13
Krax Kwang Yehohaza Ka Isarelax
1 Ka daux num kwang Yehosha kawn simex Ahaziyax simiang haktiex Yudax tixnga loe num tix num, Yehohaza kawn simex Yehu, yaog ti mawh simiang ka piang pui Isarelax daux veng Samarix mai kwang ka piang kix kao aliah num heue.
2 Nawh yuh pa caox caig daux ngai Siyiex mai hawt phimap pa yuh Yerobom kawn simex Nebat, pa kieh pui Isarelax khankix koe phimap nawh ang gwieh tix khaing ceu an heue.
3 Khaix an, krax song rhawm songrhi Siyiex lih ka piang pui Isarelax khankix mai Nawh Cao ap kix ka daux tawm taix Hazelax simiang Surix mai ka daux tawm taix Benhadat kawn simex Hazelax, baux singaix im ju kix heue.
4 Mawh kheu nan, Yehohaza khyox khaw ka Siyiex mai Siyiex nghiet ka nawh, kheu yaox Nawh Cao krax pa kha rhawm pui Isarelax khankix, grawh grawng nawh, simiang haktiex Surix hoik yuh krax kheem krax gut ka kix heue.
5 Khaix an, Siyiex tawx pui pa taoh tix kaux, ka pui Isarelax sonsang pon luat luan kix khaing greem tawm taix pui Surix mai pui Isarelax khankix deeh yaox ti ot ka daux nyiex gox tix, awm glang ka an heue.
6 Viang yuh ka mawx kawx, kix ang lai gah tix khaing phima pa hoik yuh doeh nyiex ma Yerobom khankix, pa hoik kieh pui Isarelax khan kix koe pa lud mai lawng ka daux ankix; mai khaox rong riang grang siyiex Asherax khankix kawn koe ka daux veng Samarix heue.
7 Mawh kheu nan, simiang Surix prah ngie kru naing ka son Yehohadat, cub pui naing brung tixphwan kaux mai ling lawx naing brung kao lhang, khawm cub lien piang tiex khankix tix mheen kaux kheu hoik yuh simiang Surix kix laux leeing mai hoik dugdig kix awm phawng tiex pa koe ka glah pah ngoh heue.
8 Yam in, grawng kaing pa deuk Yehohaza mai can ceu pa hoik yuh nawh khankix mai khawm krax pa jhi nawh riang rao tix, ang mawh pa tiiem ti deuh ka daux phuk lai been cub simiang pui Isarelax lie?
9 Mawh kheu nan, Yehohaza laux lee tix tau mai cub keeing nawh khankix mai kix sipaung nawh ka daux veng Samarix, khaix an, kawn simex nawh Yehosha deeh plud ti kwang ka dah dee ot nawh heue.
Yehosha Kwang Ka Daux Meung Isarelax
10 Ka daux num pa kwang Yehosha simiang ka haktiex tixngoe aliah num tix num, Yehosha kawn simex Yehohaza deeh yaog ti mawh simiang ka piang pui Isarelax ka daux veng Samarix mai nawh kwang haktiex kao liah num heue.
11 nawh yuh pa caox caig ka daux ngai Siyiex mai ang gah ti khaing phimap pa hoik yuh Yerobom kawn simex Nebat mai pa kieh pui Isarelax khankix koe phimap mai hoik lawng ka daux ceu ankix heue.
12 Yam in, grawng kaing pa deuk Yehosha mai can ceu pa yuh nawh khankix, khawm pa koe riang rao nawh yam puing nawh ka Amazix simiang Yudax, ang mawh pa tiiem ti deuh ka daux phuk lai cub simiang pui Isarelax khankix lie?
13 Mawh kheu nan, Yehosha laux lee tix tau mai keeing nawh khankix, khaix an Yerobom yaog ti ngawm ka piang dang ngeung nawh mai sipaung Yehosha ka daux veng Samarix tau mai cub simiang pui Isarelax heue.
Grawng Yum Elishie
14 Elishie pon jhawm saux pa tak sang kieh nawh yum, khaix an, Yehosha simiang pui Isarelax lih hoek ka nawh mai yiiem ka sivoe ngai nawh ah nin, “Keeing aux eue, keeing aux eue, ling lawx naing brung pui Isarelax mai cub pui naing brung cie kix khankix eue, ”Ref 13:14 2Sim 2:12.
15 mai Elishie ah nin ka nawh, “Teei ak mai te heue.” Mawh kheu nan nawh teei ak mai te hoek heue.
16 Ah nin ka simiang pui Isarelax, “Deuh khawn taix maix ka piang ak heue.” Mawh kheu nan, nawh deuh taix tix ka piang ak mai Elishie deuh taix tix ka piang simiang heue.
17 Elishie ah nin, “Paoh siviex iak pa koe plak lih singaix, ” Mai nawh paoh ka heue. Khaix an, Elishie ah nin, “Puing heue.” Nawh puing ka heue. Elishie deeh ah nin, “In mawh te pa pex Siyiex mai pa pex maix ka haktiex Surix, mawh kheu maix tak puing ka pui Surix ka veng Aphet tom sidauh ka hoik yuh maix kix laux leeing heue.”
18 Khaix an, Elishie deeh ah nin, “Teei te khankix, ” Kheu nan, nawh teei ankix heue. Nawh ah nin ka simiang pui Isarelax, “Lah ka piang tiex heue.” Mawh kheu nan, nawh lah loe bawg mai kaog khaix heue.
19 Pui Siyiex song rhawm ka nawh ah nin, “Maix khaw tix lah phwan liah bawg, khaix an maix tak pon pah pui Surix tom sidah hoik laux leeing kix, viang mawh nan, yam in maix tak pon pah pui Surix loe bawg ngie heue.”
20 Khaix an, Elishie yum mai kix sipaung nawh mai cub pui naing khaing haktiex Mawbax hoik laig puing ka haktiex daux raux num an heue.
21 Mawh kheu nan, yam kawn sipaung kix pui tix kaux, kix yaox ka cub pui jawm tix cub dom an; mai kix ploi tokaux yum an lih ka plak greem tiex mai yam krox teeh tokaux yum an ka si-ang Elishie, nawh deeh kaoh im mai cung heue.
Pui Isarelax Pon Rhim Veng Khaing Pui Surix
22 Hazelax simiang Surix yuh krax kheem krax gut ka pui Isarelax khankix ka daux glang baux kwang Yehohaza ka kix khawmuik heue.
23 Viang mawh nan, Siyiex doh keud doh sawn ka kix mai koe krax caux rhawm ka piang kix mai kia ngien ka kix, kheu sijax mukheu pa hoik yuh Nawh Cao tau mai Abraham, Icak mai Yakop mai ang lai yuh kix laux leeing mai ang lai tik vud kix khaing plak sivoe ngai Nawh Cao heue.
24 Yam in, Hazelax simiang Surix hoik yum, khaix an kawn simex nawh Benhadat deeh plud ti kwang ka dah dee ot nawh heue.
25 Yehosha kawn simex Yehohaza rhim veng ankix khaing daux taix Benhadat kawn simex Hazelax, ka veng pa hoik rhim nawh khaing daux taix keeing tix Yehohaza ka daux naing, Yehosha hoik pex ka nawh loe bawg mai pon rhim veng pui Isarelax heue.