14
Krax Kwang Amazix Ka Yudax
(2Been 25:1-28)
1 Ka daux num pa kwang Yehosha kawn simex Yehohaza simiang pui Isarelax ra num tix num, Amazix kawn simex Yehosha simiang Yudax deeh yaog ti mawh simiang heue.
2 Nawh koe ju tixnga phwan num yam yaog nawh ti mawh simiang mai nawh kwang daux veng Yerusaliem tixnga dim num, ceu kaux miex nawh mawh Yehodadan pui veng Yerusaliem heue.
3 Nawh yuh pa khaw caw daux ngai Siyiex, viang mawh nan, ang nyang awm keeing nawh simiang Davit; nawh yuh kuceu awm pa yuh keeing tix Yehosha heue.
4 viang mawh nan, nawh ang nyang bax tik dee pa lhaong khankix luan dee singai mai pui khankix kawn ca tan krax tan pa appong mai gleeing nyawng bhawng ka piang dee pa lhaong heue.
5 Yam hoik pang nawh meung kaux cong ka daux tawm taix tix, nawh hoik pah ka kawncau pa hoik pah ka keeing nawh simiang heue.
6 Viang mawh nan, nawh ang pah kawn praix cao pa pah pui khankix, hawt awm pa hoik tiem ka daux phuk lai been Mose, gumlox pa hoik tawm Siyiex pa ah nin, “Keeing tak ang pon ti yum son kawn mai kawn tak ang pon tix yum son keeing, viang mawh nan, pui mawx pui an tak mawh pa yum son phimap tokaux tix heue.”Ref 14:6 Pi 24:16.
7 Nawh pah pui Edom yum ka daux ngawd tix mheen kaux mai nawh pon rhim veng Selax ka daux naing mai kok ceu kaux veng an mawh Yokathilax tom hoek daux in singaix heue.
8 Khaix an, Amazix ploi cao cau khankix hu ka Yehosha, kawn simex Yehohaza kawn simex Yehu, simiang pui Isarelax ah nin, “Hoek heue kieh ex yaox ngai baoh paox tix ka daux biang naing heue.”
9 Yehosha simiang pui Isarelax ploi pui hu ka Amazix simiang haktiex Yudax ah nin, “Pang kat pa hoik koe ka daux Lebanon ploi kawncau tix hu ka khaox Arit, pa koe ka daux Lebanon ah nin, tawx kawn bun maix mawh moeng kawn simex aux mai totiag pa koe ka daux nong Lebanon an tix mu, hoik tiang mai dugdig ka pang kat an heue.
10 Maix hoik pex haktiex Edom tete mai rhawm maix hoik koe krax pa lhaong kah, teei min ka grawng pa pex maix khankix mai ot ka daux nyiex, mawh kheu maix lai sawg ti yaox krax kha rhawm pa som pa nai tix, tau mai haktiex Yudax lie?
11 Viang mawh nan, Amazix ang lai cu ti nghiet ka lox ankix, mawh kheu nan, Yehosha simiang Isarelax haok ti puing naing, kheu jao an nawh mai Amazix simiang haktiex Yudax hoik sipub paox tix ka daux veng Bietshemiet pa mawh cie pui Yudax heue.
12 Pui Yudax hoik som ka pui Isarelax mai pui ku kaux hoik tang to ti ing ka nyiex gox cao tix heue.
13 Khaix an, Yehosha simiang pui Isarelax pon giex ka Amazix simiang haktiex Yudax mai pa mawh kawn simex Yehosha kawn simex Ahaziyax ka daux veng Bietshemiet mai nawh hu ka veng Yerusaliem mai yuh guh veng Yerusaliem; jah khaing siviex veng Epharem tom hoek ka daog siviex veng an khawmuik pon yieh sawk heue.
14 Nawh teei khri mai mau khawmuik mai can kraung shiao pa koe khawmuik ka daux nyiex bwan Siyiex mai can pa koe ka daux nyiex haw simiang khawmuik mai khawm pui pa kham khankix mai deeh ing ka veng Samarix heue.
15 Grawng kaing pa deuk Yehosha mai ceu pa hoik yuh nawh khankix mai grawng pa koe riang rao nawh mai grawng pa hoik yuh nawh naing tau mai Amazix simiang haktiex Yudax, ceu ankix ang mawh pa tiiem ti deuh ka daux phuk lai been simiang pui Isarelax khankix lie?
16 Mawh kheu nan, Yehosha hoik laux lee tix tau mai keeing nawh khankix mai sipaung ka daux veng Samarix tau mai cub simiang pui Isarelax, khaix an kawn simex nawh Yerobom plud ti kwang ka dah dee ot nawh heue.
17 Amazix kawn simex Yawsha simiang haktiex Yudax im ju kao phwan num, khaix hoik yum Yehosha kawn simex Yehohaza simiang pui Isarelax heue.
18 Yam in grawng kaing pa deuk Amazix ang mawh pa tiiem tix ka daux phuk lai been cub simiang haktiex Yudax khankix lie?
19 Kix rom paox tix tieh feen Amazix ka daux veng Yerusaliem mai nawh to ka veng Lakhisha, viang mawh nan, kix ploi pui hawt khaix nawh daux veng Lakhisha mai pah nawh heue.
20 Khaix an, kix viex nawh ing ka piang brung mai sipaung nawh ka daux veng Yerusaliem tau mai keeing nawh khankix ka daux veng Davit heue.
21 Pui Yudax khankix yaog Azarix pa koe ju kao liah num, mawh simiang tang keeing nawh Amazix heue.
22 Nawh hoik sum veng Elat mai priex nawh ka daux haktiex Yudax, khaix hoik laux lee simiang tix tau mai keeing nawh heue.
Yerobom Kwang Meung Isarelax
23 Daux num yam kwang Amazix kawn simex Yosha simiang haktiex Yudax kao phwan num tix num, Yerobom kawn simex Yosha simiang pui Isarelax yaog ti mawh simiang ka daux veng Samarix mai nawh kwang ka piang kix tixpon tix num heue.
24 Nawh yuh pa caox caig ka daux ngai Siyiex, nawh ang gah ti khaing phimap phighram pa yuh Yerobom, kawn simex Nebat mai pa hoik kieh pui Isarelax koe phimap heue.
25 Nawh deeh teei mee praix dee kwang pui Isarelax, jah khaing diang laig ka veng Hamat, tom hoek ka rawm sigrit sigra Arabax, awm gumlox Siyiex pui Isarelax, pa hoik sikah Nawh Cao ka kawncau tix Yonax,Ref 14:25 Yo. 1:1. kawn simex Amitie, cao jhai pa kaoh khaing veng Gathepha heue.
26 Mawh kheu Siyiex hoik yaox ka pa kied lang teung kha rhawm pui Isarelax mai pui pa giex laung ang ah, pui pa lawt luan ang ah, pui pa teem pa coi pui Isarelax ang koe pie tix kaux kawx heue.
27 Siyiex ang bax ah ti sang preet ceu kaux pui Isarelax khankix khaing greem raoma; mai Nawh Cao teei tawm taix Yerobom, kawn simex Yosha taoh ka kix heue.
28 Yam in grawng kaing pa deuk Yerobom khankix mai grawng ceu pa hoik yuh nawh khankix mai grawng pa koe riang rao nawh mai grawng pa hoik yuh nawh naing mai pa hoik pon rhim nawh tix deeh teei veng Damase mai veng Hamat son pui Isarelax, pa hoik dawg mawh cie haktiex Yudax, simiang pui Isarelax khankix lie?
29 Mawh kheu nan, Yerobom hoik laux lee tix tau mai keeing nawh, cub simiang pui Isarelax heue. Khaix an kawn simex nawh Zakharix deeh kwang haktiex ka dah dee ot nawh heue.