10
Phimap Nadat Mai Abihux
1 Kawn simex Arun pa mawh Nadat mai Abihux viex pan ngu hoek tix kaux tix mu mai sau ngu ka mai baox sau pa sioe bhawng piang an mai kiex lak yuh krax tan pa gleeing ka ngu, ka sivoe Simiang Siyiex, pa ang Nawh Cao nyang tawm kiex yuh.
2 Ngu lih khaing sivoe ngai Siyiex mai gleeing kiex khawm ra mai kiex yum plak sivoe Simiang Siyiex.
3 Mose ah nin ka Arun, “Siyiex hoik krai ah nin, Aux tak mawh pa singax singeh sinax ceu pui pa dex mai Aux mai sivoe pui hun khankix Aux tak mawh pa koe min plakngai, “Arun ot yiien yawg tix.
4 Mose kok ka Mishelax mai Elizapha kawn simex Awzalax, pa mawh keeing iak Arun mai nawh ah nin ka kiex. “Hoek dee dex mai klawm puxaik maix lih khaing sivoe dee pa singax singeh ka plak praix nyiex bang.”
5 Kiex hoek dex mai klawm nawh hu ka sibex dhah ceep kiex ka plak praix nyiex bang, awm gumlox pa hoik ah Mose.
6 Mose ah nin ka Arun mai kawn simex nawh Eliza mai Itama, “Pex paw peeik mhok mai paw ploi hauk kaing tix yih mai paw riah ka kraung ceep tix, aux lhat pex yum mai lhat krax song rhawm Siyiex hoek piang pui khawmuik, viang mawh nan, kieh puxaik pex mai kawn nyiex ma pui Isarelax khawmuik yiiem yo mai khi rhawm ka ngu pa hoik yuh Siyiex.
7 Pex tak ang pon ti lih khaing daux siviex nyiex gox bwan man bang kum pui hun kheu lhat Aux pex yum, grawh grawng nawh bee groi pa hoik appong Siyiex koe piang pex. Kix yuh awm gumlox Mose heue.
Pa Caw Cao Giex Kaing Li Ti Yuh
8 Siyiex ah nin ka Arun,
9 “Maix khawm kawn simex maix khankix yam laig pex ka daux nyiex gox bwan man bang kum pui hun, paw nyaux rawm plix siiet mai plai, kheu lhat Aux pex yum, an tak mawh gumlox been pa caw pex ti hawt khawm doeh ru pex leeing ju,
10 sonsang chix gwieh pex pa singax singeh khaing pa ang singax singeh mai pa singax khaing pa ang singax,
11 mai sonsang chix gau pex ceu pui Isarelax khankix ka gumlox beenli pa hoik sikah Siyiex ka kix khawmuik ka Mose.”
12 Mose krai ah nin ka Arun mai kawn simex nawh pa kawn deuk pa mawh Eliza mai Itama, “Teei krax tan phawng nghox ca im pa kawn deuk khaing krax tan pa gleeing ka ngu son Siyiex mai ih an kix tau mai pa ang sau susaix, hawt vung viang khu dee tan, mawh kheu an mawh pa kied singax singeh.
13 “Pex tak ih an khankix ka dee pa singax singeh, kheu hoik mawh an son maix, khawm kawn simex maix khankix, pa mawh krax tan pa gleeing ka ngu son Siyiex. In mawh gumlox beenli pa hoik tawm Siyiex ka aux.”Ref 10:12-13 Krub 6:14-18.
14 Euk krax tan pa yang yeuh mai ba krax tan pa yaox maix ti ih dee pa singax tau mai kawn simex kawn bun tix. Mawh kheu an mawh son maix mai son kawn simex maix, pa pon kix khaing pa appong tix son krax tan pa nhim, pa kaoh khaing pui Isarelax.
15 Kix tak viex khawn ba krax tan pa yaog mai euk krax tan pa yang yeuh hoek tau mai khlawp bee krax tan pa gleeing ka ngu, sonsang mawh krax tan pa yang yeuh sivoe Simiang Siyiex mai an tak mawh cie maix, khawm cie kawn simex maix khankix, in mawh son pa caw pex ti pon leeing ju, awm gumlox pa hoik tawm Simiang Siyiex.Ref 10:14-15 Krub 7:30-34.
16 Khaix an Mose coca ti sawg ka pex mhaing son krax tan pa pluat ploi phimap mai nawh yaox ka hoik gleeing kix nawh tan, nawh song rhawm ka kawn simex Arun pa deuk an pa mawh Eliza mai Itama mai nawh ah nin,
17 “Pex lai ang ih krax tan son pa pluat ploi phimap ka dee pa singax singeh yuh ka mawx? awm hoik mawh ankix pa kied singax singeh, Ref 10:17 Krub 6:24-26. pa tawx Siyiex ka pex, sonsang klawm pex phimap cub pui hun khankix mai sonsang yuh pex krax khyox khaw mai krax pluat ploi phimap son kix sivoe Simiang Siyiex.
18 Jhak heue, pex ang nyang viex nham laig ka daux dee pa singax singeh, pex khaw ti ih nex tan an ka daux dee pa singax singeh, awm gumlox pa hoik tawm Aux.”
19 Arun deeh ah nin ka Mose, “Kix hoik tan krax tan pa pluat ploi phimap tix daux in singaix mai krax tan pa gleeing ka sivoe Simiang Siyiex mai grawng ceu inkix hoik klup piang aux, phan aux hoik pon ti ih ka krax tan pa pluat ploi phimap an daux in singaix, khex mawh pa khaw caw ka sivoe ngai Siyiex lie?”
20 Yam mhong Mose lox an, nawh koe krax fah rhawm ka heue.