1 Yam hoik mhong simiang khankix, pa ot ka praok plak in khaing rawm klawng Yawdan mai pa ot ka piang gawng mai pa ot ak daux lung daux ngawd mai pa ot ka piang praok rawm sigrit sigra ting plak krax see gawng Lebanon khankix, pa mawh ceu pui Hitix, Amawrix, Khananix, Pherazix, Hiwix mai ceu pui Zebuzix, 2 Ceu pui ankix kraix khrawm paox tix tau sonsang puing ka Yawsux mai ka ceu pui Isarelax khankix, tix dom neh heue. 3 Viang mawh nan, can pui pa ot ka daux veng Gibon, hoik mhong ka ceu pa hoik yuh Yawsux ka veng Yerikho mai veng Ai heue. 4 Kix yuh ti awm pa koe cuyi mai yuh ti awm grang cao cau khankix heue. Kix teei chee pa prim khankix mai si ngiien hak rawm plix siiet pa hoik griah mai pa hoik deeh cox caing tix khankix mai tang ka piang la heue. 5 Mai ceep kiiep prim pa hoik deeh cox blaox ka caong tix mai ceep kraung prim khankix ka piang cao tix heue. Blah pa hoik viex kix ti ih son daux krax, mawh pa hoik kroh mai pa hoik moh heue. 6 Kix hu ka Yawsux ka dee pan nawh, hawt baoh Gilagalax ah nin ka nawh mai ka pui Isarelax khankix. “Yix hoik kaoh khaing, haktiex singai ti dah. Mawh kheu nan, yam in, pex yuh gumlox sijax mukheu tix ceu tau mai yix liak.” 7 Viang mawh nan, pui Isarelax khankix deeh ah nin ka pui Hiwix khankix. “Yix tak sang tawng ka ot pex dex sinax yix yuh ka mawx lie? Mawh kheu nan, yix tak sang pon ti yuh gumlox sijax mukheu tix ceu tau mai pex yuh ka mawx lie?”Ref 9:7 Lih 23:32; 34:12; Pi 7:2 8 Kix deeh ah nin ka Yawsux. “Yix mawh siliex cawng maix.” Yawsux deeh chawk ah nin ka kix. “Pex mawh pui dee mawx mai pex hoik hoek khaing plak dee mawx lie?” 9 Kix deeh ah nin ka nawh. “Siliex cawng maix khankix, mawh pa hoik hoek khaing meung dee singai ti dah, kheu jao min ceu kaux Siyiex leeing ju maix heue. Grawh grawng nawh, yix hoik mhong ka ao min ceu kaux Nawh Cao mai can ceu pa hoik yuh Nawh Cao ka daux haktiex meung Ejiptux khawmuik, 10 Mai can ceu pa hoik yuh Nawh Cao ka simiang haktiex Amawrix khankix ra kaux, pa ot ka plak toi rawm klawng Yawdan mai pa mawh simiang Sihong khaing haktiex Heshabon mai simiang Awgax khaing haktiex Bashan khankix pa ot daux veng Ashatarot heue.”Ref 9:10 Si 21:21-35 11 Mawh kheu nan, kuad riex ju khankix mai can pui pa ot ka daux haktiex yix khankix, hoik krai nawh ka yix mai kix hoik ah nin. “Viex priex preem pa ih tau mai pex son daux krax, hu rieb kix ah nin ka kix awx. “Yix mawh siliex cawng maix. Mawh kheu nan, yam in kieh pex yuh gumlox sijax mukheu tau mai yix liak.” 12 In mawh blah pa hoik teei yix ti viex yam kawn si u, son priex preem pa ih yix khaing daux nyiex cao yix, ka daux singaix hoik lih hu yix sonsang hoek tix ka maix heue. Viang mawh nan, yam in jhak heue. Blah ankix hoik kroh mai hoik moh uik heue.” 13 Si ngiien hak rawm plix siiet inkix, pa hoik sau yix ti viex rawm kawx hoik mawh pa khraox yam an nhaox heue. Jhak heue, si ngiien hak inkix hoik griah mai kraung ceep yix khankix, khawm kiep ceep yix khankix kawx hoik prim kheu jao kied singai krax hoek yix heue.” 14 Khaix an, pui Isarelax khankix teei ti ih priex preem hawt krax tiblah heue. Viang mawh nan, kix ang tie mhaing akhwang ka Siyiex leeing ju heue. 15 Mawh kheu nan, Yawsux yuh krax pa nhim tau mai kix mai deeh yuh gumlox sijax mukheu tau mai kix, son sang kieh nawh kix klawd ti im ju heue. Cao pa kwang cub pui hun khankix, yuh krax pa tiextu tau mai kix heue. 16 Khaix hoik sidah daux loe singaix, yam khaix hoik yuh kix sijax mukheu tau mai kix, kix mhong ka hoik mawh kix paox plawg pa ot hawt dex kix heue. 17 Khaix an, pui Isarelax khankix lih hu krax mai hoek ka veng kix, ka daux loe singaix heue. Yam in, veng pa ot kix mawh veng Gibon, veng Khephirax, veng Berot mai veng Kirayat Yarim khankix heue. 18 Viang mawh nan, pui Isarelax khankix ang nyang puing ka kix kheu jao hoik koe lox pa tiextu cao kaing pa kwang cub pui hun khankix ka kix, ka plak sivoe Siyiex leeing ju ceu pui Isarelax heue. Cub pui hun khakix hoik ngia mai deuh phimap ka cao pa kwang ka piang kix khawmuik heue. 19 Viang mawh an, cub cao kaing pa kwang khankix, deeh ah nin ka cub pui hun khankix heue. “Yix hoik koe lox pa tiextu ka kix, ka plak sivoe ngai Siyiex leeing ju ceu pui Isarelax khankix heue. Mawh kheu nan, yam in, ex ang pon ti hu krox hu teeh ka kix heue.” 20 In mawh pa tak sang yuh ex ka kix heue. Ex tak kieh kix im ju, phan ang mawh nan, krax song rhawm tak mawh pa hoek ka piang ex, kheu jao pa hoik tiextu ex ka kix heue. 21 Cao pa kwang khankix, deeh ah nin ka kix heue. “Kieh kix im ju heue. Viang mawh nan, kieh kix mawh cao pa kid khix mai cao pa kin rawm khankix son pui hun khankix, awm hoik koe lox sijax mukheu ex ka kix heue.” 22 Khaix an, Yawsux kok kix mai nawh ah nin ka kix. “Yuh ka mawx pex hoik pie lhen ka yix ah nin, “Yix mawh pa kied singai dee ot khaing maix mai yam in pex hoik mawh pa ot hawt dex yix ang mawh lie?” 23 Mawh kheu nan, yam in pex hoik mawh pa pon pa jhax lawg mai pex tix kaux kawx, tak ang lai pon ti glawd, pa mawh tix siliex awm cao kid khix mai cao pa kin rawm khankix son daux nyiex Siyiex leeing ju aux heue. 24 Mawh kheu nan, kix hoik deeh pawk lox Yawsux ah nin. “Grawh grawng nawh, ceu an khankix hoik mawh pa hoik krai tix ka siliex cawng maix khankix, tom kriem tete heue. Siyiex leeing ju maix, hoik tawm gumlox tix ka kawncau Nawh Cao pa mawh Mose, sonsang tawx Nawh Cao haktiex inkix khawmuik ka maix mai sonsang yuh Nawh Cao pui pa ot ka daux haktiex inkix laux ka plak sivoe maix heue. Mawh kheu jao an, yix hoik kied koe krax lhat graung tom nie son ju tix jao maix mai yix hoik pon ti yuh ceu inkix kah heue.” 25 “Yam in, yix hoik koe ka daux tawm taix maix tin heue. Yuh ceu pa keud maix mawh pa mhawm mai pa khaw caw pa sang caw maix ti yuh ka yix heue.” 26 Mawh kheu nan, nawh yuh ceu ankix ka piang kix mai deeh ploi kix klawd khaing daux tawm taix pui Isarelax khankix, son ang kix lai sang pah kix yum heue. 27 Ka daux singaix an, Yawsux kieh kix mawh cao kid khix mai cao kin rawm son cub pui hun khankix mai son khu dee tan Siyiex, ka dee pa sang laug Nawh Cao tom hoek ka daux in singaix heue.