1 Aux mawh pui pa yaox krax kha rhawm ka khaox gix krax pa song rhawm Nawh Cao heue. 2 Nawh Cao hoik thong ka aux mai kieh aux hu ka daux pa faik mai ang tie kieh aux hu ka daux pa riang heue. 3 Nawh Cao teei taix tix sivied ka aux tete, tix bawg hoik tix bawg leeing singaix heue. 4 Nawh Cao hoik kieh nex mai hak aux rham mai hoik raig ti tik si-ang aux heue. 5 Nawh Cao hoik lai lawm ti puing aux mai hoik lai lawm aux ka ceu pa song mai ceu pa koe krax kha rhawm heue. 6 Nawh Cao hoik deuh aux ka dah dee pa faik, awm krax yuh ka pui pa yum tom yam ankix dix heue. 7 Nawh Cao yuh die lai lawm ka aux, son ang aux pon ti lih hu mai Nawh Cao hoik yuh ceng rhiem aux ciien heue. 8 Yam kok yo mhaing aux krax teem kawx, Nawh Cao nyeep thox ka lox bwan rawg aux heue. 9 Nawh Cao hoik thox daux krax hu aux, ka lon simaox pa hoik saik tix mai Nawh Cao hoik yuh daux krax hu aux mawh pa vawk heue. 10 Nawh Cao hoik awm krih pa jawm tix pin aux, mai awm sivai sangsi pa ot dee glip heue. 11 Nawh Cao hoik kieh aux tang krax hu mai hoik riah ti tik aux tom phawng mai Nawh Cao kieh aux koe krax voi heue. 12 Nawh Cao hoik vaik ak tix mai hoik deuh aux awm mhai tung tang son te heue. 13 Nawh Cao hoik kieh te pa koe daux lawk te Nawh, hu krox ka sok lax aux heue. 14 Aux hoik lih ti mawh krax pa nyiah pui ka mai krax grawng lai rhax pa ah kix leeing singaix heue. 15 Nawh Cao hoik kieh aux naog ka ceu pa kied song mai Nawh hoik kieh aux nyaux rawm ghin heue. 16 Nawh Cao baox deeh pot yuh rhang aux khankix ka lon simaox khrap mai hoik kheem aux ka nyaox heue. 17 Maix Cao hoik gah khwan ju aux luan dee singai khaing krax pa nhim mai aux hoik piawm ka grawng ceu pa mhawm tix heue. 18 Aux ah nin, riang rao aux mai krax pa keud pot jun pot aux, hoik grai grup khaing Siyiex heue. 19 Doh keud ka krax pa kha aux rhawm tix mai ka krax pa vung viang aux ti hu mai ka rawm ghin song heue. 20 Rhawm aux kawn koe krax doh keud mai hoik awn hoik peei ka daux aux heue. 21 Mawh kheu nan, rhawm aux deeh doh keud ka grawng in, aux koe krax keud pot jun pot ka heue. 22 Ka daux krax moh krax rhawm Siyiex, ex ang lai laux leeing mai krax pa caux rhawm Nawh ang koe dee sidauh sidu heue. 23 Ankix mawh pa khraox ku ngawb, ka grawng pa kaux sijax Maix Cao mawh pa kied ting lhaong heue. 24 “Ju aux ah nin, Siyiex mawh num cie aux, mawh kheu nan, aux koe krax pa een rhawm ka daux Nawh Cao heue.” 25 Siyiex tak tawx bwanson ka pui ankix, pa krox jun Nawh mai ka ju pa sawg ti yaox Nawh heue. 26 An mawh pa mhawm ka pui pa een rhawm tix ka Nawh Cao mai yiien yawg ti krox jun bwanson krax taoh Siyiex heue. 27 An mawh pa mhawm son pui, pa klawm khaox glawm yam kawn awn ju nawh heue. 28 Kieh nawh ngawm tix kaux nong nong mai ot yiien yawg tix, mawh kheu Siyiex hoik deuh khaox glawm an ka piang nawh heue. 29 Kieh nawh jup jheeh tix ka daux phawng tiex, phan yuh nan, krax keud pot jun pot tak sang kawn pon ti koe ka pleue, 30 kieh nawh tawx sibax tix ka pui pa simang ka nawh mai kieh nawh sak ka lox pa salao pui tix heue. 31 Grawh grawng nawh, Siyiex tak ang lai tik ka pui leeing ju heue. 32 Viang nawh kieh krax pa khi rhawm koe kawx mai Nawh Cao tak sang jhi krax pa caux rhawm tix, awm krax pa kied haoh hun krax moh krax rhawm Nawh Cao heue. 33 Mawh kheu Nawh Cao ang koe rhawm tix sang yuh krax pa kha rhawm pui mai ang yuh krax pa khi rhawm kawn pui khankix heue. 34 Sonsang dig pui haktiex pa ot daux thawng phawng khawmuik, ka greem caong tix, 35 sonsang yieh krax pa rahsee pa khaw pui tix kham, sivoe ngai Cao pa kied ting lhaong, 36 Phan ang mawh nan, sonsang yuh krax pa som pui koe ka grawng see nawh, in mawh pa ang Siyiex khaw rhawm ka heue. 37 Yam ang Siyiex nyang bax tawm lox, mawh pui mawx pa pon ah hoik lih mawh tix ceuceu lie? 38 Krax kha rhawm mai krax pa koe bwanson, ang mawh pa kaoh khaing daux jheeh cao pa kied ting lhaong lie? 39 Pui pa kawn im ju koe krax ngia yuh ka mawx, son krax kham geu nawh phimap tix lie? 40 Kieh ex sawg ciied ti yaox daux krax pa yuh tix khankix mai deeh veeh ti hoek ka Simiang Siyiex heue. 41 Kieh ex viex rhawm rhi tix mai yaog taix tix khankix, ka Siyiex pa koe ka piang raoma heue. 42 Ex hoik lud mai hoik tieh feen, Maix Cao ang nyang koe krax pa pluat ploi heue. 43 Maix Cao hoik mox tokaux tix ka krax pa song rhawm mai hawt leue yix, Maix Cao koe krax pah mai ang lai koe krax pa caux rhawm heue. 44 Maix Cao hoik kheem tokaux tix ka paiawm, son ang lox rawg bwan pon tix phlat ka heue. 45 Maix Cao hoik kieh yix mawh sibroe sibrok ceu pa seeing brai, ka daux sinax pui khankix heue. 46 Pui koeng yix khawmuik, hoik ang jheeh tix ka yix heue. 47 Krax lhat graung mai daux tiex hoik hoek ka piang yix, khawm krax pa yiien grai hu pui mai khawm krax pa laux leeing heue. 48 Rawm ngai aux khankix hoik lih hu awm rawm klawng, kheu jao grawng krax pa laux leeing kawn bun pui aux khankix heue. 49 Rawm ngai aux hoik lih ang jud ang jai, 50 tom sidah kok puan Siyiex tix jhak mai yaox ka ankix khaing piang raoma heue. 51 Ngai aux kieh rhawm aux kham geu krax saux, kheu jao grawng kawn bun veng aux khankix heue. 52 Pui koeng aux khankix hoik leue aux awm sim, ka daux krax pa ang koe grawng koe ceu heue. 53 Kix hoik pah ju aux yum ka daux tiag mai teei lon simaox gut ka piang aux heue. 54 Rawm hoik kheem ka piang aux mai aux ah nin, “Aux mawh pa hoik som nai heue.” 55 Siyiex eue, khaing ka daux tiex pa kied raux, aux kok yo ceu kaux Maix Cao heue. 56 Maix Cao hoik mhong lox aux, “Paw doh veeh yhaok Maix Cao khaing lox pa ngia ngheeik aux mai khaing lox kok yo aux son krax teem liak.” 57 Maix Cao hoik greed tix dex ka daux singaix yam kok aux ka Maix ah nin, “Paw koe krax lhat graung awx.” 58 Siyiex eue, Maix Cao hoik prawng grawng see aux khankix ka son ju aux, Maix Cao hoik deeh taoh ju aux heue. 59 Siyiex eue, Maix Cao hoik yaox ka grawng krax kham geu aux, prawng ka grawng see aux liak. 60 Maix Cao hoik yaox ka krax pa sang pawk kix bix tix mai grawng pa sang keud kix ti yuh ka piang aux khawmuik heue. 61 Siyiex eue, Maix Cao hoik mhong ka lox salao kix mai grawng krax pa sang keud kix ti sang yuh ka piang aux khawmuik, 62 khawm lox jheeh pui koeng aux khankix mai grawng krax pa deuh kix phimap ka piang aux leeing singaix heue. 63 Maix Cao jhak ka yam ngawm kix mai ka yam yaog kix tix kaoh liak. Aux hoik mawh lox lai rhax kab kix ti ah heue. 64 Siyiex eue, deeh viied ti tawx ka kix, awm kaing pa hoik yuh kix ka taix tix heue. 65 Tawx rhawm pa kiien ka kix mai kieh krax pa jhax lawg Maix hoek ka piang kix liak. 66 Ka daux krax pa song rhawm Maix Cao, hawt leue kix mai yuh kix laux leeing khaing greem raoma cie Siyiex heue.