1 Siyiex hoik kheem kawn bun veng Zion ka paiawm pa song rhawm song rhi Nawh Cao yuh ka mawx lie? Nawh Cao tik krax pa mhawm grang ceu pui Isarelax khankix khaing daux raoma tom hoek ka piang tiex mai Nawh Cao ang lai doh keud ka ngot dee deuh caong tix, ka daux singaix koe krax song rhawm Nawh Cao heue. 2 Siyiex hoik bleet ti ih ka baoh deeh ot dee koe ceu pui Yakop khankix khawmuik mai ang lai koe krax caux rhawm ka heue. Nawh Cao hoik tik nyiex tab dee pa kaux cong kawn bun Yudax laig ka daux krax pa song rhawm Nawh, hoik kieh ankix grhup ka piang tiex, Nawh Cao hoik yuh laux ka min meung haktiex mai khawm simiang nawh khankix heue. 3 Nawh Cao hoik tat ti tik rung ceu pui Isarelax khawmuik, ka daux krax pa kied song rhawm tix heue. Nawh Cao deeh yoi taix khawn dawm Nawh khaing sivoe pui koeng heue. Awm hax ngu ku plak, Nawh Cao hoik kieh ceu pui Yakop khankix hax heue. 4 Nawh Cao hoik vaik ak tix awm pui koeng, Nawh Cao cung mai yaog taix khawn dawm tix, awm pa kieh pui koeng khankix pui khaw ngai mai hoik pah pui ankix khawmuik, ka piang nyiex gox kawn bun veng Zion, Nawh Cao hoik klup krax pa kied song rhawm Nawh lih awm ngu heue. 5 Siyiex awm pui pa koeng, Nawh Cao hoik bleet ti ih ceu pui Isarelax khankix, Nawh Cao hoik bleet ti ih can nyiex haw nawh khawmuik, Nawh Cao hoik yuh nyiex tab lhaong dee pa kaux cong nawh laux leeing khawmuik mai hoik nie baox yuh krax yiiem yo mai krax khi rhawm koe ka daux rhawm kawn bun Yudax heue. 6 Nawh Cao hoik yuh krax pa kin ka nyiex gox bwan man Nawh, awm hoik mawh nyiex gox daux sipeem, Nawh Cao hoik yuh dee pa kraix khrawm Nawh pui khankix laux leeing, Siyiex hoik kieh pawie singax singeh pa hoik tat tix mai singaix twah khankix mawh pa hoik pi awm tix ka daux veng Zion tan heue. Ka daux krax pa chu rhawm song rhawm Nawh, Nawh Cao hoik thiang ti tik ka simiang mai cao giex kaing li heue. 7 Siyiex hoik thiang ti tik ka khu dee tan Nawh Cao, Nawh Cao hoik seeing ka dee pa singax singeh Nawh mai Nawh Cao hoik ap ti tawx guh veng nyiex haw khankix ka daux tawm taix pui koeng heue. Kix hoik yuh lox sinum ka daux nyiex bwan Siyiex, awm ka daux singaix pawie pa singax singeh heue. 8 Siyiex hoik tat rhawm tix yuh guh veng kawn bun veng Zion laux leeing, Nawh Cao hoik tuk ka maox tiag mai ang lai deeh yoi taix khaing krax pa sang yuh tix krax laux leeing heue. Nawh Cao hoik kieh guh veng plak daux mai guh veng plak praix khankix koe krax khi rhawm mai kieh kix voi rhawm tau heue. 9 Siviex veng Zion hoik blawn ka daux tiex mai Nawh Cao hoik yuh nawh laux leeing mai hoik raig ti tik jhong siviex nawh khankix heue. Simiang nawh mai kawn simiang nawh khankix ot ka daux sinax ceu pui tang meung, pa ang koe been khankix, mai cao jhai nawh khankix ang lai chix pon ti yaox krax pa plak jhi khaing Siyiex heue. 10 Kuad song veng Zion khankix, ngawm ti ot ka piang tiex mai ot yiien yawg, kix rhuat phawng tiex ka piang kaing cao tix mai rawd nyoi ka man chee rhix heue. Bunkrih veng Yerusaliem khankix, gum kaing tix tom silaing tiex heue. 11 Ngai aux hoik roik rawm ngai, tom hoik pupie, mai daux vaig daux tu aux hoik lukliak, ghin aux hoik glup ti lih ka piang tiex, kheu jao krax laux leeing kawn bun ceu pui aux khankix mai kheu hoik khrup rhawm kawn nyawm mai kawn nyawm peuex teeih khankix ka daux krax daux veng heue. 12 Kix ah nin ka miex kix, “Mawh koe nghox mai rawm plix siiet dee mawx lie?” Yam khrup rhawm kix, awm pui pa hoik mat, ka daux krax daux veng khankix mai rhawm kix hoik dex dud ka piang naok miex kix heue. 13 Kawn bun veng Yerusaliem eue, Aux sang tiag maix ka mhai patix lie? Aux tak sang tiag maix mai pui mawx lie? Kawn bunkrih veng Zion eue, Aux tak sang tiag maix ka ceu patix, sonsang pon tawx aux krax pa nyawm rhawm ka maix lie? Grawh grawng nawh, krax laux leeing maix mawh pa kied ting awm rawm sigrit sigra, mawh pui mawx pa pon pai maix lie? 14 Cao jhai maix khankix hoik yaox krax plak jhi ceu pie lhen ka son maix, kix ang nyang plak jhi krax pa lud maix, sonsang deeh viex tix pui pa giex laung maix khankix ing heue. Viang mawh nan, kix hoik yaox krax pa plak jhi ka son maix, pa mawh gumlox jhai pie lhen mai pa koe krax lud krax loe khankix heue. 15 Can pui pa tiang baoh an khankix, dieh taix tix ka maix, kix ah lox salao mai vuh vied kaing tix, ka kawn bun veng Yerusaliem ah nin, mawh in veng pa hoik kok tix mawh pa grum mhawm grang mai dee koe krax nyawm rhawm haktiex lie? 16 Pui koeng maix khankix hoik ang jheeh tix ka maix, kix ah lox salao mai greeik rhang tix ah nin, “Ex bleet ti ih nawh uik. In mawh singaix krox jun ex mai ex hoik yaox ka nawh heue.” 17 Siyiex hoik yuh ceu pa tat Nawh Cao ti deuh, Nawh Cao hoik grum naog yuh gumlox pa hoik tawm Nawh Cao ti deuh ka daux singaix pa prim dix heue. Nawh Cao hoik yieh ti tik mai ang lai koe krax lhawk ka mai Nawh Cao hoik kieh pui koeng maix koe krax gaux rhawm ka hoik pex tix maix mai hoik yaog ti deuh rung pui koeng maix lhaong heue. 18 Rhawm kix kok yo ti sawg ka Siyiex, guh veng kawn bun veng Zion eue, kieh rawm ngai maix khankix lih hu awm rawm klawng, ku singaix mai paw kieh kawn ngai maix koe krax laux lee tix heue. 19 “Yaog ti kaoh mai kok yo plak ponsawm, yam jah praix ti riang, klup rhawm rhi maix lih awm rawm khankix, ka plak sivoe ngai Siyiex, yaog taix maix ka plak see Nawh, son ju kawn nyawm pa awn ju maix khankix, pa khrup rhawm ka cai rhawm tix, ka kaing krax ku krax heue.” 20 Siyiex eue, jhak ti yaox mai keud ti yaox liak! Maix Cao hoik yuh ceu inkix ka pui mawx lie? Mawh sang chix ih bun ka kawn cao tix, pa mawh kawn ngie pa hoik teem kix daux taix tix lie? Sang chix mawh cao giex kaing li mai cao jhai khankix pa pah ti yum ka dah dee pa singax singeh Siyiex lie? 21 Pui pa awn ju mai pui pa riex ju khankix nyat tix ka piang tiex ka daux krax khankix heue. Bunkrih mai sinaw aux khankix hoik goh ti yum ka vaig lawm mai Maix Caox hoik pah kix yum ka daux singaix koe krax pa song rhawm Maix Cao heue. Cao hoik pah ti tik kix mai ang lai koe krax caux rhawm ka piang kix heue. 22 “Maix Cao hoik kok pui khankix hoek, awm pa koe singaix pawie mai hoik kok ceu pa lhat graung koe hawt rawb rim aux heue. Ka daux singaix koe krax pa song rhawm Siyiex, ang lai koe pui pa glawd tix kaux kawx, ang lai koe heue. Ka pui pa hoik teem aux mai pa hoik eei aux ti deuh, pui koeng Aux khankix hoik yuh nawh laux leeing heue.”