1 Gumlox Siyiex pa hoik hoek ka cao jhai Yeramix son grawng pa dex dawd mai pa ciyang son ceu pui khankix, 2 grawng haktiex Ejiptux pa dex dawd mai cub kru naing Pharaw Nekhaw, simiang haktiex Ejiptux pa ot hawt rawm klawng Yupharitix, ka baoh haktiex Rakhamix mai pa hoik pex Nebukhaneza simiang Babulon ka daux num kwang Yehoyakim kawn simex Yosiyax, simiang Yudax ka haktiex pon num tix num heue.Ref 46:2-26 Isa 19:1-25; Yez 29:1-32:32 3 “Kieh khre rien kraung naing mai kraung plah tieb naing khankix mai greed tix dex daux naing heue. 4 Pex pui naing brung khankix eue, tok ka an brung mai brug ka brung, cung sijung tau mai pa ceep tix mhok rhiem, klaing pliah lawm mai ceep ka kraung naing heue. 5 Ref 46:5 Ye 6:25; 20:3,10; 49:29; Yaog 31:13Aux hoik yaox ka daox aw kix mai deeh veeh tix ing plak khaix, kheu jao pa yuh ka mawx lie? Pui naing ting riang rao kix khankix hoik som nai, kix nied tix to mai ang lai jhak plak khaix tix, grawh grawng nawh, krax lhat graung hoik koe hawt vung viang kix khawmuik, Siyiex ah nan heue. 6 Pui phai ang pon to hu mai pui pa kied ting riang rao tak ang glawd, kix tak sideeing caong tix mai goh, ka see haktiex plak laong, hawt rawm klawng Yupharitix heue. 7 In mawh pui mawx, pa hoek awm hwan rawm klawng Nilax mai lih hu awm rawm klawng khankix lie? 8 Haktiex Ejiptux tak yaog ti kaoh awm hwan rawm klawng Nilax mai awm lih hu rawm klawng khankix, mai nawh ah nin, Aux tak haok piang an mai kheem ka haktiex an mai yuh veng an mai pui ot ka daux an laux leeing heue.” 9 Brung khankix eue, haok heue, ling lawx naing brung khankix eue, kieh lox sinum lih heue. Kieh pui pa kied ting riang rao khankix lih hoek plak sivoe, pa mawh pui Ethiopia mai pui Libiyan khankix pa giex kraung plah tieb naing mai pui Libiyan pa cheung ka puing tix ak khankix heue. 10 Mawh kheu singaix in mawh singaix Siyiex Cao kru naing raoma, singaix pa deeh pawk bix, sonsang pawk Nawh Cao bix tix ka pui koeng Nawh khankix, lawm vaig Nawh kiied tix ih tom sak mai nyaux tom yoek ka nham kix heue. Mawh kheu Siyiex Cao kru naing raoma, hoik yuh krax tan pa appong ka haktiex plak laong, hawt rawm klawng Yupharitix heue. 11 Kawn bunkrih haktiex Ejiptux, hu ka haktiex Gilat mai teei ka peeh khaox Balasan heue. Hoik shiao sidah khankix tom nie giex going maix ang tie moi jhawm saux ka heue. 12 Can pui khankix hoik mhong ka grawng krax pa kaig tua maix mai lox yiiem yo maix hoik tah khawm bee haktiex heue. Grawh grawng nawh, pui pa ting riang rao hoik lai sideeing ka paox tix, tix kaux lai tix kaux mai kiex khawm ra hoik goh tau piang tiex heue.”

13 Gumlox pa krai Siyiex ka cao jhai Yeramix, sonsang hoek Nebukhaneza simiang Babulon ti sang puing ka haktiex Ejiptux, ka daux pa ah nin heue.Ref 46:13 Ye 43:10-13 14 “Krai pao grawng an ka daux haktiex Ejiptux mai krai ka daux veng Migadawlax mhong heue. Krai pao ka daux veng Nawpha mai veng Taphaniet ah nin, cung sijung mai khre rien tokaux tix, mawh kheu lawm vaig Nawh Cao kiied ti ih can pui ot hawt rawb rim maix khawmuik heue. 15 Pui pa koe rhawm vao rhawm cong maix khankix lai mawh pa som kheu jao pa yuh ka mawx lie? Kix ang lai pon cung sijung kheu hoik nyhot Siyiex kix goh heue. 16 Nawh Cao hoik kieh pui tom nie goh piang paox tix, tix kaux lai tix kaux mai kix ah nin, yaog ti kaoh heue, kieh ex deeh ing ka ceu pui tix mai ka haktiex dee keh dee kung ex, khaing krax pa kha rhawm ka lawm vaig in heue. 17 Kix kok yo ah nin, “Pharaw simiang haktiex Ejiptux, mawh pa giex going khaing, hoik kieh bawg yam pa tat tix luan hu heue. 18 Simiang pa koe min ceu kaux Siyiex Cao kru naing raoma, ah nin, “Awm im ju Aux, mai awm kriem koe gawng Tabaw ka sinax gawng lua khankix mai awm koe gawng Kharamelax hawt rawm sigrit sigra, awm an pui tix kaux tak sang hoek heue. 19 Maix kawn bun pa ot haktiex Ejiptux eue, khre rien tokaux tix, sonsang hu mawh pui pa giex laung heue. Mawh kheu veng Nawpha tak sang mawh pa laux leeing mai mawh dee pa yiien pui mai dee ang pui lai ot ka heue. 20 Haktiex Ejiptux, mawh mawie shiang pa kied mhawm tix mu, viang mawh krax laux leeing, tak sang hoek khaing plak laong heue. 21 Viang pui pa vai nawh khankix hoik awm mawie pa kied kluing sinax kawx, mawh kheu kix hoik deeh veeh ti ing mai to luan tau mai paox tix heue. Kix ang lai pon cung sijung, mawh kheu singaix pa kha rhawm mai bawg yam krax ciyang hoek piang kix heue. 22 Lox nawh sinum awm luah lox siuing, mawh kheu kix hoik yaog tix hoek ka nawh tau mai kru naing tix cub mai viex moe hoek awm pui pa sang kid ka khaox heue. 23 Siyiex ah nin, kix tak sang kid ka nong cie nawh, viang nong an mawh pa kied nhik kawx, mawh kheu mawh kix pa ang lai dak uik simin mai kied haoh hun khaing sido klai khankix heue. 24 Kawn bun haktiex Ejiptux, tak sang kaig tua mai tak ap nawh ka daux tawm taix ceu pui pa kaoh khaing haktiex plak laong heue.” 25 Siyiex Cao kru naing raoma pa mawh Siyiex ceu pui Isarelax ah nin “Jhak heue, Aux tak sang viex krax ciyang hoek piang siyiex Amon pa koe ka daux veng nawh, piang simiang mai piang haktiex Ejiptux, piang siyiex kix, piang Pharaw kix mai piang pui pa een rhawm tix ka daux nawh khankix heue. 26 Aux tak sang ap kix ka daux tawm taix, pui pa sawg tix pah ju kix mai ka daux tawm taix Nebukhaneza simiang Babulon mai ka daux tawm taix kawncau nawh khankix heue. Khaix an haktiex Ejiptux, tak sang deeh awm ka bawg yam singaix prim an khankix, Siyiex ah nan heue.”

27 Viang mawh nan, kawncau Aux Yakop eue, paw lhat graung, Ref 46:27-28 Ye 30:10-11ceu pui Isarelax khankix eue, paw laux rhawm, grawh grawng nawh, jhak heue, Aux tak deeh taoh maix khaing dee pa kied singai mai khawm doeh ru maix khaing haktiex pa hoik yaox kix ti mawh pa giex laung, ceu pui Yakop tak dee hoek mai krax nyawm rhawm, pui tix kaux kawx tak ang lai pon kieh nawh koe krax lhat graung heue. 28 Siyiex ah nin, kawncau Aux Yakop eue, paw lhat graung, mawh kheu Aux ot tau mai maix, Aux tak sang yuh ceu pui haktiex khawmuik, khaing dee hoik grheu Aux maix hu sidah sidu kawx, viang mawh nan, Aux tak ang lai kieh maix koe dee sidah sidu heue. Aux tak sang kieh maix mawh pa mhawm mhiem, mawh kheu Aux tak ang lai prah maix khaing krax pa kham geu khawmuik heue.”