17
Grawng Deeh Tan Nham Khankix
1 Simiang Siyiex ah nin ka Mose,
2 “Krai ka Arun mai kawn simex nawh khankix mai ka ceu pui Isarelax khankix ah nin, in mawh gumlox pa hoik tawx Simiang Siyiex.
3 Phan pui Isarelax khankix tix kaux kaux pah mawie, yung, pex ang ah ka daux nyiex bang, phan ang mawh nan, ka praix nyiex bang,
4 mai phan ang viex ceu an hoek ka daux diang siviex nyiex gox bwan man bang kum pui hun, sonsang tan ka Simiang Siyiex, sivoe nyiex gox bwan man Simiang Siyiex, tak klup nham phimap an piang pui an, mawh kheu hoik kieh nawh nham lih, kix tak tik nawh khaing paox pui ceu nawh,
5 ceu pui Isarelax khankix, tak deeh viex krax pa appong kix ti tan, daux tiag daux kaung mai kix tak viex khankix hoek hawt diang siviex nyiex gox bwan man bang kum pui hun ka cao giex kaing li mai tan an khawmuik son krax tan pa nhim ka Simiang Siyiex.
6 Cao giex kaing li tak phruah nham piang khu dee tan Simiang Siyiex, hawt diang siviex nyiex gox bwan man bang kum pui hun mai gleeing khlawp bee son krax tan pa sioe bhawng ka Simiang Siyiex.
7 Kix tak ang lai baox yaox ti tan krax pa appong ka phicaox phicaig mai ang lai yaox ti lud vao mai paox tix, in tak mawh grawng beenli leeing ju son kix ka doeh ru kix.
8 Maix tak ah nin ka kix, can pui pa kaoh khaing nyiex ma ceu pui Isarelax khankix ang ah, nyo sinie pa ot sinax pex ang ah, yam tan kix krax tan pa gleeing mai krax tan pa appong,
9 ang viex ceu an khankix hoek hawt diang siviex nyiex gox bwan man bang kum pui hun, sonsang tan ka Simiang Siyiex, pui tak tik nawh khaing paox pui ceu nawh.
10 Can pui daux nyiex ma ceu pui Isarelax khankix ang ah, nyo sinie pa ot sinax pex ang ah, phan nawh ih nham Aux tak veeh pakngai ti khaing pui an pa ih nham mai Aux tak tik nawh khaing paox pui ceu nawh.Ref 17:10 Jah 9:4; Krub 7:26-27; 19:26; Pi 2:16, 23; 15:23.
11 Mawh kheu ju pa im koe ka daux nham mai Aux hoik tawx an ka pex piang khu dee tan, sonsang mawh pa yuh krax pa khyox khaw mai krax pluat ploi son ju pex, grawh grawng nawh an mawh nham pa yuh krax pa khyox khaw mai krax pa pluat ploi son ju.Ref 17:11 He 9:22.
12 Mawh kheu nan, Aux hoik ah nin ka ceu pui Isarelax khankix, pui mawx ang ah ka daux pex tak ang pon ih nham mai nyo sinie pa ot mai pex kawx tak ang pon ti ih nham.
13 Ceu pui Isarelax khankix ang ah, nyo sinie pa ot sinax pex ang ah, hu leue totiag mai pon sim ang ah sonsang ih an, nawh tak teei ti tik nham mai kheem ka phawng tiex.
14 Grawh grawng nawh, nham mawh ju son tokaux khawmuik, kheu mawh nham pa priex jhung ju nawh, mawh kheu nan, Aux ah nin ka ceu pui Isarelax khankix, pex tak ang pon ti ih nham pa kaoh khaing tokaux tix ceu kawx, mawh kheu ju pa im tokaux khawmuik, koe ka daux nham, can pui pa ih ka nham tak mawh pa teei ti tik.
15 Pui ku kaux pa ih ka nex to pa tang yum ang ah, nex pa hoik kiied totiag ang ah, viang nawh mawh pui pa keh daux haktiex cao pex ang ah, nyo sinie ang ah, nawh tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo, khaix an nawh tak mawh pa singax.
16 Viang mawh nan, phan nawh ang sidaux, ang heem tix, nawh tak kham geu ka phimap tix heue.