1 Khaix an, Siyiex leeing ju deeh ah nin ka Yawsux, “Paw koe krax lhat graung, krax laux rhawm. Teei pui naing khawmuik tau mai maix yaog ti kaoh hu ka veng Ai. Jhak heue, Aux hoik ap ti tawx simiang veng Ai ka daux tawm taix pex khawm pui nawh khankix, khawm veng khawm haktiex nawh.” 2 Maix tak yuh ceu an khankix ka veng Ai mai ka simiang nawh, awm krax pa hoik yuh maix ka veng Yerikho mai ka simiang nawh heue. Maix tak teei ngie kraung pa tud rhim tix khankix mai to brie nawh khankix nong nong, awm kraung pa tud rhim tix son tokaux cao pex heue.Rien ti deuh cub pui naing jawm tix cub son veng ka plak khaix nawh awx. 3 Mawh kheu nan, Yawsux yaog ti kaoh tau mai pui naing khawmuik, sonsang hu puing tix ka veng Ai heue. Yawsux laug ti teei pui pa ting riang mai pa koe krax pa vao rhawm been loe mheen kaux mai ploi kix hu plak ponsawm. 4 Nawh tawx gumlox tix ka kix ah nin. “Jhak heue, pex tak yuh naing jawm ka veng an mai mox tix ot plak khaix veng. Paw doh hu dee pa kied singai khaing veng awx. Viang mawh nan, pex khawmuik tak mawh pa khre rien tix son naing. 5 Khaix an, aux mai can pui khawmuik pa ot tau mai aux, tak hu dee dex hawt veng mai ceu an khankix tak lih ti koe yam hoek kix ti puing ka ex, bawg phao voe ex tak lih to kix yaox ka plak sivoe kix heue. 6 Kix tak lih ka plak praix mai hawt ti pheet khaix ex, tom hoik nyaw glaw ex kix lih khaing daux veng heue. Kix tak ah nin. “Kix hoik to khaing sivoe ex, awm singaix phao voe nhaox. Mawh kheu nan ex tak to sivoe kix.” 7 Khaix an, pex tak yaog ti kaoh khaing dee jawm tix mai, puing ti teei veng. Siyiex leeing ju pex tak sang ap ti tawx kix daux tawm taix pex heue. 8 Yam hoik rhim pex veng mai pex tak gleeing ti tik veng ka ngu. Awm gumlox pa hoik tawm Siyiex leeing ju, pex tak yuh nawh awm an heue. Aux tak tawx gumlox inkix ka pex. 9 Yawsux ploi kix hu mai kix hu yuh naing jawm, mox tix ot hawt sinax veng Betelax mai veng Ai, pa koe praok plak klip singaix ka veng Ai heue. Viang mawh nan, Yawsux laig ti ot ka daux sinax pui khankix ka daux sawm an heue. 10 Khaix an, nawh yaog ti kaoh caocao, ka daux plak ponngawb nawh simin ti yaox pui khankix mai nawh lih hu tau mai kuad riex ju ceu pui Isarelax khankix, ka plak sivoe pui hun ka veng Ai heue. 11 Pui naing khawmuik, pa hoik ot tau mai nawh hoik lih hu mai nied ti hoek ka dee dex heue. Kix hoik hoek ka plak sivoe veng mai bang ti ot ka praok plak laong hawt veng Ai heue. Yam in, ngawd tix mu hoik mawh pa khan sinax kix mai veng Ai heue. 12 Mawh kheu nan, nawh teei pui khankix been phwan rheng kaux mai nawh deuh kix yuh naing jawm hawt daux sinax veng Betelax mai veng Ai, pa koe ka praok plak klip singaix khaing veng heue. 13 Yam hoik deuh kix pui khankix, cub kru naing khawmuik hoik ot ka lak laong khaing veng heue. Yawsux lih hu ka daux sigreung ngawd daux sawm an heue. 14 Yam yaox simiang veng Ai ka ankix, pui pa ot ka daux veng khankix nied ti lih hu ka daux biang naing, khawm nawh mai pui nawh khawmuik, ka daux bawg yam pa hoik tin kix ti deuh sivoe daux lung heue. Viang mawh nan, nawh ang tawng kix hoik koe cub pa yuh naing jawm tix cub pa sang ah ti puing ka nawh plak khaix veng heue. 15 Yawsux mai pui Isarelax khawmuik, yuh ti awm pa hoik som ka plak sivoe kix mai to ti hu ka plak krax daux tiag heue. 16 Mawh kheu nan, pui pa ot ka daux veng Ai khawmuik hoik mawh pa kok tix tau sonsang hawt pheet ka khaix kix. Kix yaog ti hawt khaix Yawsux mai kix hoik hoek dee singai khaing veng heue. 17 Pui pa ang lih hu ti hawt khaix ceu pui Isarelax khankix ang lai koe ka daux veng Ai mai veng Betelax tix kaux kawx heue. Mawh kheu nan, kix prah siviex veng bhang khaix tix mai hawt khaix ceu pui Isarelax khankix heue. 18 Khaix an, Siyiex leeing ju deeh baox ah nin ka Yawsux heue. “Nyeu pliah pa koe ka daux taix maix lih ka plak see veng Ai heue. Grawh grawng nawh, Aux tak tawx ankix ka daux tawm taix maix.” Yawsux nyeu pliah pa hoik koe ka daux taix tix lih ka plak see veng an heue. 19 Khaix an, can pui pa pau ti yuh naing jawm khankix, yaog ti kaoh phai phai khaing dee ot kix to dom mawx dom an, awm hoik nyeu nawh taix tix lih mai kix laig daux veng mai rhim ti teei veng, kix nied ti gleeing veng ka ngu heue. 20 Yam deeh jhak pui veng Ai khankix ka plak khaix tix, kix hoik yaox kah. Jhak heue, Taox ngu veng yaog ti haok ka raoma heue. Mawh kheu nan kix ang lai koe riang ti to ka plak in plak an mai pui khawmuik hoik to ti hu ka daux tiag, mai deeh veeh ti puing ka pui pa hawt kix heue. 21 Yam hoik yaox Yawsux ka ceu pui Isarelax khankix, ka hoik pon rhim pui pa yuh naing jawm khankix ka veng mai yam yaox kix ka taox ngu veng pa haok ka raoma kix deeh veeh tix ka plak khaix mai puing ti tik pui veng Ai khankix heue. 22 Khaix an, pui tang kaux khankix lih hoek khaing daux veng mai hoek ti puing ka kix heue. Mawh kheu nan, kix hoik mawh pa kham ka daux sinax ceu pui Isarelax, ka praok plak in tiblah mai plak an tiblah heue. Kix pah son ang lai deuh pie tix kaux kawx mai son ang kix lai pon ti klawd. 23 Viang mawh nan, kix pon giex im simiang veng Ai mai kix viex nawh hoek ka Yawsux heue. 24 Khaix hoik luan ceu an khankix, yam ghoik pui Isarelax ti pah pui pa ot ka daux veng Ai khankix, ka daux lung mai ka daux tiag dee pa hoik hawt kix khaix kix mai, yam hoik yum kix ka lawm vaid tom hoik hoek bawg yam hoik laux kix, ceu pui Isarelax khankix, deeh ing ka veng Ai mai pah kix yum ka lawm vaid tix heue. 25 Mawh kheu nan, pui pa yum ka daux singaix an khawm simex, bun, koe tix mheem ra rheng kaux, kix mawh pui veng Ai khawmuik heue. 26 Yawsux ang nyang deeh yoi taix tix khaing krax pa nyeu nawh pliah pa giex tix, tom hoek bawg yam hoik yuh nawh pui pa ot ka daux veng Ai khankix laux khawmuik heue. 27 Mawh ngie khawng brie pa eei kix mai kraung pa tud rhim kix khaing daux veng an khankix, tak mawh pa pon teei pui Isarelax ti cie awm kraung pa tud rhim son tokaux cao kix, awm gumlox sikah Siyiex leeing ju pa hoik tawm Nawh Cao ka Yawsux heue. 28 Mawh kheu nan, Yawsux gleeing ti tik veng Ai mai yuh an mawh dee pum nyhee pa koe tom hoek in singaix heue. 29 Kix teuk teue simiang veng Ai ka piang khaox tom hoek plakbo. Yam hoik laig singaix dom mawx dom an, Yawsux tawx lox tix, sonsang deeh teei kix tokaux yum nawh lih khaing piang khaox mai tik nawh hawt krax laig kix ka daux siviex veng mai kix yaog ti pum simaox ka piang tokaux yum an tom nie heue. Pum simaox ting an, koe tom in singaix heue.

30 Khaix an, Yawsux hu sum khu dee tan tix mu son Siyiex leeing ju ceu pui Isarelax ka piang gawng Ebalax, 31 awm hoik tawm Mose pa mawh kawncau Siyiex, ka ceu pui Isarelax khankix, awm pa hoik tiiem ti deuh ka daux phuk lai gumlox pingnyap Mose khankix heue. Khu dee tan an, tak mawh pa yuh tix ka simaox rang tix mu, pa ang pui tix kaux kawx nyang sax saik ka kraung rhiem tix ceu kawx heue, Ref 8:31 Lih 20:25 kix tan tix tawx krax tan pa gleeing khankix ka piang an, son Siyiex leeing ju mai khawm krax tan pa appong ti tan krax tan pa nhim khankix heue. 32 Ka daux plak sivoe ngai pui Isarialax khankix tan, nawh tiiem ti deuh gumlox pingnyap ka piang simaox an, awm pa hoik tiiem Mose ti deuh heue.Ref 8:30-32 Pi 27:2-8 33 Khaix an, ceu pui Isarelax mai kuad riex ju mai cao kaing naing cao prawng see khankix, cung ka plak in plak an, hawt khwi bwan sijax mukheu ka plak sivoe cao giex kaing li khankix, khawm ceu pui Lewix khankix, pa klawm khwi bwan sijax mukheu Siyiex, khawm nyo sinie khankix mai can pui nawh pa hoik keh ka daux sinax kix heue. Khaing daux kix tix plak, hoik mawh pa koe ka plak sivoe gawng Gerizim mai khaing daux kix tix plak, hoik mawh pa koe ka plak sivoe gawng Ebalax, awm pa hoik tawm Mose pa mawh kawncau Siyiex, glang singaix pa hoik luan, sonsang nawb kix bwan ka ceu pu Isarelax khankix heue. 34 Khaix hoik ceu an khankix, nawh phat gumlox beenli khawmuik pa mawh krax pa nawb bwan mai pa jhax lawg khankix khawmuik awm pa hoik tiiem tix ka daux phuk lai beenli heue. 35 Gumlox pa hoik tawm Mose khankix khawmuik, pa ang Yawsux phat ang lai koe pie tix gum kawx ka plak sivoe cub pui hun, tau mai bun khawm kawn nyawm khankix mai sivoe nyo sinie pa ot ka daux sinax kix heue.Ref 8:33-35 Pi 11:29; 27:11-14