11
Totiag Pa Chix Ti Ih
(Pi 14:3-21)
1 Simiang Siyiex ah nin ka Mose mai Arun,
2 “Krai ka ceu pui Isarelax khankix ah nin, inkix mawh ceu totiag pa caw pex ti ih khaing totiag khankix pa koe piang haktiex,
3 can totiag pa koe gip pa jiah gip caong mai totiag pa deeh sai roeng ti khankix, pex tak pon ti ih.
4 Viang mawh nan pex tak ang pon ti ih totiag pa deeh sai roeng tix, totiag pa jiah gip caong pa mawh kala-uk, mawh kheu totiag pa deeh sai roeng tix pa ang jiah gip, mawh pa ang singax ka son pex,
5 Ghot pa deeh sai roeng tix, kheu ang gip caong kix jiah mawh pa ang singax ka son pex,
6 mai piet la pa deeh sai roeng tix kheu ang gip caong jiah, mawh pa ang singax ka son pex,
7 lig khankix viang gip jiah kawx, nawh ang deeh sai roeng tix, mawh pa ang singax son pex.
8 Nex totiag ceu in khankix pex tak ang pon ti ih mai ang pon ti hu teeh ka tokaux yum an, kix mawh pa ang singax son pex.
9 Inkix mawh pa pon pex ti ih khawmuik khaing totiag pa koe daux rawm, pa koe pruik, pa koe sibiak, can pa koe daux rawm sigrit sigra ang ah, daux rawm klawng khankix ang ah pex tak pon ti ih.
10 Viang mawh nan pa koe daux rawm sigrit sigra mai pa koe daux rawm klawng, pa ang koe pruik mai sibiak, pa im ju chix hu daux rawm, khawm can ceu pa im ju daux rawm khawmuik, mawh pa seeing son pex.
11 An kix mawh pa seeing son pex mai pex tak ang pon ti ih nex an kix, viang mawh ka to yum, an kawx mawh pa seeing son pex.
12 Can ceu pa koe daux rawm, pa ang koe pruik mai sibiak, tak mawh pa seeing son pex,
13 inkix tak mawh pa seeing, khaing daux ceu sim sai pa ang pex pon ti ih, pa mawh klang ting, klang preng mai klang krih,
14 klang teei ia mai klang cie khawm paox ceu nawh khankix,
15 lak mai paox ceu nawh khankix,
16 sim kala-uk, klang pon sawm, klang kax mai paox ceu nawh khankix,
17 plang plawh, sim tareei mai klang pet,
18 sim klang tareei, sim vampo mai klang preng,
19 klang lang gaoh, sim saoh mai paox ceu nawh khankix, gawx mai blak.
20 Can ceu viag pa koe pruik pa chix mu ka caong pon khawn khawmuik, tak mawh pa seeing son pex.
21 Viang mawh nan, inkix tak mawh pa pon pex ti ih khaing can ceu viag pa koe pruik pa chix mu ka caong pon khawn, pa koe caong pa koe ba khankix, sonsang pon phoh kix ti piang tiex.
22 Pex tak pon ti ih sido nghox mai paox ceu nawh khankix, sido khaox glawm mai paox ceu nawh, tawng mai paox ceu nawh, sigra mai paox ceu nawh.
23 Viang mawh nan can ceu viag pa koe pruik tang ceu, pa koe caong pon khawn tak mawh pa seeing son pex heue.
Totiag Pa Ang Singax Khankix
24 “Inkix mawh pa kieh maix ang singax ka, can pui pa hu teeh ka to yum ankix, tak mawh pa ang singax tom hoek plak bo.
25 Can pui pa viex to yum inkix mai tix, tak sidaux kraung tix mai nawh mawh pa ang singax tom hoek plak bo.
26 Can totiag pa jiah gip caong, pa ang jiah gip caong ang ah, pa ang deeh sai roeng tix, ceu an khankix mawh pa seeing son pex, can pui pa hu teeh ka to yum an ku kaux, tak mawh pa seeing ka.
27 Can totiag pa hu ka caong tix khaing daux sinax totiag khawmuik, pa koe caong pon khawn, mawh pa ang singax ka son pex, can pui pa hu teeh ka to yum an, tak mawh pa ang singax tom hoek plak bo.
28 Can pui pa viex to yum ankix mai tix, tak yaox ti sidaux kraung tix mai nawh mawh pa ang singax tom hoek plak bo, ankix mawh pa ang singax son pex.
29 “Ceu inkix kawx mawh pa ang singax son maix, khaing ceu pa chix mu mai pa mu ti hu piang tiex, pa mawh beei, kiang mai goe khawm paox ceu nawh,
30 goe tawk kie, lai tang, lai lee, goe rang, goe rham.
31 Ankix mawh pa ang singax son pex, khaing sinax ceu pa chix mu chix hu, can pui pa hu teeh ka ceu pa hoik yum an khankix, tak mawh pa ang singax tom hoek plak bo.
32 Phan to yum an cod piang kraung ceu patix ang ah, an tak mawh pa ang singax ka, phan rau piang khaox pa shiao ang ah, piang kraung ceep ang ah, piang hak ang ah, piang chee khankix ang ah, ceu pa yuh ka mawx kawx, tak mawh pa ang singax, kraung an khankix tak yaox ti ce daux rawm mai an khankix tak mawh pa ang singax tom hoek plak bo, khaix an kraung khankix tak deeh singax.
33 Phan to yum an cod ka daux aw tiex maix tak pah aw an max. Can ceu pa koe ka daux aw an khankix tak mawh pa ang singax,
34 phan to yum an cod ka daux aw pa koe pa ih mai daux rawm nyaux, ceu an tak lih ti mawh pa ang singax mai rawm nyaux an tak mawh pa ang singax son maix.
35 ceu pa hoik cod to yum an khankix ceeix ceeix kawx tak mawh pa ang singax, viang mawh ka tao ngu mai kiang ngu kawx caw ti yieh laux, an khankix tak mawh pa ang singax ka son pex.
36 Viang mawh nan, dee lih rawm klawng khankix ang ah, rawm daux pa kaong pex ang ah, tak mawh pa singax, can pui pa hu teeh ka to yum an khankix ngie, tak lih ti mawh pa ang singax ka.
37 Phan to yum an cod piang simie pa sang sum pex ceeix khaing, simie an kawn mawh pa singax.
38 Viang mawh nan, phan to yum cod piang simie pa hoik ce hoik dum pex, an tak lih ti mawh pa ang singax son pex.
39 Phan totiag pa chix pex tix ih yum, pui pa hu krox hu teeh ka to yum an, tak mawh pa ang singax tom hoek plak bo.
40 Pui pa ih nex to yum an, tak yaox ti sidaux kraung ceep tix mai nawh tak mawh pa ang singax tom hoek plak bo. Pui pa viex to yum an hu kawx, tak yaox ti sidaux kraung ceep tix mai nawh tak mawh pa ang singax tom hoek plak bo.
41 Can ceu pa chix mu ti hu piang tiex khankix mawh pa seeing, pex tak ang pon ti ih ka.
42 Can ceu pa mu ti hu ka vaig tix mai can ceu pa hu ka caong pon khawn ang ah, can ceu pa koe caong haoh hun khaing ceu pa mu ti hu, pa chix mu ti hu piang tiex, ceu inkix pex tak ang pon ti ih, mawh kheu an khankix mawh ceu pa seeing.
43 Pex tak ang pon ti yuh krax pa seeing ka tokaux tix, ka ceu pa chix mu chix hu tix ceu kawx, pex tak ang pon ti yuh tokaux tix seeing ka ceu an khankix, aux lhat pex seeing brai ka jao an.
44 Aux mawh Simiang Siyiex pa mawh Simiang Siyiex pex. Mawh kheu nan, pex tak mawh pa singax, Ref 11:44 Krub 19:2; 1Pet 1:16. grawh grawng nawh Aux mawh pa singax, pex tak ang pon ti seeing brai ka jao ceu pa chix mu ti hu tix ceu kawx mai ka pa mu ti hu piang tiex khankix.
45 Aux mawh Simiang Siyiex pa hoik viex pex lih hu khaing daux haktiex Ejiptux, sonsang mawh Aux Simiang Siyiex pex. Mawh kheu nan, pex tak mawh pa singax, mawh kheu mawh Aux pa singax singeh.
46 In mawh grawng been son totiag mai sim sai khankix mai can ceu pa im ju pa koe daux rawm kuceu mai ceu pa chix mu ti hu piang tiex,
47 Sonsang gwieh Aux ti deuh pa ang singax khaing sinax ceu pa singax mai sinax ceu pa pon pex ti ih mai ceu pa ang pex pon ti ih khankix heue.