw ti yuh tix ceuceu, 3 mai phan cao giex kaing li pa hoik groi rawm bee ka lud mai kieh krax lud hoek piang pui khankix, kieh nawh viex krax tan ka mawie mhaing pa loig son krax tan pa pluat ploi phimap ka sivoe Simiang Siyiex, 4 nawh tak viex mawie mhaing hoek ka diang siviex nyiex gox bwan man bang kum ka sivoe Simiang Siyiex, nawh tak deuh taix tix piang kaing mawie an mai pah ka sivoe Simiang Siyiex. 5 Cao giex kaing li pa hoik groi rawm bee kah tak teei nham mawie an tiblah mai viex hoek ka nyiex gox bwan man bang kum, 6 cao giex kaing li tak cub giien taix tix ka daux nham mai phruah nham aliah bawg ka sivoe Simiang Siyiex, sivoe man tie dee pa singax singeh. 7 Cao giex kaing li tak sau nham tiblah piang rung khu dee tan nyawng bhawng ka sivoe Simiang Siyiex, pa koe ka daux nyiex gox bwan man bang kum mai nham mawie pa kawn deuk an nawh tak hieh ka caong khu dee tan krax tan pa gleeing pa koe ka diang siviex nyiex gox bwan man bang kum. 8 Nawh tak teei bee khawmuik khaing mawie mhaing pa mawh krax tan pa pluat ploi phimap, can bee pa kawb piang kraung vaig mai can bee pa koe piang kraung vaig khawmuik, 9 soklax ra mu pa koe ka nyoi to tan mai bee pa koe piang an mai bee pa kawb piang tawm khankix tak teei lih, 10 awm pa hoik teei tix khaing mawie mhaing pa tan tix son krax tan pa nhim mai cao giex kaing li tak gleeing an kix piang khu dee tan pa tan krax tan pa gleeing. 11 Viang mawh nan, hak mawie mai nex khawmuik tau mai kaing, caong, khawm kraung vaig khankix mai roeng, 12 nawh tak viex mawie an khawm mu lih hu ka plak praix nyiex bang ka dee hoik yuh kix blang, ka dee tik nyaox mai gleeing piang nawm khix pa koe ngu mai gleeing ka dee tik kix nyaox tan. 13 Phan pui haoh hun Isarelax khankix lud loe ka daux pa ang ti tawng mai can pa glip ka plak sivoe pui hun mai lud ka gumlox pingnyap mai an lih mawh pa lud, 14 yam deeh tawng kix ka phimap pa hoik lud ti mai pui haoh hun tak tan mawie mhaing tix mu son krax pa pluat ploi phimap mai viex hoek ka sivoe nyiex gox bwan man bang kum, 15 mai kwad song cub pui haoh hun khankix, tak deuh taix tix piang kaing mawie an sivoe Simiang Siyiex mai pah mawie mhaing an ka sivoe Simiang Siyiex. 16 Cao giex kaing li pa hoik groi rawm bee kah tak viex nham mawie an tiblah hoek ka nyiex gox bwan man bang kum, 17 mai cao giex kaing li tak cub giien taix tix ka daux nham mai phruah aliah bawg ka sivoe Simiang Siyiex ka plak sivoe man tie. 18 Nawh tak sau nham tiblah piang rung khu krub dee tan, pa koe sivoe Simiang Siyiex, ka daux nyiex gox bwan man bang kum mai nham pa kawn deuk an tak hieh ka caong khu dee tan krax tan pa gleeing, pa koe hawt diang siviex nyiex gox bwan man bang kum. 19 Nawh tak teei khlawp bee khawmuik khaing mawie mai gleeing piang khu dee tan. 20 Nawh tak shieao mawie mhaing an, awm pa hoik shieao ti ka mawie mhaing pa tan kix son krax tan pluat ploi phimap mai nawh tak yuh awm an, mai cao giex kaing li tak yuh krax khyox khaw son kix mai kix tak pon krax pluat ploi phimap. 21 Nawh tak viex mawie lih ka praix dee bang kix mai gleeing awm mawie phao ka, an mawh krax tan pa pluat ploi phimap son pui hun. 22 Phan cao pa kwang tix kaux kaux lud loe ka daux pa ang ti tawng mai can pa glip ka gumlox pingnyap Siyiex ka daux pa ang nawh khaw ti yuh ka plak sivoe pui haoh hun mai lud ka gumlox pingnyap mai an lih mawh pa lud, 23 Phan nawh hoik tawng dee lud tix, nawh tak viex krax tan pa pluat ploi phimap ka kawn pex mhaing pa loig tix mu, son phimap pa hoik yuh tix. 24 Nawh tak deuh taix tix piang kaing kawn pex mhaing an mai pah ka dee gleeing kix krax tan pa gleeing sivoe Simiang Siyiex, in mawh krax tan son krax pluat ploi phimap. 25 Cao giex kaing li tak teei nham tiblah khaing krax tan pa pluat ploi phimap ka giien taix tix mai sau piang rung khu dee tan pa gleeing mai nham pa kawn deuk an tak hieh ka caong khu dee tan krax tan pa gleeing. 26 Nawh tak gleeing bee khawmuik piang khu dee tan, awm bee pa hoik appong ti tan son krax tan pa nhim, mai cao giex kaing li tak khyox khaw son phimap pa yuh nawh, mai nawh tak pon krax pluat ploi. 27 Phan pui pa hot shia tix kaux kaux daux pui Isarelax lud loe ka daux pa ang ti tawng mai can pa glip ka plak sivoe ngai pui hun mai lud ka gumlox pingnyap mai an lih mawh pa lud, 28 phan nawh hoik tawng dee lud tix, nawh tak viex krax tan pa pluat ploi phimap ka kawn pex shiang pa loig tix mu, son phimap pa hoik yuh tix. 29 Nawh tak deuh taix tix piang kaing pex krax tan pa pluat ploi phimap an mai pah ka dee gleeing kix krax tan pa gleeing. 30 Cao giex kaing li tak teei nham tiblah ka giien taix tix mai sau piang rung khu dee tan pa gleeing, nham pa kawn deuk nawh tak hieh ka caong khu dee tan krax tan pa gleeing. 31 Nawh tak teei bee an lih awm teei bee khaing krax tan pa nhim mai cao giex kaing li tak gleeing an piang khu dee tan, son krax tan pa sioe bhawng ka Siyiex, mai cao giex kaing li tak khyox khaw son nawh mai nawh tak pon krax pluat ploi phimap.Ref 4:27-31 Si 15:27-28. 32 Phan nawh viex kawn yung son krax tan pa pluat ploi phimap, kieh nawh viex kawn yung shiang pa loig tix mu, 33 nawh tak deuh taix tix piang kaing kawn yung krax tan pa pluat ploi phimap mai pah an son krax tan pa pluat ploi phimap ka dee pah kix krax tan pa gleeing. 34 Khaix an cao giex kaing li tak teei nham tiblah khaing krax tan pa pluat ploi phimap ka giien taix tix mai sau piang rung khu dee tan ka krax tan pa gleeing, nham pa kawn deuk tak hieh caong khu dee tan krax tan pa gleeing. 35 Nawh tak teei bee an lih, awm teei bee khaing kawn yung krax tan pa nhim mai cao giex kaing li tak gleeing an piang khu dee tan, awm krax tan pa hoik gleeing ka ngu ka Siyiex, cao giex kaing li tak yuh krax khyox khaw son phimap pa hoik lud nawh mai nawh tak pon krax pluat ploi phimap heue.”