1 Siyiex ah nin, “Jhak heue, Aux tak kieh bhaung pa yuh laux leeing hoek piang veng Babulon mai piang pui pa ot ka daux veng Lebakamie heue. 2 Aux tak sang ploi pui pa chix keem ka bia hoek ka veng Babulon, pa sang keem ti tik haktiex nawh yi heue. Grawh grawng nawh, yam hoek ka daux singaix pa kha rhawm an, kix tak sang yuh hawt vung viang veng hawt nawh khawmuik laux leeing heue. 3 Kieh pui naing ak ceep ka kraung tiebtie naing mai vaik ak tix puing ka nawh, paw lai lhawk ka pui pa ot ka daux veng tix kaux kawx heue. 4 Mawh kheu nan, tak pah kix goh yum ka daux haktiex pui Khaladie khankix mai kix tak mat ka piang krax laux heue. 5 Viang ceu pui Isarelax mai ceu pui Yudax khankix hoik tik vud ka Siyiex tix, pa mawh Siyiex Cao kru naing raoma mai viang haktiex kix hoik naog ka phimap, pa lud piang Siyiex Cao pa singax singeh ceu pui Isarelax kawx, Siyiex ang tik vud ka kix heue. 6 Ref 51:6,9, 45 Ye 50:8; 2 Kaw 6:17; Jhi 18:4To ti lih khaing daux veng Babulon mai tang deeh taoh ka tokaux tix ku kaux, paw lai rom ti ot tau mai pui lud veng an sonsang som nai tau mai kix, grawh grawng nawh, in mawh bawg yam pawk Siyiex bix tix, Nawh Cao tak deeh tawx ka kix awm pa yuh pui mawx pui an heue. 7 Ref 51:7-8 Ye 25:15; Jhi 14:8,10; 16:19; 17:4; 18:3Veng Babulon hoik sax mawh kawk khri pa koe ka daux taix Siyiex mai pa hoik kieh haktiex khawm bee ma yoek ka heue. Hoik kieh ceu pui pa nyaux ka rawm plix siiet pa koe daux kawk an khankix yhot ka heue.\v 8 Veng Babulon hoik grhup sijaox mai laux leeing heue. Yiiem grai ka son nawh, teei ka peeh khaox Balasan, sonsang pai ka dee saux nawh moi ka heue. 9 Ex sang pai ka saux veng Babulon moi, viang mawh nan, nawh ang cu tix moi heue. Prah ka nawh mai kieh ex ku kaux lih hu ka haktiex cao tix heue. Grawh grawng nawh, krax ciyang son nawh hoek tom raoma mai hoik cux ka paiawm khankix heue.Ref 51:9 Jhi 18:5 10 Siyiex hoik jhi grawng krax pa rahsee ex heue. Hoek mai kieh ex hu krai pao grawng kaing jhaw Siyiex pa mawh Siyiex ex, ka daux veng Zion heue. 11 Rawn te mhawm mai giex ka kraung plah tieb naing, Siyiex hoik yaog ka khwan simiang ceu pui Medix khankix kaoh heue. Mawh kheu Nawh Cao bak viang ti yuh veng Babulon laux leeing heue. Grawh grawng nawh, an mawh pa pawk Siyiex bix tix, pa pawk bix son nyiex bwan Nawh Cao heue. 12 Pak chix ka sivoe guh veng Babulon, deuh cao pau khankix koe mai kieh pau mhawm mhawm, khre rien ka cub pa yuh naing jawm khankix, grawh grawng nawh, Siyiex sang yuh awm pa hoik bak tix khawm ra ceu sidah, ka lox pa hoik krai Nawh Cao sonsang yuh pui pa ot ka daux veng Babulon khankix laux heue. 13 Maix pa ot hawt dee pa kied nie rawm mai pa kied haoh hun kraung khrai sinngao khankix eue, deeh sidah singaix laux leeing maix mai krax pa ghoing rhawm maix hoik hoek phao heue.Ref 51:13 Jhi 17:1 14 Siyiex Cao kru naing raoma hoik tiextu tix ah nin, Aux tak sang kieh pui khankix naog ka daux maix, awm pa naog sido klai khankix tete mai kix tak sang yo lox tix piang maix heue. 15 Nawh cao hoik yuh haktiex ka sibrawm tix, Nawh Cao hoik pang ti deuh haktiex ka pingnya cuyi tix mai hoik naih raoma ka krax tawng yung tix heue. 16 Yam ploi Nawh Cao lox tix, lox sinum rawm lhiex khankix lih ti koe ka daux raoma, Nawh Cao yuh bhawm rawm haok ka dee sidah haktiex heue. Nawh Cao yuh puk plak praix pa viex lhiex mai Nawh Cao teei bhaung lih khaing daux teug kraung khrai Nawh heue. 17 Pui ku kaux hoik mawh pa deux pa awm pa ang koe krax tawng yung, cao chix kaing rhiem pa raug riang rao krub khankix tak pon krax kaig tua, ka riang rao krub pa hoik raug tix heue. Mawh kheu riang rao krub pa hoik raug nawh, mawh pie lhen mai ang lai koe bhawm pa toek bhawm pa lih heue. 18 Kix mawh ceu pa giex going mai pie lhen heue. Ka daux bawg yam singaix prawng ca, kix tak grai grup heue. 19 Nyum cie ceu pui Yakop ang lai awm cie kix, grawh grawng nawh, Nawh Cao mawh cao pa phan pa deuh kuceu khawmuik mai ceu pui Isarelax khankix mawh doeh ru sinngao Nawh Cao heue. Min ceu kaux Nawh Cao mawh Siyiex Cao kru naing raoma heue. 20 Mawh daix mai kraung naing Aux khankix son naing, grawh grawng nawh, Aux tak shiao maix mai yieh haktiex khankix phawng vid, Aux tak shiao maix mai yuh meung haktiex khankix laux leeing, 21 Aux tak shiao maix mai yieh ka brung khawm cao brug khankix phawng vid, Aux tak shiao maix mai yieh ka ling lawx naing brung mai cao brug khankix phawng vid, 22 Aux tak shiao maix mai yieh ka simex mai bun phawng vid, Aux tak shiao maix mai yieh ka pui riex ju mai pui awn ju phawng vid, Aux tak shiao maix mai yieh ka sinaw mai bunkrih khankix phawng vid, 23 Aux tak shiao maix mai yieh cao liang yung mai phung yung khankix phawng vid, Aux tak shiao maix mai yieh ka pui yuh ma kaung mai iak moi khankix phawng vid, Aux tak shiao maix mai yieh ka cao kaing mai cao kwang haktiex khankix phawng vid heue. 24 Siyiex ah nin, “Aux tak deeh viied phimap pa yuh pui veng Babulon mai pui pa ot ka daux haktiex Khaladie khawmuik, son grawng pa caox caig yuh kix ka veng Zion, plak sivoe ngai pex heue.” 25 Siyiex ah nin, gawng pa yuh haktiex khankix laux leeing eue, jhak heue, Aux tak yuh maix laux, “Mai Aux tak nyeu taix tix mai yuh maix laux leeing mai bang lia maix khaing rang khankix mai kieh maix mawh gawng pa hoik proe heue. 26 Siyiex ah nin, kix tak ang pon teei simaox tix lon, son num daog nyiex mai ang pon teei simaox tix lon, son num riah nyiex, khaing maix heue. Viang mawh nan maix tak mawh dee yiien pui leeing ju heue.” 27 Pak chix ka daux haktiex an mai phlu teettawng ka sinax ceu pui haktiex khankix, kieh ceu pui khankix khre rien tix puing ka nawh, kok meung haktiex Ararat, haktiex Minix mai haktiex Ashakhenaza khankix sonsang puing ka nawh, laug cao kaing naing sonsang puing ka nawh, kieh cao brug brung haok awm sido riex hauk khankix heue. 28 Kieh ceu pui khankix khre rien tix sonsang puing tix ka nawh tau mai simiang haktiex Medix mai cao kwang haktiex mai cao kaing, khawm pui meung khankix khawmuik heue. 29 Haktiex Babulon tak siyaung mai laux rhawm, grawh grawng nawh, krax pa bak pa viang Siyiex tak sang lih mawh piang veng Babulon, sonsang kieh Babulon mawh dee yiien pui mai dee ang pui lai ot lai koe heue. 30 Pui naing veng Babulon khankix hoik yawg tix ang lai puing naing mai kix hoik laig ot ka daux tab pa kaux cong kix heue. Riang rao kix hoik dieh mai lih tix awm bun mai kix gleeing dee it nawh khankix mai jhong siviex khankix kawx hoik pot hoik graig heue. 31 Pui pa ploi khan kiex ra kaux ra lai sipub paox tix, pa mawh pa viex lox satang an ra lai sipub paox tix, tix kaux lai tix kaux, sonsang krai simiang Babulon mhong ka hoik rhim veng an tix ku daok ku dawn khawmuik, 32 Daux diang krax khankix kawx hoik thox tix mai kix gleeing pang priem khankix ka ngu mai pui naing khankix hoik lhat graung ka heue. 33 Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, “Kawn bun veng Babulon hoik awm glah dee pah nghox, ka bawg yam sang pah ka nawh, mawh kheu bawg yam sang vawg nghox hoik dex hoek heue.” 34 “Nebukhaneza simiang Babulon hoik kiied ti ih aux mai hoik krid aux phawng, nawh hoik yuh aux mawh aw yi tix mu, nawh hoik bleet ti ih aux, awm siyawng mai nawh hoik kieh vaig tix naog ka ceu pa gaux rhawm aux khankix, Nawh grheu aux lih hu heue. 35 Pui pa ot ka daux veng Zion tak sang ah nin, “Kieh ceu pa kin, pa hoik yuh nawh ka aux mai ka nex aux hoek piang veng Babulon, veng Yerusaliem tak ah nin, “Kieh nham aux hoek piang pui pa ot ka daux haktiex Khaladie khankix heue.” 36 Mawh kheu nan, Siyiex ah nin, “Jhak heue, Aux tak sang yuh son maix mai tak sang deeh viied ka phimap pa yaox maix ti kham heue. Aux tak sang kieh rawm sigrit sigra mai rawm keut nawh khankix hit heue. 37 Veng Babulon tak sang lih ti mawh pum nyhee mai dee ot dee koe sox praix khankix, dee pa daox deng mai dee koe lox sibriem pui mai dee ang pui lai ot ka tix kaux kawx heue. 38 Kix tak graox awm sivai sangsi mai kix tak kieh lox tix sinum awm kawn sivai sangsi khankix heue. 39 Siyiex ah in, yam koe krax nyawm rhawm kix, Aux tak khan kheu pa ih son kix mai kieh kix yoek ka daux pa koe krax gaux rhawm tix mai kieh kix nyawm it nyawm tum ang jud ang jai mai ang lai haing heue. 40 Aux tak sang kieh kix lih, awm kawn yung pa sang pah khankix, awm yung mhaing mai pex mhaing heue. 41 “Veng Sheshiet lai mawh pa hoik rhim ti yuh ka mawx mai veng pa hoik yaogyaw pui haktiex khankix khawmuik ka, lai mawh pa hoik rhim ti yuh ka mawx, veng Babulon lai lih ti mawh dee yiien pui ka daux sinax haktiex in yuh ka mawx. 42 Rawm sigrit sigra hoik haok piang veng Babulon mai puk pak rawm khankix hoik kheem piang nawh heue. 43 Veng nawh khankix mawh dee yiien pui, dee kroh haktiex mai daux tiagtu mai haktiex dee ang pui lai ot pie tix kaux kawx mai ka dee ang kawn pui lailing ka tix kaux kawx heue. 44 Aux tak sang ciyang ka siyiex Balax pa koe ka daux veng Babulon mai Aux tak kieh nawh deeh hao ka can ceu pa hoik bleet nawh khaing daux jheeh tix mai ceu pui khankix tak ang lai khrawm paox ti hoek ka nawh khaix in tix bawg kawx heue. Mawh heue, guh veng Babulon tak sang grhup heue. 45 “Pui Aux eue, lih hu khaing veng Babulon mai kieh pui ku kaux, deeh taoh ka tokaux tix, khaing krax pa kied kin song rhawm Siyiex heue. 46 Paw kieh pex sung sang rhawm mai lhat graung ka mhong tix grawng satang veng an, tak sang mhong ka grawng lox satang tix num hoik tix num mai krax pa kied kin kha rhawm, tak koe ka daux haktiex mai simiang cao kwang haktiex tak sang tud rhim ka paox tix, tix kaux lai tix kaux heue. 47 Mawh kheu nan, jhak heue, singaix bawg yam tak sang hoek mai aux tak sang ciyang ka riang rao krub pui veng Babulon khankix mai haktiex an tak sang hoek krax kaig tua khawmuik khawm leeing mai pui naing khankix tak goh gup tix yum daux veng heue. 48 Khaix an raoma mai haktiex khawm can ceu pa koe ka daux nawh khankix, tak sang rhax lai mai gaux rhawm piang veng Babulon, mawh kheu pui tud rhim khankix khaing plak laong hoik hoek bleeh ka nawh, Simiang siyiex ah nan heue.Ref 51:48 Jhi 18:20 49 Awm hoik goh yum ceu pui Isarelax kheu sipiag veng Babulon, awm an, pui haktiex veng Babulon tak goh tix yum khawmuik heue.Ref 51:49 Jhi 18:24 50 Can pex pa hoik glawd khaing vaig khankix eue, “Hu dee singai paw lai kaog lai cung, doh keud ka Siyiex khaing ka dee singai mai kieh veng Yerusaliem hoek ka daux rhawm pex heue. 51 Ex hoik kaig tua kheu hoik mhong ex lox pa nunai pui heue. Krax kaig krax tua hoik kheem ka ngai ex, kheu hoik laig pui tang ceu khankix ka dee singax singeh nyiex bwan Siyiex heue. 52 “Mawh kheu nan, Siyiex ah nin, jhak heue, singaix bawg yam khankix tak sang hoek,” “Aux tak sang prawng ca ka riang grang krub, pui haktiex Babulon khankix mai pui pa mat khankix tak sang ngia ngheeik heue. 53 Siyiex ah nin, viang veng Babulon hoik haok daux raoma kawx mai viang nawh kieh guh veng dee pa lhaong tix kaux cong kawx, viang mawh nan, pui tud rhim khaing Aux tak sang hoek bleeh ka nawh heue.” 54 Lox sinum yiiem grai hoek khaing veng Babulon mai lox sinum krax pa kied laux kied leeing, hoek khaing haktiex pui Khaladie khankix, 55 Kheu jao yuh Siyiex veng Babulon laux leeing mai kieh lox ting lhaong nawh yiien, viang mawh lox sinum kix kawx awm lox sinum pukpak rawm pa kied ting lhaong mai kix hoik sinum ah reeng reeng heue. 56 Mawh kheu pui tud rhim hoek mai yuh veng Babulon laux mai pui naing ting riang nawh khankix hoik laig daux tawm taix pui koeng heue. Ak pa giex kix ku kaux kawx hoik pot hoik graig heue. Grawh grawng nawh, Siyiex mawh Siyiex pa chix deeh tawx deeh viied ka phimap awm pa yuh kix tete heue. 57 “Aux tak sang kieh cao kaing cao mai pui koe pingnya cuyi mai cao pa kwang haktiex, khawm simiang ot greem nawh mai pui pa kied ting riang rao nawh khankix yoek heue. Kieh kix nyawm it nyawm tum ang jud ang jai mai ang lai haing, “Simiang pa koe min ceu kaux Siyiex Cao kru naing raoma ah nan heue. 58 Siyiex Cao kru naing raoma ah nin, “Guh veng pa kied vieh, veng Babulon tak sang yieh laux lak pak leeing mai siviex veng pa kied ting lhaong nawh kawx, tak sang gleeing ka ngu, pui khakix yuh kaing pa giex going mai khawm pa taug mao tix ka daux ngu heue.”

59 Gumlox pa tawm cao jhai Yeramix ka Serayax kawn simex Nerix, kawn simex Maseyax yam hu nawh tau mai Zedekix, simiang haktiex Yudax ka veng Babulon, ka daux yam kwang nawh ka haktiex pon num tix num, yam an, Serayax mawh cao kwang piang kaing jhaw heue. 60 Mawh kheu nan, Yeramix hoik tiiem ti deuh grawng pa caox caig pa tak sang hoek piang veng Babulon ka daux phuk lai tix mai gumlox in khawmuik, mawh pa tiiem ka grawng pa dex dawd mai veng Babulon heue. 61 Yeramix ah nin ka Serayax, “Yam hoek maix ka daux veng Babulon, jhak ka lai an mai phat ka lai an khawmuik heue. 62 “Khaix an maix tak ah nin, Siyiex eue, Maix Cao hoik krai ti deuh lox ka son baoh in, sonsang yuh laux mai tat ti tik dee in, son ang tix ceu kawx lai deuk ka dee in, pui mai khawm totiag mai ka dee an tak mawh dee yiien pui leeing ju heue 63 “Yam hoik phat maix ka grawng lai in maix tak phyawk simaox tix lon ka lai an mai taing ka daux rawm klawng Yufrethix heue.Ref 51:63-64 Jhi 18:21 64 “Khaix an maix tak ah nin, awm an, veng Babulon tak glip ka daux rawm mai ang lai deeh baox yaog ti kaoh khaing krax kha rhawm, pa tak sang viex Aux hoek piang nawh, kix tak koe krax taug mao heue.” Gumlox Yeramix mawh ding heue.